150 метр урт шилэн гүүртэй болно

150 метр урт шилэн гүүртэй болно
  Архангай аймгийн Чулуутын хавцал дээгүүр 150 метр урттай шилэн гүүр барих ажил эхэлжээ. Одоогоор гүүрийн ажил 10 орчим хувьтай байгаа бөгөөд улсын баяр наадмаас өмнө ашиглалтад оруулахаар төлөвлөөд байгаа аж.

   “Хүслийн Тур” хэмээх энэхүү шилэн парк нь жуучлалын шилэн комплекс эко цогцолбор бөгөөд шилэн гүүрэн дээгүүр жуулчид хоёр цаг орчим алхахдаа хажуугийн шатаар доош бууж, байгалийн өвөрмөц тогтоц бүхий хавцалтай илүү ойроос танилцахын зэрэгцээ төөрдөг толин байшингаар зочлон, агаарын гулсуур, агаарын дугуй, мотоциклын шоу үзүүлбэрийг сонирхох боломжтой гэнэ.

Мөн хавцлын хоёр талаар энгийн болон дээд зэрэглэлийн хоёр төрлийн жуулчны бааз байгуулж, өөр өөр өнгө, загвар бүхий шилээр бүтээсэн 20 гэр, 10 монгол гэрт жуулчид хүлээн авахаас гадна ресторан, буфет ажиллуулахаар төлөвлөөд байгаа аж. Түүнчлэн 10 хийлдэг гэр, хавцлын дээрээс буудаг усан гулгуур, хавцлыг дээрээс нь харах болон зураг авахуулах зориулалттай 215 м2 бүхий шилэн тавцан, голын хавцлыг холбосон тороосон замтай дугуй, өндгөн хэлбэртэй дэлгүүр, 250 авто машины зогсоол, голын баруун эрэг дээр 500 авто машины зогсоол, хүүхдийн хийлдэг тоглоом, үзвэрийн тайз, задгай кино театр, жуулчдыг голын дагуу аялуулах зорилготой усан завь зэргийг төлөвлөөд байгаа юм байна.

Тус гүүр баригдвал дэлхийн дөрөв дэх шилэн гүүр болох юм. Гүүрийн өртөг нь 2.2 тэрбум төгрөг аж. Энэхүү бүтээн байгуулалттай холбогдуулан гадаад, дотоодын хөрөнгө оруулагчдын хамтран ажиллахыг урьж байгаа гэнэ.

 

Холбоотой мэдээ