Дэлхий дээрх хамгийн том нарны зайн хөвөгч байгууламжийг ашиглалтад оруулж, орон нутгийн цахилгаан шугам сүлжээнд холбосон тухайгаа Хятад улс мэдэгдлээ. Энэ нь агаарын бохирдол, нүүрстөрөгчийн ялгаруулалтаараа нэлээд шүүмжлэл дагуулаад байгаа тус улсын засгийн газраас хэрэгжүүлсэн хамгийн том төсөл бөгөөд сэргээгдэх эрчим хүчний салбарт тэргүүлэх томоохон түлхэц болж байгаа юм.

  Анхуй мужийн Хуайнан хотноо байрлах 40 мегаваттын уг байгууламжийг PV буюу нарны зайн эргэх хувиргагч үйлдвэрлэгч “Sungrow Power Supply” компани гүйцэтгэжээ. Сонирхолтой нь энэхүү усанд хөвөгч байгууламж усанд автсан хуучны нүүрсний уурхайн бүст байгуулагдсан аж.

  Хөвөгч нарны зайн ферм байгуулсан нь хүн ам өсөн нэмэгдсэнээс болж нягтаршил нь ихэсч, хот төлөвлөлтийн хувьд зай талбай гаргах боломжгүй хот, суурин газруудад ихээхэн хэрэгтэй үлгэр жишээ авахуйц төсөл болж чадсаныг мэргэжилтнүүд нь онцолж байгаа юм. Хотын зай талбайг хэмнэдэг учир хүн ам ихтэй, усны хомсдолд орж буй бүс нутгуудад ихээхэн тохиромжтой аж. Түүнчлэн усны гадаргуу дээрх сэрүүн агаар нь удаан хугацаанд дулаан температурт байх нарны зайн үйл ажиллагаанд тулгарах эрсдэлийг бууруулах сайн талтай юм байна.

  Уг хөвөгч байгууламж нь Хятад улсад байгуулагдахаар төлөвлөгдсөн нарны эрчим хүчний олон эх үүсгүүрүүдийн эхлэл нь болж байна. 2016 онд тус улс үүнтэй ижил 20 мв-ын нарны эрчим хүчний хөвөгч станц байгуулахаа зарлаж байсан билээ. Хятад улс нь мөн дэлхий дээрх хамгийн том буюу 25 кв.км бүхий газар нутагт “Longyangxia Dam” нарны цахилгаан станцыг 2014 онд байгуулсан юм.

  Нарны эрчим хүчний хэрэглээ рүү орж буй энэхүү хувьсал нь уг технологийн өртгийг бууруулах бас нэгэн давуу талтай аж. 2020 он гэхэд Хятад улс нарны зай үйлдвэрлэгчдийн тогтоосон үнийг гурав дахин бууруулж, түлшний бус эрчим хүчний үйлдвэрлэлийг 20 хувиар нэмэгдүүлэхээр төлөвлөжээ.