Хуванцар сандлаар барилга барилаа гэж үү хэмээн та бүхэн гайхаж байна уу? Тийм ээ, автомашины үзүүлэнгийн танхимын барилгыг хар өнгийн хуванцар сандлуудаар чимсэн сонирхолтой тохиолдол бүртгэгдээд байна. “CHYBIK+KRISTOF” хэмээх архитектурын компани энэхүү барилгын гадны заслыг өөрчлөхдөө ийнхүү 900 ширхэг сандал ашигласан нь эдийн засгийн хувьд хэмнэлттэй, загварын хувьд шинэлэг өвөрмөц алхам болжээ.

  1990-ээд онд баригдан ашиглалтад орсон энэхүү барилгын анхны загварыг өөрчилж, шинэ загвар гаргах ажлыг “CHYBIK+KRISTOF” компанийн залуус хийж гүйцэтгэжээ. Архитектор Ондрей Чибик үүнийг “Маш хямдхан зардлаар өвөрмөц сэтгэж чадлаа” хэмээн хэлсэн юм.

  Энэ бол урьд хожид сэдэж байгаагүй, фасадны хамгийн шинэлэг шийдэл юм. Гаргасан зардлыг тооцож үзэхэд нэг сандал тус бүрт ердөө 3.25 ам.доллар зарцуулсан байна. Зардлаа зүгээр ч нэг хэмнээд зогсоогүй, энэ нь зөвхөн интерьер засал хийдгээрээ олны танил болсон “MY DVA”-ийнхний хувьд томоохон сурталчилгаа болж чадлаа.

  Ийнхүү гадна заслыг шинэчлэхээс өмнө ганцхан давхар бүхий уг барилгад анхаарал татах зүйлс огт байгаагүй юм. Харин одоо бол олны нүдийг хужирлаж, анхаарлыг татсан сайхан бүтээл болжээ.