УИХ-ын Эдийн засгийн байнгын хорооны хуралдаанаар Монгол Улсын 2017 оны төсөв, мөнгөний бодлогыг хэлэлцэх эсэхийг хэлэлцээд гишүүдийн 100 хувийн саналаар дэмжлээ. Энэ үеэр Монголбанкны еренхийлөгч Н.Баяртсайханы сэтгүүлчдийн асуултад хариулсан тайлбараас ипотекийн зээлтэй холбоотой асуудлыг онцолбол,

   “Өнгөрсөн сард ипотекийн таван хувийн хүүтэй холбоотой асуудлыг цэгцэллээ. Энэ сард найман хувийн хүүтэй холбоотой асуудлыг шийдвэрлэхээр ажиллаж байна. Гэхдээ 2016 оны есдүгээр сарын 12-нд гаргасан УИХ-ын 40 дүгээр тогтоолоор ипотекийн найман хувийн хүүтэй зээлтэй холбоотой асуудлыг хэрхэн шийдвэрлэх вэ гэсэн чиглэлийг нь гаргаж өгөөгүй. Ирээдүйн тэтгэврийн нөөц санг Засгийн газраас аваад Монголбанкинд шилжүүлсүгэй гэсэн тогтоол л гарсан.

    Гэтэл Ирээдүйн тэтгэврийн нөөц санд хөрөнгө, мөнгөний эх үүсвэр байхгүй. Цаашид ипотекийн зээлийг ямар эх үүсвэрээс, хэн хэрэгжүүлэх вэ гэдэг нь тодорхойгүй. Мөн өнөөдрийг хүртэл хэрэгжиж ирсэн ипотекийн зээл, үнэ тогтворжуулах хөтөлбөрийн Барилгын салбарын үнийг тогтворжуулах гэдэг дэд хөтөлбөрийн хүрээнд хийгдэж ирсэн байна.

   Энэ хөтөлбөрийн хугацаа энэ оны нэгдүгээр сард дууссан. Одоо бидэнд бариад ажиллах хууль эрх зүйн үндэслэл байхгүй. Ийм тодорхойгүй нөхцөл байдалтай байна. Өмнө нь ипотекийн зээлд Монголбанк 3.5 их наяд төгрөгийн санхүүжилтийг мөнгө хэвлэж хийж байсан.

   Цаашид үргэлжлүүлээд мөнгө хэвлэх эсэх нь тодорхойгүй. Одоо бидэнд барьж ажиллах юу ч алга. Яг одоо Монголбанкин дээр Барилга хот байгуулалтын яам, Санхүүгийн зохицуулах хороо, Сангийн яам оролцсон ипотекийн зээлийн асуудлаар зөвлөгөөн хийж байгаа. Дараа нь захирлуудын зөвлөлийн хурлаар энэ асуудлыг хэлэлцэнэ” гэжээ.