“ГАН ГҮҮР” тэмцээний зохион байгуулагчид “Барилга.МН”-д Талархал гардууллаа
Монгол улсын их дээд сургуулиудын барилга, авто зам, гүүрийн инженерийн чиглэлээр суралцаж буй оюутнуудын дунд “ГАН ГҮҮР” анхдугаар тэмцээн 2017 оны хоёрдугаар сарын 10-11-ний өдрүүдэд амжилттай зохион байгуулагдлаа.
ШУТИС-ийн Барилга Архитектурын сургуулийн Барилгын инженерийн салбараас санаачлан, МҮИС-ийн Барилгын Инженерийн сургуультай хамтран энэхүү тэмцээнийг зохион явуулсан юм. Нийт 13 баг оролцсоноос ур чадвар, багийн ажиллагаа, авхаалж, мэдлэгээрээ мэргэжил нэгт бусад баг, сургуулиудыг манлайлан оролцсон ШУТИС-ийн “Аравт” баг тэргүүлж, Азийн “Ган гүүр” тэмцээнд оролцох эрхийг гардаж, тэмцээний ивээн тэтгэгч байгууллагуудын нэг “Барилга.МН” сэтгүүлийн нэрийн шагналыг хүртжээ. Мөн удаах байранд МҮИС-ийн “Creative guys” баг шалгарлаа.
Тэмцээний бусад ивээн тэтгэгчдээр “Nomin Construction Development Group”, “Тэдмэнт”, “Барилга Байгууламж”, “Химон констракшн”, “Rich construction”, “UBO” ХХК зэрэг байгууллагууд хамтран ажилласан байна.
“ГАН ГҮҮР” тэмцээний гол зорилго нь,
- Дээрх чиглэлүүдээр суралцаж буй оюутнуудын онолын мэдлэгийг практикт хэрэгжүүлэх чадварыг хөгжүүлэх. Үүнд:
- Инженерийн байгууламжийн загварыг гаргах, төсөллөх, эд ангиудыг өөрийн гараар бэлтгэн угсрах, турших замаар олон талт чадварыг олж авч, туршлага хуримтлуулах
- Инженерийн байгууламжид тавигдах шаардлага, материалын шинж чанар, бэлтгэх, угсрах процесс, аюулгүй ажиллагаа, гоо зүй, өртгийн талаар ойлголттой болох
- Бүтээлчээр сэтгэх
- Мэргэжлийн өндөр ур чадвар, ёс зүйд тэмүүлэх ирээдүйн инженерүүдийг бэлтгэх
- Азийн Ган гүүр тэмцээнд Монгол улсаас оролцох багийг шалгаруулах явдал юм.
ШУТИС-ийн БАСургуулийн захирал Э.Нинжгарав (Ph.D дэд профессор): Энэ тэмцээнийг маш олон хүний хамтын хүч хөдөлмөрөөр зохион байгуулсан. Барилга Архитектурын сургууль маань энэхүү тэмцээнийг санаачлахын зэрэгцээ маш олон Барилгын Инженерийн сургууль, тэр дундаа Барилга Архитектурын сургууль нэлээд олон санаачилга гарган ажиллаж, олон компани тус тэмцээний шагналын санг бүрдүүлэхэд дэмжлэг үзүүллээ. Мөн ШУТИС, БАСургууль нь сургалтандаа төсөвлөсөн зардлаасаа тодорхой хувь нэмэр оруулсан. Түүнчлэн МҮИС-ийн БАС-ийн захирал Р.Эрдэнэболд тэмцээний зохион байгуулалтанд чухал үүрэг гүйцэтгэснийг энд дурдах нь зүйтэй.
Өнөөгийн өрсөлдөөнт нийгэм цаг үед сургууль, хувийн компаниуд хүчээ нэгтгэн, тэмцээнийг амжилттай зохион байгуулж чадсанд маш их баяртай байна. Тэмцээний талаарх мэдээллийг олон нийтэд хүргэж, дэмжин идэвхтэй ажилласан “Барилга.МН” сэтгүүл, сайтын хамт олонд талархлаа илэрхийлье.
Иймд хамтран ажиллагч байгууллагуудын төлөөлөл болсон “Барилга.МН” сэтгүүлийн хамт олонд, манай сургуулиас санаачлан явуулсан “Ган Гүүр” улсын анхдугаар тэмцээнийг зохион байгуулах, бүтээлийн туршилт явуулах багийг шалгаруулах ажилд идэвх, зүтгэлтэй оролцож, мөнгөн хандив өргөсөн танай байгууллагын хамт олонд талархал илэрхийлж, ажил амьдралын сайн сайхан бүхнийг хүсэн ерөөхийн хамт бидний цаашдын хамтын ажиллагаа улам бэхжинэ гэдэгт итгэлтэй байгаагаа илэрхийлж, талархал гардуулж байна.