Хэт олон өнцөг булантай барилга төлөвлөхөөс зайлсхий

Хэт олон өнцөг булантай барилга төлөвлөхөөс зайлсхий
/Монголын Барилгын Инженерүүдийн Холбооны дэргэдэх
Эрчим хүчний хэмнэлтийн төв зөвлөж байна./
 
Барилгын эрчим хүчний хэрэглээ:

  Эрчим хүчийг хэрэглэж байгаа салбараар нь үйлдвэрийн, барилгын, зам тээврийн гэх мэтээр ангилдаг. Манай орны хувьд барилгын салбарт, тэр тусмаа халаалтад ашиглаж буй эрчим хүчний хэрэглээ бусад салбарынхаас илүү байдаг. Ахуйн хэрэглээний эрчим хүчний 70 гаруй хувийг зөвхөн халаалтад зарцуулдаг.

Нэг өрх өдөрт 3-10 квт цахилгаан эрчим хүч хэрэглэдэг бол ид хүйтний үеэр нэг гэр өдөрт халаалтад 200 квт дулаан хэрэглэдэг.

  Барилгын дулаан тусгаарлалт муу байх тусам барилгаас алдагдах дулааны хэмжээ ихсэж, тэр хэмжээгээр халаалтад эрчим хүч өндөр зарцуулдаг. Амины орон сууцыг ихэнх тохиолдолд барилгын зураг төсөлгүй барьдгаас дулаалгыг туйлын хангалтгүй хийх ба үүнээс хамааран халаалттай холбоотой хүндрэл, зардал өндөр гарч ая тухтай амьдрах нөхцөл алдагдана.

Барилгыг зөв төлөвлөх:

  Барилга төлөвлөхөд хамгийн түгээмэл тохиолддог алдаа нь түүний хэмжээ. Олон өрөөтэй, том харш маягийн барилга төлөвлөснөөс сүүлдээ анхдагч зардлыг дийлэхгүй дутуу хаях, барьсан ч ашиглалтын зардлыг нь дийлэхгүй хөлдүү сууц болгон орхих явдал түгээмэл байдаг. Нэг айлын сууцанд 3-аас доош унтлагын өрөө байх нь тохиромжтой, мөн зочны, гал тогооны, ажлын өрөөнүүдтэй байхад үндсэндээ хангалттай.

Барилгын анхдагч зардал нь хэмжээ, материалын сонголтоос хамаарч 1 мкв талбайн үнэ өөр өөр байна.

Хэтэрхий олон өнцөг булантай барилга төлөвлөхөөс зайлсхийх хэрэгтэй. Угсарч барихад хүндрэлтэйгээс гадна дулаан алдагдал их, цантах магадлал өндөр байдаг.

Голлох том цонхнуудаа өмнө талдаа гаргаж, баруун зүүн талдаа цөөвтөр цонхтой, хойд талдаа аль болох цонхгүй байхыг төлөвлөх нь зүйтэй. Нарны дулаан өмнө талын цонхоор хамгийн их нэвтэрч хүйтний улиралд түлш хэмнэдэг.

Барилга барих газраа нөмөр ихтэй, нарны гэрэл саадгүй тусдаг байхаар сонгох хэрэгтэй.



Дулааны алдагдал:

Барилгын дулаан 2 замаар алдагддаг.

Дулаан шилжүүлэлтээр. Барилгын хана, тааз, шал зэргийг хэр зэрэг сайн дулаалснаас хамаарч энэ алдагдлын хэмжээ өөрчлөгддөг. Шилэн хөвөн, хөөсөнцөр, эсгий, эрдэс хөвөн, модны үртэс зэрэг нь дулааныг муу дамжуулдгаас сайн дулаалга болно. Тиймээс барилгын хийцүүдэд эдгээр материалыг ямар нэгэн байдлаар заавал нэмэлт дулаалга болгон ашиглавал дээрх алдагдлыг багасгана.

Нийт дулаан алдагдлын 25 хувь нь цонхоор, 25 хувь нь ханаар, 15 хувь нь тааз буюу хучилтаар, 10 хувь нь орчим нь шалаар алдагддаг.



Барилгын дулаан алдагдал:
  • Барилгын хэлбэр
  • Хаших бүтээцүүдийн дулаалга
  • Битүүмжлэл гэсэн 3 үндсэн үзүүлэлтээс хамаардаг.
Агаар нэвтрүүлэлтээр. Барилга угсралтын ажлыг чанаргүй, технологийн дагуу гүйцэтгээгүйгээс болон чанаргүй хийц /тухайлбал цонх/ сонгосноос голчлон хаших бүтээцүүдийн уулзвар /хана-цонх/ хэсгүүдээр нүх сүв гарна. Энэхүү нүх сүвээр хүйтний улиралд гаднаас хүйтэн агаар орж ирэх бөгөөд үүнийг халаахад их хэмжээний эрчим хүч зарцуулах болно. Нийт дулаан алдагдлын 25-35 хувь нь үүнд хамаарна.

 

Холбоотой мэдээ