Манай улс ойрын жилүүдэд ОХУ-д цемент экспортлох боломжтой болно гэх нэгэн таатай мэдээг дуулгая. Цементийн хэрэгцээнийхээ 90 гаруй хувийг хангадаг дотоодын үйлдвэрлэгчид тус улсад бүтээгдэхүүнээ экспортлох боломжийг судлан, тоо баримтад тулгуурласан дүгнэлтийг гаргажээ. Ингэхдээ үйлдвэрлэлийн тоо хэмжээг жилээс жилд ахиулан нэмэгдүүлж, жил тутам 4.5 сая тонн цемент үйлдвэрлэдэг болно гэсэн таамгийг мэргэжилтнүүд дэвшүүлсэн байна.
 
     Энэ оны сүүлч гэхэд цементийн томоохон хоёр ч үйлдвэр ашиглалтад орсноор Монгол улс дотоодын хэрэгцээгээ бүрэн хангадаг болох ба цаашид хүчин чадлаа ч нэмэгдүүлэх боломжтой болох юм.

     Манайд үйлдвэрлэгчид олон улсын стандартад нийцсэн хуурай технологийн цементийг үйлдвэрлэж байгаа учир гадаад орнуудад, тэр тусмаа ОХУ-д экспортлох бүрэн боломжтой гэдгийг холбогдох албаныхан мэдэгдэж байна.