XX-р зууны эхэнд Монголын барилгын байгууллага хөгжлийн замналдаа ороход зураг төслийн байгууллага нэн шаардлагатай болж ирсэн. Энэ үүднээс 1958 онд Барилгын зураг төслийн институтыг анх байгуулсан түүхтэй.


Сүүлд шинэ цагийн барилгын салбарыг хөгжүүлэхэд үнэтэй хувь нэмрээ оруулж буй байгууллага бол Барилгын Зураг Төсөл Зохиогчдын Холбоо /БЗТЗХ/ билээ. Өнөөдөр тус байгууллагын 10 жилийн ойн баяр тохиож буй бөгөөд баярын арга хэмжээ МҮЭ Соёлын төв ордонд болж байна.


БЗТЗХ-ны тэргүүн Н.Дорж,
       Юун түрүүнд Монголын БЗТЗХ-ныхондоо 10 жилийн ойн баярын мэндийг хүргье. Барилгын зураг төслийн салбарт ажиллаж байсан мэргэжлийн өндөр ур чадвартай, удирдах албан тушаал хашиж байсан хэсэг мэргэжилтнүүдийн санаачлагаар 2007 оны зургаадугаар сарын 7-нд БЗТЗХ ТББ-ийг анх байгуулсан юм. Энэ цагаас эхлэн барилга хот байгуулалт, зураг төслийг хөгжүүлэх талаар төрөөс баримтлах бодлогыг боловсруулахад оролцох замаар олон улсын жишигт хүргэх, гишүүн байгууллага, тэдгээрийн ИТА-ын эрх, ашгийг хамгаалах, гишүүдийн хамтын ажиллагааг дэмжих гэсэн эрхэм зорилготойгоор 10 жил ажиллаж ирлээ. Хэдий түүхийн хугацаа богино ч гэсэн бидний хувьд амжилт бүтээлээр арвин жил байлаа. БЗТЗХ нь анх 18 гишүүнтэйгээр нээж байсан бол өнөөдөр 130 байгууллагын 200 гаруй ИТА гишүүнчлэлтэйгээр үйл ажиллагаагаа өргөжүүлж чадсан байна. Бид цаашдаа “Барилгын салбарт BIM нэвтрүүлэх цогц хөтөлбөр”-ийг хэрэгжүүлсэн үсрэнгүй хөгжлийн хөтөч байх болно.