Төрийн зарим чиг үүргийг МАЭ-д шилжүүлэх гэрээнд гарын үсэг зурлаа
Төрөөс үзүүлж байгаа үйлчилгээний чанар хүртээмжийг дээшлүүлэх, төрийн болон төрийн захиргааны байгууллагын үйл ажиллагаанд дэмжлэг үзүүлэх, салбарын боловсон хүчнийг чадавхжуулах, архитекторуудыг мэргэшүүлэх зорилгоор "Архитектур, хот төлөвлөлтийн мэргэжлийн орон тооны бус зөвлөл", мөн "Архитектор, хот төлөвлөлтийн мэргэжилтнийг давтан сургах, мэргэшүүлэх, мэргэшлийн зэрэг олгох сургалтын чиг үүргийг БХБ-ын Сайдын тушаалын дагуу мэргэжлийн байгууллага Монголын Архитекторуудын Эвлэлд гэрээгээр шилжүүлэн өгч байна.
Мэргэжлийн байгууллага энэхүү чиг үүргийг гүйцэтгэснээр:
- Архитектур, хот төлөвлөлтийн мэргэжлийн зөвлөлийн хараат бус, бие даасан, тууштай, хариуцлагатай байдлыг хангах,
- Салбарын эрдэмтэд, зөвлөхүүд, мэргэшсэн архитекторуудаас бүрдсэн БХБСайдын тушаалаар батлагдсан бүрэлдэхүүнээр барилгын салбарын зураг төсөл, архитектур төлөвлөлт, хийц бүтээц, техник технологи, төсөв үнэ бүрдэл, норм дүрэм, стандарт, ТЭЗҮ, ерөнхий болон хэсэгчилсэн ерөнхий төлөвлөгөө, хот суурины төлөвлөлтийг хэлэлцэн мэргэжлийн өндөр түвшинд зөвлөмж гаргах,
- Төрийн болон төрийн захиргааны байгууллагын үйл ажиллагаанд дэмжлэг үзүүлэх юм.
Үүний үр дүнд:
- Барилга, хот байгуулалтын салбарын Зураг төсөл, бодлого чиглэлд гарч буй алдаа, нийгэмд хот байгуулалтын асуудал үүсгэсэн мэргэжлийн бус шийдвэрүүд, төлөвлөлтүүд гарч, хэрэгждэг байдал зогсох, мэргэжлийнхэн ёс зүйг эрхэмлэсэн, ШУ технологийн дэвшлийг нэвтрүүлж, хөгжүүлэх ач холбогдолтой.
- Мэргэжлийн өндөр түвшний зөвлөмжийг шийдвэр гаргах бүх түвшинд хэрэгжүүлэх,
- Уг зөвлөлөөр хэлэлцүүлээгүй захиалагч, зураг төслийн байгууллагын үйл ажиллагааны талаар санал гаргах үүрэгтэй,
- Гадаад дотоодын хөрөнгө оруулалт үр ашигтай болох ач холбогдолтой.
Архитектор, хот төлөвлөлтийн мэргэжилтнийг давтан сургах, мэргэшүүлэх бүх шатны сургалтын чиг үүргийг МАЭ гүйцэтгэснээр:
- Архитекторуудын мэргэшлийн сургалт, тасралтгүй мэргэжил дээшлүүлэх сургалтыг олон улсын хэмжээнд батлагдсан хөтөлбөрөөр явуулах, ОУ-ын байгууллагуудтай хамтран зохион байгуулах,
- Мэргэшлийн зэргийг олон улсад хүлээн зөвшөөрүүлэх, мэргэжлийн ёс зүйн олон улсын дүрмийг мөрдүүлэх,
- Архитекторуудын мэргэшлийн сургалтууд олгох зэрэгтэй уялдах, үүний улмаас гүйцэтгэх үүрэг хариуцлага өндөрсөх, чадваржих нөхцөл бүрдэж, ОУ-ын хэмжээний төсөл хөтөлбөрт оролцох боломжтой болох юм.
БХБЯ, МАЭ