“N.A.P GROUP” ХХК-ийнхан 10 жилийн ойн баяраа тэмдэглэж байна

“N.A.P GROUP” ХХК-ийнхан 10 жилийн ойн баяраа тэмдэглэж байна

  Хот төлөвлөлт, барилгын зураг төслийн “N.A.P GROUP” ХХК-ийнхан “Зуу зуун жил”-ийн их бүтээн байгуулалтынхаа эхлэлийг бэлгэдсэн 10 жилийн ойн баярын арга хэмжээгээ өнөөдөр эхэллээ.

  Үүсгэн байгуулагдсан цагаасаа барилгын салбарын бүтээн байгуулалт, хөгжил дэвшилд шинэ өнгө төрхийг авчирч, бодитой хувь нэмрийг оруулж яваа тус компанийнхан захиалагч, хөрөнгө оруулагчдынхаа сэтгэл ханамж, үр ашигтай хамтын ажиллагаа, чанартай бүтээгдэхүүн үйлчилгээг эрхэмлэн ажилласаар өдгөө 10 жилийг үджээ.

  Энэхүү тэмдэглэлт ойн баярын эхлэлийг тавьж, хийж хэрэгжүүлсэн төсөл бүтээлүүдээ олон нийтэд дэлгэн толилуулах “10|100 ЗУУН ЖИЛИЙН ЭХЛЭЛ” үзэсгэлэнгээ “Бльюмон” төвийн “Блью мүүн” арт галерейд нээж, “N.A.P GROUP” ХХК-ийг дэмжин ажилладаг ахмад зөвлөхүүд, залуу архитекторууд, үе үеийн мэргэжил нэгтнүүддээ хүндэтгэл үзүүлсэн юм.

N.A.P GROUP ХХК-ийн Захирал, ахлах архитектор М.Уянга, 



Юуны өмнө өнөөдрийн “10|100 ЗУУН ЖИЛИЙН ЭХЛЭЛ” үзэсгэлэнгийнхээ нэрийг товч тайлбарлая аа. Одоогоос 10 жилийн өмнө, бага залуу байхдаа томоогүй гэнэн мөрөөдлөөр компаниа байгуулж байсан түүхтэй. Тэр үед гадны зураг төслийн компаниудыг судалж үзээд 100 жилийн түүхтэй ийм л түүхийг бүтээсэн компани бий болгохыг мөрөөдөж, анх энэхүү компаниа байгуулж байлаа. Мөрөөдлийнхөө эхлэлийг тавьсан тэр цагаас хойш 10 жилийн ой өдгөө ийнхүү тохиолоо. Хэдийгээр эдийн засаг тогтворгүй, барилгын салбар зогсонги байгаа ч гэсэн бид урьдынхаасаа илүү их хичээн, хөдөлмөрлөж зорилгодоо хүрэх зуун жилийн эхлэл хэмээн үзэсгэлэнгийнхээ нэрийг “10|100” хэмээн нэрийдэж байна.

Энэ хугацаанд хамтран ажиллаж ирсэн бүх захиалагчид, хөрөнгө оруулагчид, “N.A.P GROUP ХХК-ийн Зөвлөхүүд, архитекторууд, инженерүүд, ШУТИС-ийн багш нар, бидэнд урам зориг хайрлан өдийг хүртэл дэмжсээр ирсэн дотны найзууд, “N.A.P GROUP” ХХК-ийн баг хамт олныг бүрдүүлэн хичээл зүтгэл гарган эрч хүчтэйгээр хөдөлмөрлөж байгаа залуус, бидний баярыг хуваалцахаар энд хүрэлцэн ирсэн та бүхэндээ талархлаа илэрхийлье.
 
  Түүнчлэн 10 жилийн ойн арга хэмжээнийхээ хүрээнд “N.A.P GROUP” ХХК нь “LIGHT FROM THE SHADE” архитектурын гэрэл зургийн уралдааныг зарлаж, шилдэг оролцогчдодоо шагнал гардуулсан юм.

Энэ талаар, N.A.P GROUP ХХК-ийн Архитектор О.Цэнгүүн,



Бид 10 жилийн ойн баяраа тохиолдуулан “LIGHT FROM THE SHADE архитектурын гэрэл зургийн уралдааныг зарласан. Уралдааны нэр маань “Өнгөрснөөс одоог буулгах нь” гэсэн утгыг илэрхийлж байгаа. Энэхүү тэмцээн нь өв уламжлалыг гэрэл зургаар дамжуулан архитектурын гэрэл зургийн санг бий болгох, архитектурын өнөөгийн хөгжил цэцэглэлтийг олон нийтэд таниулан сурталчлах зорилготой юм.

LIGHT FROM THE SHADE архитектурын гэрэл зургийн уралдааны шагналтнуудаар:
  • Тусгай байрын шагнал – н.Батсайхан, н.Тэргэл
  • III байрын шагнал – н.Цагаандаваа
  • II байр буюу дэд байрын шагнал – Б.Батзориг
  • I байр буюу тэргүүн байрын шагнал – н.Бүдханд нар тодорч, шагналаа гардан авлаа.
  Дашрамд дурдахад уралдааны шилдэг оролцогчдын бүтээлийг “10|100 ЗУУН ЖИЛИЙН ЭХЛЭЛ” үзэсгэлэнгээс үзэж сонирхож боломжтой юм байна.

МҮХАҮТ-ын Орлогч дарга М.Сарандаваа,



Юуны өмнө энд хуран цугласан та бүхний амар амгаланг эрье. Өнөөдрийн байдлаар МҮХАҮТ-д 3,400 гаруй гишүүн байгууллага бий. Манай отгон гишүүдийн нэг, өдгөө эрч хүчтэйгээр амжилттай ажиллаж буй “N.A.P GROUP” ХХК-ийнхаа 10 жилийн ойн баяр, оюуны их бүтээлүүдээрээ гаргаж буй үзэсгэлэн, тэмдэглэлт арга хэмжээнүүдэд нь оролцож буйдаа туйлын баяртай байна. Одоо 10 жил болж буй ч цаашдаа зуу, зуун жилээр үргэлжлэх их түүхийг бүтээлцэх ирээдүй та бүхнийг хүлээж байна. 

Миний хувьд “N.A.P GROUP” ХХК-тай хоёр жилийн өмнөөс “Астана Экспо 2017” олон улсын үзэсгэлэн яармагт оролцох Монголын талын ажил дээр хамтарч, санал бодлоо солилцож, дөрвөн төслийн зурган дээр хамтран ажиллаж, засгийн газарт танилцуулж байсан. Тус компани нь хэдийгээр залуу хүмүүсээр баг хамт олноо бүрдүүлсэн хэдий ч маш их судалгаа хийж, бодит мэдээлэлд тулгуурлан олон улсын дэвшилтэт технологиудыг нэвтрүүлэхийг хичээж ажилласан санал санаачилга нь маш үр дүнтэй болсон. Бид тэдгээр дөрвөн төслөөс Монгол уламжлалт гэрийн бүтцээс санаа авч үндэсний хэв загварыг хадгалсан өнгө загварын олон элементийг агуулсан нэг төслийг нь сонгон хэрэгжүүлэхээр төлөвлөж байсан. Харамсалтай нь эдийн засгийн хямралтай холбогдуулаад Монгол Улсын засгийн газраас тус үзэсгэлэнд оролцохгүй байх шийдвэр гаргасан. Гэсэн хэдий ч энэхүү төсөл тодорхой хугацааны дараа биеллээ олно гэдэгт эргэлзэхгүй байна. 

Мөн НҮБ-аас Тогтвортой хөгжлийн үзэл баримтлал гэдэг томоохон бодлогыг хэрэгжүүлж, 17 зорилтыг дэвшүүлсний хүрээнд Ногоон сургууль хэмээх эрчим хүчний хэмнэлттэй барилгыг хөгжүүлэх хандлагыг эрхэмлэж байгаа. Энэ чиглэлээр Монгол улсдаа манлайлж буй байгууллага яах аргагүй “N.A.P GROUP” ХХК юм. Энэ мэтчилэн олон үлгэр жишээ үйлсийг энэ хамт олон хийж хэрэгжүүлж байгаа билээ. Тэгэхээр “N.A.P GROUP” ХХК-д зөвлөгөө өгч хамтарч ажиллаж байгаа, ирээдүйд хамтрах, мөн өнөөдрийн уралдааны оролцогчид, залуустаа өндөр амжилтыг хүсч, зуун жилээс ч илүүгээр амжилттай ажиллахыг хүсч МҮХАҮТ-ын нэрэмжит шагналуудыг “N.A.P GROUP” ХХК-ийн нэр бүхий ажилтнуудад гардуулъя.

Шагналтнууд:
  • МҮХАҮТ-ын Хүндэт өргөмжлөл – Архитектор О.Цэнгүүн
  • МҮХАҮТ-ын Интрепренершип Скиннед шагнал – Зөвлөх инженер М.Амаржаргал
  • МҮХАҮТ-ын Тэргүүн дээд хүндэтгэлийн Хийморь одон – Ерөнхий зөвлөх Г.Мягмар


“N.A.P GROUP” ХХК-ийн 10 жилийн ойн баярын арга хэмжээнүүд 2017 оны 9 дүгээр сарын 12-ныг дуустал “Бльюмон” төвд үргэлжлэх юм.







Эх сурвалж: Барилга.МН

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.