Их Британийн ногоон эрчим хүчний “Ecotricity” компаниас Английн Строуд хотноо байгуулах гэж буй ногоон технологийн төвийг танилцууллаа. “Zaha Hadid Architects”-ийн загварыг нь гаргасан “Gateway to Stroud” нэртэй уг байгууламж нь хэд хэдэн ногоон барилга бүрдэх юм. Хамгийн чухал хэсэг болох “Forest Green Rovers” хөлбөмбөгийн стадионыг хотхоны бусад хэсэгтэй модон гүүрээр холбох аж.

   Спорт, спортын шинжлэх ухаанд зориулагдсан уг цогцолбор Эко хүрээлэн нь байгаль орчинд ээлтэй олон нийтийн арга хэмжээ явуулдаг, иргэдийн чөлөөт цагийг үр дүнтэй өнгөрүүлэх эрүүл идэвхтэй үйл ажиллагааг өргөн хүрээнд зохион байгуулдаг компаниудыг ажлын байраар хангах юм.



   “Эдгээр оффисийн талбайг ногоон бизнес, ногоон технологи нэвтрүүлэгч компаниуд хамтдаа ашиглах юм. Энд дэлхий дахинд хүчтэй өрнөж эхэлсэн технологийн сайжруулалт, бүтээлч үйл ажиллагаа, мөн ногоон үйлдвэрлэлийн хувьслыг хийх болно.” хэмээн “Ecotricity”-ийн вэб сайтад дурджээ.



  Эко хүрээлэнг шилэн фасадаар хүрээлэгдсэн, модон дээвэртэй байгууламжуудаар бүрдүүлж, ерөнхий дизайныг гаргасан байна. Нум хэлбэрийн модон явган гүүр нь 4 эгнээ замтай бөгөөд хотхоны хоёр талыг хооронд нь холбох үүрэгтэй аж.



   “Уг гүүрийн загварт өвөрмөц модон элементүүдийг ашиглан онцгой хэлбэрийг бий болгохыг зорьсон. Энэ нь хотхоны бүхий л байгууламжуудыг хооронд нь холбож, нэгтгэх чухал үүрэгтэй. Энэхүү ногоон технологийн төв нь дэлхийд тэргүүлэх судалгаа, хөгжүүлэлтийг хийхийн төлөө экологийн гаралтай материал болон барилгын арга технологийг дэвшилтэт технологитой уялдуулан нэгтгэх зорилготой” хэмээн “Zaha Hadid Architects”-ийн төлөөлөгч тайлбарлажээ.