​Монгол Улсаас БНХАУ-д суугаа Элчин сайдын Яаманд 4 дүгээр сарын 11-нд "Монгол улс, БНХАУ-ын барилга, хот байгуулалтын хөрөнгө оруулалт-2017" чуулга уулзалт боллоо. Уулзалтыг МБҮА, БХБЯ, Элчин сайдын яам хамтран зохион байгуулж, Монгол Улсаас БНХАУ-д суугаа онц бөгөөд бүрэн эрхт элчин сайд Д.Ганхуяг, Монгол Улсын БХБЯ-ны сайд Г.Мөнхбаяр, Хятадын Орон сууц хот хөдөөгийн бүтээн байгуулалтын яамны Төлөвлөгөө, эдийн засаг, гадаад харилцааны газрын орлогч дарга Ли Липин болон холбогдох салбарын удирдлага, хоёр орны бизнесийн төлөөлөгч 200 гаруй хүн оролцлоо.

Монгол улсаас БНХАУ-д суугаа онц бөгөөд бүрэн эрхт элчин сайд, ноён Д.Ганхуяг

​    Монгол Улсаас БНХАУ-д суугаа онц бөгөөд бүрэн эрхт элчин сайд, ноён Д.Ганхуяг чуулганыг нээж хэлсэн үгэндээ "2014 онд байгуулсан хоёр орны худалдаа, эдийн засгийн хамтын ажиллагааг хөгжүүлэх дунд хугацааны хөтөлбөрийн хүрээнд худалдаа, эдийн засгийн хамтын ажиллагааг нэмэгдүүлэх, худалдааны бүтцийг сайжруулах, хөрөнгө оруулалтыг нэмэгдүүлэх чиглэлээр хамтран ажиллах, улмаар худалдааны хэмжээг 2020 он гэхэд 10 тэрбум ам.долларт хүргэх зорилт тавьсан бөгөөд энэ зорилгод өнөөдрийн та бидний оролцож буй энэ арга хэмжээ чухал хувь нэмрээ оруулна гэдэгт итгэлтэй байна" гэж тэмдэглэн хэллээ.

    ​Хоёр орны холбогдох яам, албаныхан барилгын салбарт явуулж буй бодлого, хөгжлийн өнөөгийн байдал, ирээдүйн боломжийг танилцуулж, аж ахуйн нэгжүүд өөрийн төсөл, хамтран ажиллах, хөрөнгө оруулах боломжтой ажил, хөтөлбөрүүдээ харилцан танилцууллаа. 
   ​
    Чуулга уулзалтын хүрээнд ТББ болон 8 компанийн хөрөнгө оруулалт, хамтын ажиллагааны гэрээнд талууд гарын үсэг зурлаа. Хятадын Boise home technology (Beijing) компани нь тансаг зэрэглэлийн угсармал модон барилгын дулаалга хийхэд зориулан "Монгол Базальт" ХК-иас 1,5 сая долларын эрдэс чулуун хөвөн худалдан авах гэрээнд гарын үсэг зурсан нь олон улсын чанар стандартын шаардлага хангасан бүтээгдэхүүнээр Монгол орны экспортыг нэмэгдүүлсэн бодит алхам боллоо.

Монгол Улсын БХБЯ-ны сайд Г.Мөнхбаяр

Хятадын Орон сууц хот хөдөөгийн бүтээн байгуулалтын яамны Төлөвлөгөө, эдийн засаг, гадаад харилцааны газрын орлогч дарга Ли Липин
 

Барилга Эм Эн ХХК-ийн захирал Г.Батсүх