Байгалийн гэрэлтүүлэг сайтай амьсгалдаг хана бүхий Номын хот байгууламж

Байгалийн гэрэлтүүлэг сайтай амьсгалдаг хана бүхий Номын хот байгууламж

  Үйлдвэрлэлийн томоохон бүс гэгдэх Шенжен хот дүр төрхөө өөрчилж эхэллээ. Тус хотод соёл урлагийг дэмжсэн томоохон бүтээн байгуулалтын эхлэлийг тавьж, Shenzhen Book City төслийг хэрэгжүүлэхээр болжээ.

  Хятадын соёлын бүтээн байгуулалтыг дэмжих энэхүү төслийн загварын шалгаруулалтад Шенжений архитектурын Atelier Global пүүс түрүүлж, гүйцэтгэгчээр ажиллах болжээ. Төслийн байршлыг хотын зүрхэн тус төв хэсэгт буюу Лон хуа дүүрэгт байрлуулахаар сонгосон байна. Сонгогдсон архитектурын шийдэл нь хүрээлэн буй орчинд ээлтэй, байгалийн гэрэлтүүлэг болон агааржуулалт сайтай, өөрөөр хэлбэл амьсгалдаг ханатай учраас шүүмжлэгчдийн зүгээс сайшаалтай хүлээн авчээ.

  45,000 м.кв талбайтай Номын хот байгууламж нь Лон хуа дүүрэгт соёл урлагийн гол цэг нь байж, олон нийтэд нээлттэй үйлчилгээ явуулах юм. Нийт зургаан давхар барилгын талбай нь хотын хүрээлэн буй орчны өнгө үзэмжийг сайжруулахад чиглэгдэж байгаа аж.

  Номын хот байгууламжид олон нийтэд зориулагдсан том танхимаар холбогдсон дөрвөн талд номын сан, худалдааны танхим, зоогийн газрууд, “co-working spaces”, соёл урлагийн хэсгүүд байрлах юм байна. Гудамжнаас шууд ил харагдах террас хэсгийг ногоон байгууламжаар тохижуулж, дээврийн хэсэгт спортын тоног төхөөрөмжүүдийг суурилуулах гэнэ.

  “Их хотын урлаг-амьдралын хэв маяг нь зөвхөн барилгын дотор талд бус, хот болоод гадна орчинтойгоо уялдаа холбоотой байх ёстой. Ялангуяа барилгын гадна хэсэг нь хүмүүс болоод хотын бусад хэсгүүдтэй нягт холбогддог байх нь чухал. Ингэхийн тулд тус барилгын гадна орчин, террас зэргийг тухайн соёлын гудамж болон дотор хэсэгтэй нэгтгэж өгсөн. Уншигчдын хувьд ийм хэв маяг бүхий номын сантай болсон тохиолдол байгаагүй билээ.” гэж Номын хот төслийн архитекторууд ярьсан юм.

Төсөл 2020 он гэхэд бүрэн хэрэгжиж, ашиглалтад орно.

Холбоотой мэдээ