Барилгын макетийг хэрхэн хийх вэ

Барилгын макетийг хэрхэн хийх вэ
        Байр худалдан авах гэж барилгын үзэсгэлэнгээр явж байхдаа эсвэл барилгын компаниудын борлуулах албаар ороод гарахдаа та барилгын жижиглэсэн загвар буюу макетийг олонтаа харж байсан биз ээ. Харахад хүүхдийн тоглоом шиг сонирхол татам тэр макетуудыг яаж хийдгийг сонирхож бодож байсан байх. Тэгвэл макет үйлдвэрлээд удаж байгаа “Монгол Макет” үйлдвэрийн хамт олон та бүхэнд макетны талаар, ямар шат дарааллаар яаж үйлдвэрлэгддэгийг дэлгэрэнгүй тайлбарласан сонирхолтой мэдээллийг хүргэж байна.



Макет гэж юу вэ? Ямар зориулалттай, яаж хийдэг, хэнд зориулж хэн хийдэг гээд барилгын макетны талаар ерөнхий ойлголт өгөх зорилготой энэхүү мэдээллийг бэлдлээ.
 
  • Барилгын макет гэж юу вэ?
Макет гэдэг нь “Үлгэрчилсэн загвар” гэсэн үг юм. Зөвхөн барилга гэлтгүй, ямар ч зүйлд макет хийх шаардлага гарч болдог бөгөөд бодит хэмжээнээс нь тодорхой харьцаагаар томсгож бас жижиглэж эсвэл яг байгаагаар нь ч хийж болдог. Бид хүнийг яг дуурайж хийсэн лаан тосон баримал гэж мэднэ шүү дээ. Тэр бол лаагаар хийсэн хүний макет юм. Харин барилгын макетийг мэдээж багасгаж хийнэ. Харьцаа буюу масштаб нь ихэвчлэн 1:10-аас 1:200 байдаг. Харийн ерөнхий төлөвлөлтийн буюу хот тосгоны макетийг мэдээж илүү багаар 1:1000 мэтчилэн масштабаар хийх нь элбэг. 


Барилгын макетийг төрлөөр нь Интерьерийн, Ерөнхий төлөвлөгөөний, барилгын макет гэж ангилж болох ба зориулалтаар нь Реалистик, Обьем харуулсан, Процесс харуулсан гэж хэд хэдэн янзаар нэрлэж болох юм. Архитекурын сургуулийн оюутнуудын хийдэг хамгийн энгийн, обьем харуулсан макетийг хүртэл “Стади макет” гэж өөрөөр нэрлэх нь бий. Обьем харуулсан макет нь барилгын ерөнхий овор, хэлбэрийг харуулах зорилготой тул өнгө үзэмж чухалчилдаггүй байхад харийн реалистик макетийг аль болох бодит байдалтай төстэй харагдуулахыг зорьдог.



Та бүхний харж байсан барилгын борлуулалтын байрууд дээр байршуулсан макетууд бол “реалистик макет” юм. Голчлон худалдан авагч нарт зориулж хийгдсэн байдаг тул энгийн хүнд ойлгомжтой мэдээлэл өгөх зориулалттай юм. Тэгвэл процесс харуулсан макет нь аливаа үйлдвэр үйлчилгээний байгууллагын үйл ажиллагааны процессийг харуулдаг. Тухайлбал, Ундааны үйлдвэр ундаа үйлдвэрлэж байгаа процессоо, автомат урсдаг замаар ундааны шилнүүд хэрхэн дамжин өнгөрч гоожуурын хэсэгт очоод дараа нь савлагдаж ачихад бэлэн болж байгааг харуулсан макет хүссэн байж болно шүү дээ. Тэгвэл энэ бүх процедурыг харуулсан хөдөлдөг макетийг макет үйлдвэрлэгчдэд гардаг. Бүх процессийг яг жинхэнэ юм шиг жижигсгэж харуулах боломжгүй хэдий ч аль болох төсөөтэй харуулахыг зорино. Мэдээж ийм хөдөлгөөнт макет хийхэд төвөгшил өндөртэйгөөс гадна цаг хугацаа илүү шаардах нь тодорхой, үнийн хувьд ч харьцангуй өндөр гардаг. 

  • Материал сонголт
Макетийг заавал тийм ийм материалаар хийнэ гэсэн заалт байхгүй. Ямар макет, хэнд зориулж, ямар нөхцөлд хийхээс шалтгаалж ямар ч материалаар хийж болно. Үүнд: хуванцар, цаас, шил, мод, металл, даавуу, гипс, шавар, замаск гээд олон материал багтах бөгөөд материалын хязгаар байхгүй. Харин бидний хувьд захиалагчдад зориулж реалистик макет ихэвчлэн үйлдвэрлэдэг тул Акрил, ABS хавтан, Хуванцар слайд, Цаас, PVC зэрэг материалуудыг голчлон хэрэглэнэ. Орчны тохижилт харуулсан мод бут, зам талбай бүхий хэсгийг макетны суурь гэх бөгөөд суурийн ажилд түлхүү цаанаас үйлдвэрлэгдсэн зориулалтын материал ашигладаг. Зүлгэнд зүлэгний материал, модонд маштабанд нь таарсан мод навчны материал ашиглана. Реалистик макетанд замын бордюьр, гудамжны гэрэл, авто машин, гудамжны сандал, саравч гээд тохижилтын бүх л хэрэгслүүдэд бэлэн модель ашиглана. Мэдээж хүний модельгүйгээр барилгын оврын харьцаа ойлгомжтой сайн харагдахгүй шүү дээ.
 
  • Үйлдвэрлэлийн шат дараалал


Юун түрүүнд эх бэлтгэл хийгдэнэ. Барилгын ханануудын дэлгээс, суурийн эх бэлтгэл хийгдэнэ. Дараа нь сонгосон материалаа зүсвэрт оруулан барилгын хана, цонх хаалганы нүхнүүд болон ханан дээрх зарим хэлбэрүүд хийгдэнэ. Зүсвэрээс гарсан ханануудыг угсарч наах ба дараа нь будах ажилбарт оруулна. Барилгын өнгө загвараас шалтгаалж хэдэн ч удаа давхарлан будах шаардлага гарч болно. Дараа нь цонхны арамыг шилтэй нь барилгадаа суурилуулаад гэрэлтүүлэг цахилгаан монтажны ажилд орно. Бэлэн болсон барилгаа суурин дээрээ суурилуулан нэр гарчгийг тавин захиалагчид хүлээлгэн өгөхөд бэлэн болно.
 
  • Арчилгаа хадгалалт
Макетийг арчилж хадгалахад тийм их хүндрэлтэй биш. Доорх хэдэн зөвлөмжүүдийг анхаарахад л болох юм.
  1. Хэт халалт. Макетанд Материал сонголт, хийх аргачлал зэргээс шалтгаалан олон төрлийн цавуу хольж хэрэглэх шаардлага гардаг. Зарим цавуу хэт халаалтанд тэсвэр муутай байдаг тул нарны шууд тусгалын хэт халалтаас зөөлөрч макет хэлбэрээ алдах магадлал их бий. Тиймээс нарны шууд тусгалаас хол байршуулах нь тохиромжтой.
  2. Чийг. Хэт чийгтэй орчинд макет хадгалах тохиолдол төдийлөн гардаггүй ч онцгой тохиолдолд захиалагч макет үйлдвэрлэгчдэд анхнаас нь тусгайлан чийгэнд тэсвэртэй материалуудаар макетаа хийх нь зүйтэй.
  3. Тоос. Макетан дээр тогтсон тоосыг үлээлгэж цэвэрлэх нь хамгийн тохиромжтой, бас зөөлөн болгоомжтой арчиж, цэвэрлэж болдог.
  4. Цахилгаан монтаж. Ихэнх макетанд барилгын гэрэлтүүлэг болон тохижилтын гэрэл хийгддэг ба эдгээр гэрлүүд нь бидний гэртээ хэрэглэдэг энгийн гэрлүүдтэй адил ашиглалтын хугацаатай байдаг. Тиймээс макетныхаа гэрлийг зөвхөн үзүүлэнгийн шаардлагатай үед л асааж бусад үед унтрааж байх нь ашиглалтын хугацааг хэмнэх болно.
Та бүхэнд барилгын макетны талаар товчхон боловч тодорхой мэдээллийг энгийнээр тайлбарлахыг хичээлээ. Макетны талаар өөрт хэрэгтэй ойлголтоо авсан гэж найдаж байна.

 
Эх сурвалж: “Монгол Макет” үйлдвэр, 91923624 96916000 
Эх сурвалж: Барилга.мн

Сэтгэгдэл (2)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

    Ganaa 2017-04-03 22:40 59.153.115.37

    goyo maket hiideg yum bna. utsaa avahgui yumaa
    С.Баярмаа 2017-04-05 14:31 112.72.15.202

    Монгол макет фб пэйж хуудсаар нь холбогдоорой. мессеж дрэ бнга хариу өгөөд бж бдаг