Гэр ахуйн олон төрлийн бүтээгдэхүүнээрээ алдартай IKEA компани үйл ажиллагаагаа өргөжүүлэн нарны зай хураагуурын шийдэл бүхий нарны эрчим хүчний хавтан үйлдвэрлэж эхэлжээ. Энэхүү хавтангийн ачаар айл өрхүүд цахилгааны зардлаа 70 хүртэл хувиар хэмнэх боломжтой.

  Дэлхийн тавилгын зах зээлд тэргүүлэгч Шведийн үйлдвэрлэгч тус компани уг нарны зайн хавтангаа 2013 оноос үйлдвэрлэж эхэлсэн ч, дөнгөж одоо л олон нийтэд албан ёсоор зарлаж байгаа юм. Энэ нь нарнаас эрчим хүчийг хураан авч хадгалаад хүссэн үедээ ашиглаж болдог хавтан аж. Уг хавтанг хэрэглэснээр айл өрхүүд төвийн шугам сүлжээнээс авах цахилгааны хэрэглээгээ бууруулж, багагүй мөнгө хэмнэх боломж бүрджээ.

  IKEA-ийн эдгээр хавтан нь Tesla-ийн нар болон салхи гэх мэт сэргээгдэх эх үүсвэрээс эрчим хүч гарган авдаг зайтай адилхан ч хүчин чадлын хувьд арай бага аж. Мөн энэхүү нарны зай хураагуурын системийн жижиглэн худалдаагаар салбартаа анхдагч Solarcentury пүүсээ байгуулсан нь чухал ач холбогдолтой гэдгийг компанийн зүгээс мэдэгджээ.

  “Манай бүтээгдэхүүнийг хэрэглэснээр хэрэглэгчид маань илүү тав тухтай, таатай нөхцөлд амьдрах боломжтой. Бид худалдан авагчидаа нарны зайн хавтангаас илүү их ашиг, үр өгөөжийг хүртэхэд нь тусалж, дэмжиж ажиллах болно. Цахилгааны зардал энэ оны тухайд 15 хувиар өссөн шүү дээ. Ер нь эрчим хүчний зардлаа хэмнэх ийм таатай боломж урьд өмнө гарч байсангүй” хэмээн IKEA-ийн Их Британи болон Умард Ирланд дахь менежер ярьсан байна.

  Тэдний мэдэгдэж буйгаар тус нарны зайн хавтанг суурилуулсан байшин зай хураагуурыг ашиглахгүйгээр нарнаас авсан эрчим хүчнийхээ 40 хувийг л ашигладаг гэнэ. Харин бусад 60 хувийг нь төвийн шугам сүлжээ руу нийлүүлдгээс тухайн айл өрх өөрсдөө эрчим хүчний нөөцгүй үлддэг аж.

  Тиймээс IKEA нь 14.5 цагийн турш ажиллах 200 ваттын хүчин чадалтай 3.3 цаг/киловаттын нарны зай хураагуурыг 3,000 фунт стерлингээр худалдах ажлыг Их Британиас эхлүүлжээ. Одоогоор Tesla-ийн 14 цаг/киловаттын Powerwall хавтан 5,900 фунт стерлингийн үнэтэй байгаа юм.

  Түүнчлэн Их Британийн засгийн газраас саяхан “Faraday Challenge” ажлыг санаачилж, 246 сая фунт стерлингийн хөрөнгө оруулалтыг нарны зайн технологид зориулахаар шийдвэрлэсэн нь энэ технологийн хөгжилд ихээхэн хувь нэмэр болно гэж IKEA-ийн удирдлага мэдэгдлээ.