Үерээс сэргийлдэг, өргөгддөг байшинг зохион бүтээжээ

Үерээс сэргийлдэг, өргөгддөг байшинг зохион бүтээжээ

   “Larkfleet” группийнхэн үерийн уснаас өөрийгөө хамгаалж, дээш өргөгддөг байшинг зохион бүтээлээ. Үер усны аюул нүүрлэсэн үед уг хөл нь тавхан минутын дотор 72 орчим тонн жинтэй байшинг 1.5 метрийн өндөрт өргөх хүчин чадалтай аж. Одоогоор уг байшин нь сорилт туршилтын түвшинд шалгагдаж байгаа бөгөөд хүлээн зөвшөөрөгдөж чадвал иргэдийн захиалгаар барьж эхлэх гэнэ.

   Зохион бүтээгчдийнх нь мэдэгдэж буйгаар байшин нь механик найман тулгуураар өргөгддөг бөгөөд уламжлалт суурь цутгалгүй, төмрөөр бөгжилсөн модоор шийдсэн байна. Байшин төмөр карказан угсармал байх бөгөөд үүнийг задалж буулгаад, дахин өөр талбайд угсарч босгох боломжтой аж.

   Зөвшөөрлөө авч чадвал “Larkfleet” группийнхэн 2017 онд Их Британийн Линкольншайрт энэхүү байшинг гурван унтлагын өрөөтэйгөөр барихаар шийджээ. Тэдний төсөл амжилттай хэрэгжвэл ирэх таван жилийн хугацаанд тулгуурын систем хэрхэн ажилладгийг нарийн судлахаар төлөвлөөд байгаа юм.



   Их Британийн хүрээлэн буй орчны хүрээлэнгээс анхааруулга өгмөгц байшингийн тулгуурууд өргөгдөж, аюулаас хамгаалдаг байх ёстой аж. Оршин суугчид нь үер, газар хөдлөлтийн гамшиг тохиолдсон үед тулгуур хөлнүүдээр байшингаа дээш өргөж, элдэв аюулаас хамгаалах ба шаардлагатай тохиолдолд дээврийн нарны хавтан болон цахилгаан батарейнаас эрчим хүч, дулааны хэрэглээгээ шийдэх боломжтой. Мөн цэвэр болон бохир усны шугамд уян хоолойгоор холбогдох аж.

   Энэхүү байшинг байгалийн гамшиг их тохиолддог, хөгжил дорой бүс нутгуудад ашиглах нь зүйтэй гэж зохион бүтээгчид нь үзжээ.



   “Larkfleet” группийн Гүйцэтгэх захирал Карл Хик, “Өргөгддөг байшин нь ирээдүйд ихэнх газарт элбэг тохиолддог үер усны аюулаас сэргийлэх, аюулгүй амьдрах гол баталгаа болно. Мөн орон сууцны нийлүүлэлтэд эерэгээр нөлөөлж, орон сууцны хямралыг давахад хувь нэмрээ оруулах болно” хэмээн ярьсан байна.

Холбоотой мэдээ