Нийслэлийн Засаг дарга бөгөөд Улаанбаатар хотын Захирагчийн  2016-2020 оны үйл ажиллагааны хөтөлбөрт “Сургуулийн хүртээмжийг нэмэгдүүлэх чиглэлээр  3 ээлжээр хичээллэж байгаа сургуулийн ээлжийн ачааллыг бууруулж, 2 ээлжид бүрэн шилжүүлнэ”, “Хороо бүрийг цэцэрлэгтэй болгоно”  хэмээн тус тус заасан. 

Дээрх зорилтыг хэрэгжүүлэх хүрээнд нийслэлийн хэмжээнд 2017 онд ашиглалтад орох 10 сургууль, 13 цэцэрлэгийн барилга угсралтын ажил явагдаж байгаа бол энэ хичээлийн шинэ жилд багтаж 9 цэцэрлэг, 5 сургуулийн  үндсэн барилга болон өргөтгөлүүд бэлэн болно. Өнөөдрийн байдлаар нийт барилгын ажлын явц 92 орчим хувьтай үргэлжилж байна.

Нийслэлийн Боловсролын газрын дарга Ж.Гантулга барилгын ажлыг 09 дүгээр сарын 01-ний дотор ашиглалтад оруулж, сургалтын үйл ажиллагааг хэвийн явуулахыг холбогдох албаны хүмүүст үүрэг болголоо.