Ж.Мөнхбат: Оффисын зориулалтаар баригдах барилгуудад хүүхдийн цэцэрлэгтэй байх стандарт мөрдүүлнэ

Ж.Мөнхбат: Оффисын зориулалтаар баригдах барилгуудад хүүхдийн цэцэрлэгтэй байх стандарт мөрдүүлнэ

       Монгол Улсын сайд, Засгийн газрын Хэрэг эрхлэх газрын дарга болон Засгийн газрын гишүүд орон нутгийн удирдлагуутай уулзаж Засгийн газраас бүрэн эрхийн хугацаанд баримтлах бодлого, чиглэл болон бусад асуудлаар ярилцлаа.

       "Засгийн газрын үйл ажиллагааны хөтөлбөрийг хэрэгжүүлэх ажлыг орон нутагт зохион байгуулах гол албан тушаалтан нь аймаг, орон нутгийн удирдлагууд. Иймд төв орон нутгийн удирдлагын хамтын ажиллагаа, ажлын уялдаа холбоог хангаж ажиллах, орон нутгийн түвшинд ИТХ-ын дарга, Засаг даргын гар сэтгэл нийлсэн хамтын ажиллагаа чухал" гэж Монгол Улсын сайд, Засгийн газрын Хэрэг эрхлэх газрын дарга Ж.Мөнхбат хэллээ.

     Тэрбээр мөн жил бүрийн ИТХ болон Засаг даргын үйл ажиллагааны тайланг үнэлж дүгнэнэ. Энэ асуудлыг Засгийн газрын хуралдаанаар хэлэлцэж, ажлын амжилт, үр дүн гаргасан аймаг, нийслэлийн удирдлагуудыг урамшуулж, ажилдаа хариуцлагагүй хандсан хүмүүст хариуцлага тооцож ажиллана. Аймгийн удирдлагуудтай сар бүр тодорхой сэдвээр болон цаг үеийн ажлаар цахим хурал хийж, орон нутагт тулгамдаж байгаа асуудлыг шийдвэрлэж ажиллана.

     Орон нутгийн байгууллагуудын үйл ажиллагааны ил тод байдлыг хангах, төрийн үйлчилгээний хүнд суртал, чирэгдлийг арилгах ажилд орон нутгийн удирдлагууд анхаарч ажиллах нь зүйтэй.
Төрийн байгууллагууд дотоод нөөц бололцоогоо ашиглан стандарт хангасан хүүхдийн цэцэрлэгтэй байдаг жишиг гадаад орнуудад бий. 

     Аливаа тендер хэл ам дагуулдаг. Иймд ил тод, нээлттэй байдлыг нь сайтар хангаж ажиллах болон төрийн захиргааны ажлыг аж ахуй, үйлчилгээний ажлаас нь салгах, нягтруулах замаар захиргааны байр байшин чөлөөлөх хэлбэрээр хэмнэлт гаргах боломжуудыг судлах, төрийн үйлчилгээний чанар, хүртээмжид хяналт тавьж, иргэдийн эрхийг зөрчиж буй аливаа үзэгдлийг таслан зогсооход анхаарлаа хандуулж ажиллахыг зөвлөлөө.

     Тухайлбал, нийслэл хот болон аймгийн төвүүдэд хүүхдийн цэцэрлэгийн хүрэлцээ муу байна. Төрийн байгууллагууд дотоод нөөц бололцоогоо ашиглан стандарт хангасан хүүхдийн цэцэрлэгтэй байдаг жишиг гадаад орнуудад бий. 2017 оноос оффисын зориулалтаар баригдах барилгуудад хүүхдийн цэцэрлэгтэй байх шинэ стандарт мөрдүүлнэ. Эдийн засгийн хүндрэлтэй гэх атлаа өнөөдөр 200 хүүхдийн цэцэрлэгийг 200 тэрбум төгрөгөөр барьж байна. Тэгэхэд Хөдөлмөр, нийгмийн хамгаалал, Гадаад харилцаа, Уул уурхайн зэрэг яамд яамныхаа барилгаас чөлөөлөлт хийж тус бүр 70-80 хүүхдийн цэцэрлэг байгуулж байна. 100 сая төгрөгөөр ийм ажил хийх боломж байна. Энд жирийн ажилчдын, жирийн иргэдийн хүүхдүүд хамрагдана. Аймаг, орон нутагт ийм ажил зохион байгуулах нь зүйтэй гэлээ.

     Иргэдэд үзүүлэх төрийн үйлчилгээг хөнгөн шуурхай болгох талаар Засгийн газраас тодорхой арга хэмжээ авч ажиллана. Төрийн үйлчилгээнд иргэдийн үнэлгээний систем  нэвтрүүлж, үүнийг цахим хэлбэрт шилжүүлэх, төрийн захиргааны албан тушаалтны иргэдийн өргөдөл, гомдлыг шийдвэрлэх хугацааг хоёр дахин багасгаж, шуурхай болгох арга хэмжээ авна гэж Засгийн газрын Хэрэг эрхлэх газрын дарга Ж.Мөнхбат хэллээ.   
Эх сурвалж: Засгийн газрын Хэвлэл мэдээлэл, олон нийттэй харилцах хэлтэс

Сэтгэгдэл (1)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

    Баагий 2016-08-23 09:59 183.81.171.98

    Энэ шүлэгч залуу солиорчээ. Цэцэрлэг барьж чадахгүй байж Цэцэрлэгтэй оффисс ч гэх шиг зөгнөлт зохиол уу