Урин дулаан хаврын улирал айсуй энэ үед барилгын ажил эрчимжиж эхлэхтэй холбогдуулан сэтгүүлийн шинэ дугаартаа барилгын материалын үнэ ханшийн мэдээллийг уламжлал ёсоор шинэчлэн хүргэж байна. Мөн байр авахаар төлөвлөж буй иргэддээ зориулан шинэ орон сууцны үнийн мэдээллийг дэлгэрэнгүй гаргалаа. Эндээс иргэд өөрийн хүссэн байршилдаа, төлөвлөсөн үнээрээ ямар байр авч болохыг харьцуулан харж сонголтоо хийх боломжтой билээ.

   Түүнчлэн хямрал нүүрлээд буй барилгын зах зээлд хэрхэн “бай”-гаа зөв оносон маркетинг, борлуулалтын бодлого явуулж, бага зардлаар ихийг сурталчилж болох талаарх сонирхолтой ярилцлагыг уншаарай. Эндээс та өөрийн зорилтот хэрэглэгчиддээ зориулсан сурталчилгааг аль сувгаар, хэрхэн хүргэвэл үр дүнтэй байдаг талаар мэдэж болно.



   Мөн энэ дугаарт барилгын салбарт нэлээд маргаан дагуулдаг магадлалын ажлын талаарх МБИХ-ны УЗ-ийн гишүүн, Дэд ерөнхийлөгч Г.Тулгын нийтлэлийг хүргэж байна. Танд ч бас барилга байгууламжийнхаа зураг төслийн баримт бичигт магадлал хийлгэх гэж экспертүүдийн хүнд суртлын ард гарах хүндхэн асуудал тулгарч л байсан байх. Тэгвэл тантай зовлон нэг мэргэжлийн хүний дэвшүүлсэн санааг энэ нийтлэлээс сонирхоорой.


 
   “Хөргөлт сервис” ХХК-ийн Гүйцэтгэх захирал, Хувь хүний хөгжлийн Сургагч Б.Золбадралтай ярилцсан барилгын салбарын зах зээл, хүний нөөцийн бодлого, өнөөгийн зах зээлийн онцлогийн талаарх яриаг сэтгүүлийн дугаарын зочны булангаас уншаарай. Байнга шинийг эрэлхийлж, аз туршин амжилтаа ахиулж байдаг залуухан манлайлагчийн сонирхолтой үзэл бодол танд ч бас нэгийг бодогдуулна гэдэгт итгэлтэй байна. 



   Барилгын нураалтаас үүсэх хог хаягдлаас бетоны дүүргэгч материал гарган авч, хэрэглэж буй олон улсын туршлага, стандартын талаарх мэдээллээс өөрийн оронд энэ технологийг ашиглах боломжтой эсэх талаар мэдэх боломжтой.

   Дэлхийн 60 гаруй орноор аялсан Япон аялагчийн оюуны дуранд буусан Монголын архитектур, хот төлөвлөлтийн талаарх сэтгэгдэл юуг өгүүлэх бол... Японы Нара хотын захиргааны Хот төлөвлөлтийн газрын дарга, Түүхийн дурсгалт барилгыг хамгаалах, сэргээн засварлах Нийгэмлэгийн Тэргүүн Ивай Ичирогийн аяллын сонирхолтой тэмдэглэлийг зөвхөн “Барилга.МН”-ээс унших боломжтой шүү.



   Хуй салхи, хар шуурганд тэсвэртэй, дулаан хадгалалт, агаар сэлгэлт сайтай гээд Монгол гэрийн давуу тал, онцлог шинж чанарыг нь ажиглаж, туршиж мэдсэн Америкчууд 1969 оноос барьж эхэлсэн дугуй хэлбэрт амины орон сууцны талаарх мэдээллийг мөн хүргэж байна. Монголдоо уран санаагаа уралдуулж, хэрхэн байгальд ээлтэй, дулаан тусгаарлах чадвар сайтай, бат бөх сууцтай болох талаар зөвлөмжийг шинэ дугаараас аваарай.