Туркийн хамтын ажиллагаа зохицуулах агентлаг, Шүүхийн шийдвэр гүйцэтгэх ерөнхий газартай хамтран төмрийн цех байгуулж, хүмүүжигчдийг ажлын байраар хангахаар боллоо. Энэ хүрээнд өнөөдөр ШШГЕГ-ын дэд дарга Г.Туулхүү, Туркийн хамтын ажиллагаа, зохицуулах агентлагийн Улаанбаатар дахь хөтөлбөр зохицуулагч Вэйсэл Чифтжи нар төслийн хэлэлцээрт гарын үсэг зурж, баталгаажуулав.

Төсөл хэрэгжиж эхэлснээр ШШГЕГ-ын харьяа 441 дүгээр хорих ангийн байршилд 40-50 хүнийг ажиллуулах хүчин чадалтай төмрийн цехийг байгуулах эхлэл тавигдах юм. Төслийн нийт өртөг 60 сая төгрөг бөгөөд энэ ондоо багтааж ашиглалтад оруулах аж.

 Шаардлагатай техник, тоног төхөөрөмжийг Туркийн талаас нийлүүлнэ. Төмрийн цех байгуулах байр, материаллаг бааз, засвар үйлчилгээг ШШГЕГ хариуцах гэнэ. Хүмүүжигчдыг ажлын байраар хангах асуудал улирлын чанартай байдаг бөгөөд тус цех байгуулагдснаар ялтнуудыг тогтмол ажлын байраар хангах боломж бүрдэх юм байна. 

Энэ цехийн бүтээгдэхүүнийг гадагш худалдахгүй. Өөрөөр хэлбэл ашгийн бус үйлдвэр гэсэн үг байх гэнэ.