“Барилга.МН” сэтгүүл үл хөдлөх хөрөнгийн судалгааны тайланг онцолж байна

“Барилга.МН” сэтгүүл үл хөдлөх хөрөнгийн судалгааны тайланг онцолж байна

     Сар болгон уншигчдынхаа мэдлэгт тус нэмэр болохуйц барилгын зөвлөгөө, мэдээллийг хүргэж байдаг “Барилга.МН” сэтгүүл шинэ дугаартаа салбарын инженер мэргэжилтнүүдийн талаар болон “Барилга, үл хөдлөх хөрөнгийн судалгааны тайлан 2016”-г онцоллоо.

   Судалгаанд тулгуурласан бодит шийдвэр гаргалт барилгын салбар үгүйлэгдэж буй энэ үед бизнес эрхлэгчид, төсөл хэрэгжүүлэгчдийн хувьд чихэнд чимэгтэй нэгэн таатай үйл явдал болсон нь дээрх судалгааны тайлан байлаа. Худалдаанд гараад удаагүй ч, эрэлт ихтэй байгаа уг тайланд Монгол улсын макро эдийн засгийн байдал, түүний барилгын салбарт үзүүлэх нөлөө, үл хөдлөх хөрөнгө болон барилгын материалын зах зээлийн орчны талаар дэлгэрэнгүй судалгаа дүгнэлт гаргаж, холбогдох мэргэжлийн хүмүүсийн тайлбар, дэвшүүлж буй таамгуудыг нийтэлсэн байна. Салбартаа анхдагч болж чадсан уг тайлангийн дэлгэрэнгүй танилцуулгыг манай сэтгүүлийн шинэ дугаараас хүлээн авах боломжтой шүү.


      
      Манай барилгын салбарт хичнээн мэргэжлээр хэдэн инженер бэлтгэгдэн ажиллаж байгаа талаар хамгийн сүүлийн үеийн мэдээллийг та бүхэн Монголын барилгачдын холбооны ерөнхийлөгч М.Батбаатарын ярилцлагаас уншаарай. Түүний ярилцлагаас салбарын ажиллах хүчний өнөөгийн байдал ямар байгаа талаар дэлгэрэнгүй мэдээлэл авч чадна гэдэгт итгэлтэй байна. Мөн залуу инженерүүдэд өгөх мэргэжлийн зөвлөмжүүдийг хүргэхийг зорилоо.


       
     Сэтгүүлийн Хуулийн буланд Хөдөлмөрийн аюулгүй байдал, эрүүл ахуйн тухай хуульд орсон нэмэлт өөрчлөлтийн талаарх мэдээллийг бэлтгэлээ. Эндээс та тус хуульд нэмэлт өөрчлөлт оруулах болсон шалтгаан, үндэслэл болон шинээр орсон ХАБЭА-н нэр томъёонуудын талаарх мэдээллийг авч болох нээ.
       
     Мөн түүхэн дурсгалт барилга, байгууламжийг тухайн үеийн байдлаар нь хадгалан, сэргээн засварлах, арчлан хамгаалах тал дээр Төр засгаас ямар бодлого үгүйлэгдэж байгаа, мэргэжилтнүүд нь ямар арга хэмжээ авч ажиллаж байгаа талаар МУ-ын Зөвлөх архитектор, Доктор (PhD) З.Оюунбилэгтэй хийсэн дэлгэрэнгүй ярилцлагаас уншаарай.


        
    Монголынхоо барилгын инженерүүдийн эрх ашгийг хамгаалах, тэднийг барилга бүтээн байгуулалтын ажилд дайчлан оролцуулах, цаг үетэйгээ хөл нийлүүлсэн сургалт судалгаанд байнга хамруулж байдаг Монголын барилгын инженерүүдийн холбооны үүсгэн байгуулагдсаны 20 жилийн ойн баярт зориулсан тусгай булан, Ерөнхийлөгч Б.Гүнболдын ярилцлага зэргийг бэлтгэлээ.
     
     Түүнчлэн Мишээл барилгын их дэлгүүрт ажиллаж буй Орон сууцны биржийн үйл ажиллагаа, үл хөдлөх хөрөнгийн мэргэжилтний өгөх зөвлөгөөг, иргэн таны хашаа байшин яагаад үнэгүйдэж, үнэлэгддэггүй талаарх мэргэжилтний яриа бүхий мэдээллийг Хөндөх сэдэв булангаар та хүлээн аваарай.


   
   Оршин суугчдынхаа тав тухтай амьдрах орчныг гэрийн ухаалаг автоматжуулалтын системээр шийдсэн “Santo Smart Apartment” орон сууцны хотхоны тансаг, дээд зэрэглэлийн илэрхийлэл болсон интерьерийн шинэлэг шийдлээс бид Интерьерийн буландаа онцлон танилцууллаа.



     Барилгын салбарт өрнөж буй бүхий л мэдээллийг цаг алдалгүй түгээж, мэргэжлийн зөвлөмжүүд, салбарын мэргэжилтнүүдийнхээ талаар онцлон хүргэж байдаг “Барилга.МН” сэтгүүл цаг ямагт таны үнэнч ширээний анд тань байх болно. 

Холбоотой мэдээ