Нийслэлийн гэр хорооллын айл өрхийн шөнийн цахилгааны төлбөрийг тэглэх тогтоолыг энэ сарын нэгнээс эхлэн мөрдөж эхэллээ. Мэдээж уг хөтөлбөр хэрэгжиж эхэлснээр хотын утаа эрс багасахгүй, мэдрэгдэхүйц өөрчлөлт ч мэдрэгдэхгүй л болов уу.

Хоёр асуулт байна?

Нэгд, Уг тогтоолыг хэрэгжүүлэхэд багагүй хөрөнгө мөнгө шаардагдлагатай. Эдийн засгийн хямралтай энэ үед тэрхүү их хэмжээний санхүүжилтийг хаанаас, хэрхэн шийдвэрлэх талаар гайхаж сууна.

Энэ тухайд тус ажлыг гол хариуцсан хүн нь буюу Эрчим хүчний зохицуулах хорооны дарга А.Тлейхан, "Эрчим хүчний салбарын нуруун дээр нийтдээ 25-27 тэрбум төгрөгийн нэмэгдэл зардал ирэх урьдчилсан тооцоотой байна." хэмээн мэдэгдлээ. 



Дараагийн асуулт,

Санхүүжилтийн эх үүсвэрийг нэгэнтээ шийдвэрлэчихсэн бол уг хөтөлбөрт бодит хөрсөн дээр хэрэгжихэд холбоо харилцаа, уялдаа гэдэг зүйл бий юу?

Уул шугамдаа хөтөлбөртэйгөө уялдуулан цахилгаан халаах тоног, төхөөрөмж оруулж ирдэг хувь хүн, аж ахуйн нэгжүүдийг дэмжин, банк, санхүүгийн байгууллагуудтай хамтран зээлээр авах бололцоог нээж өгөх шаардлагатай баймаар.

         Бээжин, Лондон, Сөүл зэрэг дэлхийн томоохон хотууд иргэдээ сууцжуулах, халаалтыг цахилгаан, утаагүй түлш, сэргээгдэх эрчим хүч, хийн түлшээр агаарын бохирдлоо шийдвэрлэсэн байдаг. Эдгээр улс орон нэг шийдвэр гаргачихаад тэрийг нь иргэд нь дагаж мөрдөхийг хүлээж суудаггүй. Батлахаасаа урьтаж, холбогдох асуудлуудыг нарийвчлан судалж, дэмжихэд бүрэн анхаарлаа хандуулж, хэрэгжих бүхий л бололцоогоор хангадаг.

     Төр засгаас шаардлагатай гол шийдвэрийг нь батлаад өгчихлөө, одоо холбогдох агентлаг, газрууд нь дээрх асуудлыг шийдвэрлэж, хүйтний улирал дуусахаас өмнө даруй хэрэгжүүлэх шаардлага урган гарч байна.