Дели хотноо эрчим хүчний хэмнэлттэй, Энэтхэгийн архитектурын уламжлалт хэв маягийг шингээсэн нэгэн өвөрмөц барилгыг “Punjab Kesari” медиа группт зориулан барьж байна. Энэхүү барилгын гол онцлог нь түүний “Жали” хэмээх Хиндийн уламжлалт хээ бүхий гоёмсог фасад юм. Энэ нь барилгын дотор хэсэгт байгалийн гэрлийг дээд зэргээр нэвтрүүлж, хэт халуун агаарыг дотогш нэвтрүүлэхгүй байх үүрэгтэй аж.

     “Punjab Kesari” барилга нь хараахан ашиглалтад ороогүй байгаа ч Олон улсын үл хөдлөх хөрөнгийн шагналын (International Property Awards) Оффисийн шилдэг барилгын шагналыг хэдийн хүртжээ. Нийт 18,000  ам метр талбайтай уг барилгын булан тохой бүрт байгалийн гэрэл тусах ба энгийн өдрүүдэд хиймэл гэрэлтүүлэг огт хэрэггүй гэнэ.

     Үндэсний уламжлалыг харуулсан шилэн төмөр бетон фасад нь нарны чиг баримжаа, тоон загварчлал мэдээллийн дагуу янз бүрийн хэмжээтэйгээр онгойдог юм байна. Төсөл 2017 оны нэгдүгээр сард бүрэн дуусч, ашиглалтад орох аж.