Улаанбаатар хотын агаарын бохирдол Дэлхийн эрүүл мэндийн байгууллагаас тогтоосон аюултай хэмжээнээс дөрөв дахин их байна. Энэ аравдугаар сарын байдлаар гэхэд Улаанбаатар хот агаарын бохирдлоороо дэлхийд НЭГДҮГЭЭРТ бичигдсэн. Харин хоёрдугаарт, БНХАУ-ын Ченду муж, гуравдугаарт Энэтхэгийн Колката, дөрөвдүгээрт тус улсын Мумбай, тавд Вьетнам улсын Ханой муж бичигдсэнийг http://www.airvisual.com /-д бичжээ. Гэтэл Х сард Улаанбаатар хотын утаа эхлээгүй байв.

БОАЖЯ, нийслэлийн ЗДТГ хамтран зохион байгуулж буй “Агаарын бохирдлыг бууруулах технологийн үзэсгэлэн” өнөөдрөөр дуусч байна. Үзэсгэлэнд 51 аж ахуйн нэгж байгууллага  төрөл бүрийн цахилгаан, хийн болон  усан халаагуур, зуух, боловсруулсан шахмал түлш, агаар цэвэршүүлэгч, автомашинаас гарах утааг багасгагч шингэн, дулаан алдалт багатай нано технологийн  барилгын материал, утаанаас хамгаалах амны хаалт зэрэг бүтээгдэхүүнээ танилцуулж байна.

Цахилгаан халаагуурын тухайд 1.7-4.5 сая төгрөгийн үнэтэй худалдаалагдаж байгаа бол жирийн халаагуурын үнэ халаах талбайн хэмжээ, цахилгаан зарцуулалтаас шалтгаалаад 49 мянган төгрөгөөс дээш үнэтэй байна.   
 
БОАЖЯ-наас Монголын банкнуудын холбоотой хамтран гэрийн цахилгаан халаагуур болон шөнийн тарифт тоолуурыг лизингээр авах боломжийг бүрдүүлэхээр ажиллаж байна хэмээн мэдэгдэв.