"Барилга.МН" сэтгүүлийн 4-р сарын дугаар худалдаанд гарлаа

"Барилга.МН" сэтгүүлийн 4-р сарын дугаар худалдаанд гарлаа
   Өрөх, хийцлэх, хадах, цутгах гээд нөр их завгүй бүтээн байгуулалтын салбарынхандаа зориулсан “Барилга.МН” сэтгүүлийн дөрөвдүгээр сарын дугаар худалдаанд гарлаа.

   Цас ханзарч, цаг наашилсан хаврын урин энэ үеийг Монгол инженерүүдийн ур ухаан орсон зөвлөгөө, мэдээллээр баялаг шинэ дугаараа угтаж байна. Термоблокон болон СИП хийцийн амины орон сууцны нарийвчилсан төсөв, тооцоолол, өрхийн хэрэгцээнд сэргээгдэх эрчим хүчийг ашиглах зөвлөмж, ахуйн бохир усыг цэвэрлэх боломж, АОС-нд хамгийн тохиромжтой халаалтын шийдлүүдийн талаарх мэдээлэл, олон өнцөг булантай барилга төлөвлөх нь зөв, эсэх гэх зэрэг зөвлөгөө, мэдээллээр баяжмал таны гар дээр очиж байна.



   
   Барилга.МН сэтгүүлийн зүгээс сошиал сүлжээнд албан ёсоор “Асуудал дагуулсан орон сууцыг таны мэдээллийн мөрөөр мөшгөж, шийдвэр гаргагч нарт хүргэн, бэрхшээлийг тань шийдвэрлэхэд хөшүүрэг болох болно” хэмээн мэдэгдээд байсан. Үүнийхээ дагуу “БАРИЛГЫН БИЗНЕС ХЯЛБАР ХООЛ БИШ” гарчиг дор "Да хүрээ" хотхон иргэдийн эрх ашгийг ноцтойгоор зөрчиж байгаа тухай нийтлэлийг хүргэж байна.
 
"...“4000 айлын орон сууц” төсөлд хамрагдаж байртай болсондоо үгээ хэлж, үсээ зулгаах нь холгүй харамссан иргэд бас байна. Мөөгөнцөр, хорхой шавжиндаа баригдсан, хана, цонхноосоо нэвт сийгсэн, улмаар мөстөж, өгөршсөн, гадна доторгүй хагарч, цуурсан, бороо ормогц дээврээс нь дусаал гоождог, нүдээр харахад хэв гажилтад орсон, бүтээцийн шийдэл гэж зүйл огт байхгүй, хөрсний судалгаа гэж бүр ч хийгдээгүй “Да хүрээ” хэмээх хотхон Шар хадны Техникийн захын зүүн талд байрлаж байна. Миний санахад манай хуучны соц үеийн 70, 80 жил болсон барилга хүртэл энэ хиртэй байхыг огт үзсэнгүй. Тус орон сууц нь 76 болон 24 айлын 3, 4 давхар 2 блок бөгөөд 2012 онд бүрэн баригдаж дуусчээ. Жам нь бол ёстой л будаг нь ханхалсан шинэ орон сууц билээ.

Асуудлыг бүр эхнээс нь авч үзье.........."
 
 
Сэтгүүлийн II улирлын захиалга орон даяар явагдаж байна.

   Харин энэ сарын дугаарын онцлох ярилцагчаар МҮХАҮТ-ын Ерөнхийлөгч Б.Лхагважав гуайг байлаа. Б.Лхагважав гуай бол хувиараа бизнес эрхлэгчдийн дэмжигч, тэднийг төрд холбогч, туслалцаа үзүүлэхийн төлөө мэрийн ажилладаг эрхэм юм. Тэрээр барилгын салбарынхантай маш ойр, тулж ажилладаг бөгөөд “газрыг чөлөөтэй олгож, бүтээн байгуулалт хийлгэх хэрэгтэй” гэсэн байр суурин дээр хатуу зогсдог, үүнийхээ төлөө хувийн хэвшлийнхэнд ямар заавар, зөвлөмж өгсөн тухай уншаарай.
 
-Барилгын салбарын гол алдаа нь барилгачин хүнээр бизнес хийлгэсэнд байгаа юм. Барилгачин нь барилгаа барьж, борлуулагч нь борлуулалтаа хариуцах ёстой менежмент нь алдагдсан.
-Банкны хадгаламжаас хүү авах гээд байгаа цаад санаа нь мөнгөний урсгалыг хөрөнгийн бирж рүү чиглүүлэх зорилготой.
-Энэ салбарын санхүүгийн байдлыг жаахан нарийвчлаад задлахаар гол асуудал нь өндөр үнэтэй олдсон газарт байсныг харж болно. Барилгын компаниудын албан тушаалтан, түшмэдэд өгдөг хээл хахуулийн олон зуун сая долларыг санхүүдээ хуваарилж шингээх нь толгойн өвчин.
 
   
   “Нэг сэдвээр”
– Барилга, байгууламжийн барилгын ажлыг эхлүүлэх, үргэлжлүүлэх зөвшөөрөл авахад бүрдүүлэх материалыг Инфограпик хэлбэрээр бэлтгэлээ.


   
   Ипотекийн зээл тань гарахгүй, таны толгойг өвтгөж суугаа бол “Банк татгалзвал өөр ямар аргаар байртай болох вэ” мэдээллийг сонирхоорой. Танд тус болно гэдэгт итгэж байна.
 
   Ландшафтын хамгийн гоёмсог чимэглэл, дээд зэргийн тав тухын илэрхийлэл болсон усан санг хашаандаа өөрсдөө, хялбар аргаар хэрхэн барих тухай арга технологийг багтаажээ.
 


Ийнхүү таны ширээний сэтгүүл “Барилга.МН” ар араасаа хөврөн уншигдах, шимтэй мэдээллээр дүүрэн ахин нэг дугаарыг хүргэж байна.
 
 

Холбоотой мэдээ