Инженерүүдээ гадаадад сургаж, мэргэжил дээшлүүлэх тал дээр түлхүү анхаарах хэрэгтэй

Инженерүүдээ гадаадад сургаж, мэргэжил дээшлүүлэх тал дээр түлхүү анхаарах хэрэгтэй
 
Инженерүүдийн сургалт болон ажиллах орчны талаар Монголын Барилгачдын холбооны Ерөнхийлөгч М.Батбаатартай уулзаж, ярилцлаа.

- Залуу инженерүүдийн ур чадвар, мэргэжил эзэмшсэн байдал ямар байна вэ?

- ШУТИС, Техник технологийн коллеж, Барилгын политехникийн коллежид Бакалаврын зэрэгтэй, техникч-инженерийн хэмжээнд мэргэжилтнүүдийг бэлтгэж байна. Гэхдээ сүүлийн жилүүдэд, сургалтын байгууллага болон аж ахуйн нэгжүүдийн хоорондын хамтын ажиллагаа сайнгүй, уялдаа холбоо тааруу байна. Суралцагчдыг дадлага хийлгэх нөхцөлийг улам сайжруулах хэрэгтэй.

Ололттой тал нь гэвэл, инженер мэргэжлээр суралцагчид, тухайлбал ШУТИС-ийн оюутнууд 3-р курсээсээ тухайн мэргэжлээр барилгын салбарын байгууллагуудтай холбоо тогтоож, үргэлжлүүлэн ажиллах, байр сууриа олж эхлэх боломжтой болсон. Үүнийг цаашид хөгжүүлэн сайжруулж, сургуулийн хэмжээнд аж ахуйн нэгж байгууллагуудтай түншлэлийн харилцааг бий болгож, оюутнуудыг дадлага хийлгэдэг болгох хэрэгтэй.

Түүнчлэн тухайн барилгын, зураг төслийн, угсралтын, материал үйлдвэрлэлийн байгууллагуудад ажиллаж байгаа инженерүүд нь холбогдох мэргэжилтэн бэлтгэж буй сургуулиудад цагаар хичээл заах нь их үр дүнтэй байдаг. Бодит ажлын талбар дээр ажиллачихсан инженерүүдээр хичээл заалгах нь оюутнуудад дадлага суухад ихээхэн хэрэгтэй. Сүүлийн жилүүдэд барилгын салбарт шинэ технологи маш хурдацтай нэвтэрч байна. Ялангуяа бүрэн цутгамал технологи, шилэн фасад, сантехникийн шийдлийн орчин үеийн технологиуд нэвтэрлээ. Энэ болгоныг цаг тухайд нь сурч, мэдэж ажилладаг, идэвхтэй хандлагыг оюутнуудаас цаг үе нь шаарддаг боллоо.

- Гадаад улс орнуудад мэргэжил дээшлүүлж буй инженерүүдийн тоо хэр байна вэ?

- Сүүлийн арваад жилийн хугацаанд Монголын барилгын салбарт ажиллаж буй инженер техникийн ажилтнууд гадаад, дотоодод өөрсдийн зардлаар мэргэжил дээшлүүлж байна. Хөнгөлөлттэй төлбөр, тэтгэлэгт хөтөлбөрт хамрагдан мэргэжил дээшлүүлэх боломж нь эрс цөөрсөн. Монголын барилгачдын холбооноос сүүлийн 4 жил дараалан 21 хоногийн хугацаатай 100 хувийн хөнгөлөлттэй сургалтыг ХБНГУ-д 30 удаа явуулж, давхацсан тоогоор 400 гаруй инженерийг хамруулсан.
Техник технологи өндөр хөгжсөн улсаас багш нарыг авчрах нь олон талын ач холбогдолтой.

Энэ бол маш хангалтгүй тоо. Ялангуяа манай салбарын холбогдох яам, тамгын газрын дарга нар гадаадад ажлын айлчлалаар явахдаа тухайн орныхоо засаг захиргаа, барилгын чиглэлийн байгууллагуудад Монголын инженер техникийн ажилтнуудаа хөнгөлөлттэй үнээр сургах, дадлагажуулах ажлыг тавьж байх хэрэгтэй. Ер нь инженер техникийн ажилтнуудыг байнга сургаж, мэдлэг мэдээллээр хангаж байх шаардлагатай байдаг.

Монголын барилгачдын холбоо энэ оноос Политехникийн коллеж, бусад техник технологийн сургуулиудтай хамтран Монголдоо Герман багш нарыг авчирч мэргэжил дээшлүүлэх сургалтыг зохион байгуулж эхэллээ. Техник технологи өндөр хөгжсөн улсаас багш нарыг авчрах нь олон талын ач холбогдолтой. Тухайлбал, гадагшаа 10 инженерийг сургах боломжоор дотооддоо 100 инженерийг хамруулна гэсэн үг юм.

Ер нь барилгын салбарын мэргэжлийн холбоод нь инженерүүдээ гадаадад сургах, мэргэжил дээшлүүлэх тал дээр түлхүү анхаарал хандуулж ажиллах хэрэгтэй. Бүх холбоод дор бүртээ сургалтын арга хэмжээнүүдийг тогтмол явуулж, энэ 22,000 гаруй инженерээс тодорхой хэмжээг нь мэргэжил дээшлүүлэхэд хувь нэмрээ оруулах ёстой.

- Залуу инженерүүдийн анхаарах зүйлс гэвэл...

- Өнөө цагт оюутнууд, залуу инженерүүдэд сурч мэдэх, мэдлэгээ ахиулах боломж нээлттэй болсон. Техник технологи хөгжиж, мэдээллийн олон эх сурвалжтай болж, интернэт орчинд бүхнийг уншиж олж мэдэх боломж хангалттай байна.

Сургалтын байгууллага, компаниудын холбоо харилцаа, уялдаа тааруу байгаагаас оюутан онолын мэдлэг хангалттай авсан ч, ажлын талбар дээр дадлага туршлага муутай байгаа асуудлыг шийдвэрлэх хэрэгтэй. Тэгэхээр залуу инженерүүд сургууль төгсмөгцөө өөрийн санаачилгаар олон зүйлийг сурч, идэвхтэй ажиллах нь зүйтэй.

Мөн зөвхөн мэргэжил талаас нь сургалтын орчныг сайжруулаад зогсохгүй, залуу инженерүүдийн ёс суртахуун, зан чанарын төлөвшил, хүмүүжилд нь нэлээд анхаарал хандуулах шаардлагатайг хэлмээр байна.


Ярилцлага өгсөнд баярлалаа.

Холбоотой мэдээ