Барилга, хот байгуулалтын салбарын бодлого, тулгамдаж буй асуудлаар ярилцаж, санал бодлоо чөлөөтэй солилцож, шийдвэрлэх алхмуудыг тодорхойлох, мөн боломжуудыг эрэлхийлэх зорилгоор БХБ-ын сайд Г.Мөнхбаяр салбарын төрийн бус мэргэжлийн байгууллагууд, зураг төсөл, барилга угсралт, барилгын материал үйлдвэрлэгч аж ахуйн нэгж байгууллагуудын удирдлагуудтай уулзалт хийлээ.

     Уулзалтын эхэнд Г.Мөнхбаяр сайд, барилгын салбарыг дэмжих, орон сууцны үнэ тогтворжуулах дэд хөтөлбөр, барилгын материалын үйлдвэрлэл, Түрээсийн орон сууц хөтөлбөрийн хэрэгжилт, “ТОСК” ТӨҮГ-ын үйл ажиллагаа, Ипотекийн зээл, тусгай зөвшөөрөл олголт, барилга хот  байгуулалтын салбарт 2016-2020 оны хооронд хийж хэрэгжүүлэх ажлын талаар танилцуулж, өөрийн санал бодлоо илэрхийлсэн.

     Тэрээр яриандаа, БХБ-ын яаманд мэргэжлийн хүмүүс ховордож, мэргэжилтэй боловсон хүчин үгүйлэгдэж байгаад анхаарал хандуулж, барилгын салбарын мэргэжилтэй, туршлагатай хүмүүсийг зохих албан тушаалд нь томилон ажиллуулж эхэлснийг мэдэгдсэн юм. Одоо тус яаманд мэргэжлийн баг бүрэлдэхүүнээс бүрдсэн 69 хүн ажиллаж байгаа аж.



     Түүний албан үүрэгт хугацаандаа анхаарч ажиллах бас нэг асуудал нь яах аргагүй тусгай зөвшөөрөл ба түүнийг тойрсон асуудлууд мөн гэдгийг онцлоод, цаашид тусгай зөвшөөрөл олгох асуудлыг төрийн бус мэргэжлийн 7 байгууллагын бүрэлдэхүүнтэй тусгай ажлын хэсэг хариуцан ажиллахыг сайд мэдэгдсэн юм. Ердөө хэдхэн сарын өмнө 4500 байсан тусгай зөвшөөрөлтэй компаниудын тоо 1425-аар нэмэгдсэн байсан нь ихээхэн анхаарал татаж буй ноцтой асуудал гэдгийг хэллээ.

     Түүнчлэн улсын төсвийн 1/7 хувийг энэ салбарт хуваарилсны үр дүн өнгөрсөн жилүүдийн хугацаанд огт харагдсангүй, барилгын материал үйлдвэрлэгчид, аж ахуйн нэгжүүдэд дэмжлэг болгон олгосон санхүүжилтийн бодит үр дүн огт харагдахгүй байгааг тэрээр зориуд онцолж байлаа. Энэ байдлыг нягтлаад харвал, шинэхэн байгуулагдсан компаниудын нэрээр багагүй хөрөнгө мөнгө үр ашиггүй зарцуулагдсан гэдгийг хэлсэн юм.

     Хүнс, эрүүл мэнд, барилгын материал бүтээгдэхүүн үйлдвэрлэлэлтэд төр засгаас анхаарч, татварын бодлогоор дэмжиж ажиллах ёстой байдаг учир цаашид барилгын салбарын үйлдвэрлэгчид, компаниудын татварыг хөнгөлөх, тэдний зээлийг сунгах, зээлийн хүүг бууруулах тал дээр онцгой анхаарч ажиллана хэмээн Г.Мөнхбаяр сайд мэдэгдлээ.



     Мөн гүний худгаас усаа шууд татаад хэрэглэдэг байгальд хор хөнөөл ихтэй хоцрогдсон аргыг халж, цэвэрлэх байгууламжийг орчин үеийн техник технологитой нь уялдуулсан оновчтой шийдэл гарцыг олох, шинэчлэх тал дээр шийдвэртэй алхмуудыг хийж ажиллана гэлээ.

     Харин гэр хорооллын дахин төлөвлөлтийн ажил хэвийн үргэлжлэх боломжтой учраас хөтөлбөрт хамрагдсан компаниуд үйл ажиллагаагаа цааш үргэлжлүүлэх аж.

     Уулзалтад хүрэлцэн ирсэн хэвлэл мэдээллийнхний хамгийн их сонирхож буй асуудал мэдээж ипотекийн зээл хэвийн үргэлжлэх эсэх, зээлд хамрагдах 80 м.кв-ыг нэмэгдүүлэх асуудал чухал байсан юм.

БХБ-ын сайд Г.Мөнхбаяр ярихдаа,



Ипотекийн зээлийн урьдчилгааг одоо байгаагаас нь бууруулах боломж байгаа эсэхийг судалж байна. Мөн Төрийн орон сууцны корпорацийг татан буулгах биш, цаашид түрээсийн үйл ажиллагаа явуулдаг болгох талаар хэлэлцэж байна. Аймгуудад байгаа түрээсийн орон сууцнуудыг тухайн бүс нутгийн засаг захиргаанд нь даатгана. Харин нийслэл хотод түрээсийн орон сууцыг нэмж барихаас илүү, одоо байгаа барилгуудынхаа ашиглалтад анхаарч ажиллана.

Түрээсийн орон сууцыг өмчлөх тал дээр?

Одоо түрээслэн амьдарч байгаа айлуудыг 5 жилийн дараа гаргах биш, үргэлжлүүлэн түрээслэх боломжийг нь олгоно. Тухайн айл байр, орон сууц худалдан авах чадамжтай болох хүртлээ түрээсийн орон сууцандаа амьдрах боломжийг нь хангана. Иргэдийн тодорхой хэсэг нь тухайн түрээсийн орон сууцаа өмчилж авах нөхцөлийг нь бүрдүүлж ажиллана.

Ипотекийн зээлд 80 м.кв-аас дууш талбайтай орон сууцыг хамруулах уу?

80 ба түүнээс доош м.кв талбайтай орон сууцнуудыг зорилтот хэрэглэгчид нь авч, хэрэгцээ нь хангагдаж байна. Одоо ипотекийн зээлд 80-100 м.кв талбайтай орон сууцнуудыг хамруулах нь зүйтэй гэж үзсэн.

Барилгын салбар ерөнхийдөө уналтанд орчихлоо. Ипотекийн 8 хувийн зээлийг үргэлжлүүлэхгүй л бол барилгын компаниуд ч хүнд байдалд орно гэсэн яриа байгаа?

Арилжааны банкууд дээр зээлтэй байгаа барилгын компаниудын цаана тэдгээрийн ажилтан, ажиллагсад, тэдний гэр бүл байгаа. Тиймээс иргэдийг ажлын байраар хангаж байгаа компаниудын зээлийг хугацааг сунгах боломжийг судалж байна.

Үнэ тогтворжуулсан барилгын материалын үйлдвэрлэлийн хувьд бодитой үр дүн харагдахгүй байна гэсэн шүүмжлэлийг та хэлсэн. Энэ талаар?

Энэ хөтөлбөрт хамрагдаад тодорхой тооны ажлын байрыг бий болгоод ажиллаж байгаа үйлдвэр тааралдсангүй.