Өнгөрөгч оны 10 дугаар сард шинэчлэн баталсан Орон сууцны ипотекийн зээлийн шинэчилсэн журмын дагуу өнөөдөр Монголбанк болон арилжааны банкны төлөөлөл хамтарсан гэрээ байгуулан, гарын үсэг зурлаа. Хамтарсан гэрээг байгуулснаар цаашид орон сууцны ипотекийн зээл тогтвортой үргэлжлэх боломж бүрдэж байгаа юм.

   Одоогоор ипотекийн зээлийн эргэн төлөлтөөр зээлийг санхүүжүүлж байгаа бөгөөд сар тутам 25-30 тэрбум төгрөгийн зээл шинээр олгож байгаа гэсэн тооцоог гаргажээ. Өөрөөр хэлбэл, өнгөрөгч оны 10 дугаар сараас хойш нийт 118 тэрбум төгрөгийн зээлийг иргэдэд олгосон байна.

   Дээрх хамтарсан гэрээг байгуулсан нь найман хувийн зээлд найдаж орон сууцны төсөл хэрэгжүүлсэн ч борлуулж чадалгүй зах зээл дээр илүүдэл үүсгэж, санхүүгийн хүндхэн нөхцөлд орсон барилгын компаниудаа дэмжихэд ахиц гарна гэдэгт найдаж буйгаа арилжааны банкуудын төлөөлөл мэдэгдэж буй. Арилжааны банкууд дээр зээлийн хүсэлт нь батлагдсан ч санхүүжилтгүйн улмаас олгож чадаагүй зээлүүд хүлээгдсээр байгаа аж.

   Ипотекийн зээлийг эргэн төлж буй хэмжээгээр санхүүжилт хийгдэж байгаа буюу арилжааны банкуудад сард 20 тэрбум төгрөгийн санхүүжилт олгож байгаа юм.

   Цаашид зарагдаагүй үлдсэн шинэ орон сууцнуудыг борлуулах, иргэдийг орон сууцаар хангахын тулд найман хувийн зээлийн санхүүжилтийг нэмэгдүүлэх тал дээр засгийн газар, Монголбанкнаас судалгаа хийхээр төлөвлөжээ.