Барилгын салбарын орхиж болшгүй нэгэн чухал сэдэв бол яах аргагүй “өргөн тээвэрлэх машин төхөөрөмж” юм. Тиймээс “Барилга.МН” сэтгүүл шинэ дугаартаа барилгын өргөх төхөөрөмж, кран, лифтийг онцолж, энэ чиглэлээр үйл ажиллагаа явуулахад гардаг хүндрэл бэрхшээл, осол аваар юунаас болж гардаг, тэдгээрийг бууруулж, аюулгүй ажиллагааг хэвшүүлэхийн тулд юу хийх ёстой талаар холбогдох төрийн болон төрийн бус мэргэжлийн байгууллагуудын мэргэжилтнүүдтэй уулзаж ярилцлаа.

     Өргөх төхөөрөмжийн нэр төрөл, тэдгээрийг ашиглах заавар, ашиглалт болон хяналт тавих явцад гардаг алдаа, тулгамдсан асуудлууд гээд олон талын мэдээлэл, зөвлөмжийг манай сэтгүүлчид бэлтгэн хүргэж байна. Түүнчлэн ашиглалтын хугацаа хэтэрсэн лифтүүдийн асуудлыг хөндөн бичсэн “Троссноос дүүжлээстэй хүний амь” нийтлэл танд нэгийг эргэцүүлж, хоёрыг тунгаах нэгэн сэдэл өгнө гэдэгт итгэлтэй байна.



     Бүрэн бус өргөх төхөөрөмж ашиглах нь осол аваар их гарч, хүний алтан амь эрсдэх гол шалтгаан болдог тухай та “Өргөн тээвэрлэх машин төхөөрөмж” үндэсний холбооны УЗ-ийн дарга Г.Батсайханы ярилцлагаас уншаарай. Нэгэнтээ энэ салбарыг онцолсны хувьд, өргөх механизмын зах зээлийн тоо баримт бүхий мэдээллийг манай судлаачдын бэлтгэснээр хүргэж байна.



     Мөн авто ачигч үйлдвэрлэлийн салбарт тэргүүлэгч “Toyota Industrial Equipment”-ийн дэвшилтэт бүтээгдэхүүний үйлдвэрлэл, хөгжлийн үе шат, ашиглалтын талаарх дэлгэрэнгүй мэдээллийг Дэвшилтэт технологи булангаас хүлээн аваарай. Барилгын кран, өргөх төхөөрөмжийн нэр төрөл, хаана хэрхэн ашигладаг тухай зөвлөгөө мэдээллийг Хэрэглэгчийн буланд зориулан бэлтгэлээ.



     Хэрэв та үл хөдлөх хөрөнгөө эргэлтэд оруулахаар төлөвлөсөн бол хэдхэн хором анхаарлаа хандуулаад Орон сууцны биржээс өгч буй зөвлөгөөг уншаарай. Зөвлөгөөнд байраа зарах гэж буй иргэдэд тулгардаг нийтлэг асуудлуудыг шийдэх гарцыг тодорхойлсон оновчтой зөвлөмжийг багтаалаа.



    Энэ удаагийн сэтгүүлийн нүүр хуудсыг их хотын үзэмжинд өнгө, чимэг нэмсэн Шангри-Ла төвийн зургаар чимж, бүтээн байгуулалтын ажлаас нь танилцууллаа. Мөн байшингаа өөрсдөө болон аль нэгэн байгууллагаар бариулахаар төлөвлөж буй иргэддээ зориулан Евроблокоор боломжийн хэмжээний амины орон сууцтай болох, контейнерээр зуслангийн жижиг байшин барих зөвлөмжүүдийг бэлтгэлээ.




Сэтгүүл захиалга: