Монголын архитектур, хот байгуулалтыг хөгжүүлж, дэлхийн архитектурын хөгжил, чиг хандлагатай уран бүтээлээрээ хөл нийлүүлэн алхаж буй архитекторуудаа нэгтгэсэн Монголын Архитекторуудын Эвлэл үүсгэн байгуулагдсаныхаа түүхт 60 жилийн ойн баярын хурлаа өнөөдөр хийлээ.

     БНМАУ-ын Сайд нарын Зөвлөлийн 1956 оны 10 дугаар сарын 23-ны өдрийн 545 дугаар тогтоолын XV дугаар зүйлд “Монголын Урчуудын Эвлэлийн дэргэд барилга ба барилгын урлагчийн бүлгийг байгуулсугай” хэмээн заасныг үндэслэн ууган архитектор Б.Чимэд, Б.Дамбийням, А.Хишигт нарын санаачилгаар 1956 онд Монголын Урчуудын эвлэлийн дэргэд архитектор, инженер, зургийн техникч, урчуудаас бүрдсэн Барилга ба барилгын урлагчийн бүлэг байгуулагджээ. Ингээд тус бүлгийн даргаар Б.Чимэдийг сонгосон цагаас Монголын Архитекторуудын Эвлэл албан ёсоор үйл ажиллагаагаа эхэлсэн түүхтэй аж.

     Тус эвлэл нь гадаад орнууд дахь харилцаа, хамтын ажиллагаагаа өргөжүүлэн, олон улсын мэргэжил нэгтнүүдтэйгээ туршлага, мэдлэг солилцох боломжийг нээж, 1963 онд Олон Улсын Архитекторуудын Холбоо /UIA/, 1991 онд Азийн Архитекторуудын бүсийн зөвлөлийн /ARCASIA/ байгууллагын гишүүнээр тус тус элссэн байна.



     МАЭ нь одоо архитектур, хот байгуулалтын үйл ажиллагаанд оролцогч архитекторууд, инженерүүдийн гишүүнчлэлтэй бөгөөд Улаанбаатар, Дархан, Эрдэнэт, Увс, Баян-Өлгий, Дорнод зэрэг аймгуудад салбартай, мэргэжлийн 9 хороо, салбар зөвлөл, гишүүн байгууллагатай, олон улсад хүлээн зөвшөөрөгдсөн, гишүүд болон нийгэмдээ үйлчилдэг төрийн бус мэргэжлийн байгууллага юм.

    Өдгөө 60 жилийн ойн баяртаа зориулан “Монголын Архитектур-60” үзэсгэлэнг Архитектор ордонд дэлгэн, “Монголын Архитектур”, “Монгол хээ угалзаар орд өргөөг чимэглэхүй” ном болон “Монголын Архитектур” баримтат киноны нээлтийг хийж, ахмад, дунд, залуу үеийн архитекторуудаа оролцуулсан баярын хурлаа ийнхүү зохион байгууллаа.

    Хуралд УИХ-ын дарга М.Энхболд, Барилга, Хот Байгуулалтын Сайд Г.Мөнхбаяр нарын мэндчилгээг дамжуулсан бөгөөд МАЭ-ийн Ерөнхийлөгч Э.Хүрэлбаатар нийт гишүүддээ хандан баярын мэнд хүргэж, байгууллагынхаа үүсэл, хөгжил, өнөөгийн ололт амжилтаа танилцуулсан юм.

     Өнөөдрийн хурлын онцлох үйл явдал нь Төрийн гүйцэтгэж байсан зарим чиг үүргийг МАЭ-ээр гүйцэтгүүлэх шийдвэр гаргаснаа албан ёсоор баталгаажуулж, эрхийг нь олгосон явдал байлаа. Ингэснээр тус байгууллага мэргэшсэн архитекторын сургалт, мэргэшлийн зэрэг олгох, эх загвар зурагт экспертиз магадлал хийх, архитектур хот төлөвлөлтийн мэргэжлийн зөвлөлийг ажиллуулах эрхтэй болж байгаа юм.