Д.Цэнд: Барилга угсралтын ажлыг улирал харгалзахгүйгээр гүйцэтгэдэг болмоор байна

Д.Цэнд: Барилга угсралтын ажлыг улирал харгалзахгүйгээр гүйцэтгэдэг болмоор байна
Эх орныхоо бүтээн байгуулалтын үйлсэд хувь нэмрээ оруулагч үндэсний компаниудын нэг “Гэрэгэ” группийн ерөнхий захирал, “Үндэсний барилгын консорциум”-ийн гүйцэтгэх захирал, Д.Цэндтэй уулзаж, ярилцлаа.

- Юуны өмнө манай сэтгүүлийн урилгыг хүлээн авсан танд баярлалаа. Барилгын салбарт хэзээнээс ажиллах болсон, “Гэрэгэ” группийг үүсгэн байгуулсан дурсамжаас тань ярилцлагаа эхэлье.

- Миний аав Дархан хотод 017-р ангийн мужаан, ах цахилгааны инженерээр ажилладаг байлаа. Тэр хоёрыгоо дагаад барилгын талбайгаар их явдаг байсан нь энэ салбарт хөл тавихад минь нөлөө үзүүлсэн болов уу. Сүүлд нь тухайн үеийн Техник мэргэжлийн сургуульд элсэн орж, барилгын мэргэжлийн эзэмших болсон. Бетон арматурчин, гагнуурчнаас эхлүүлээд энэ салбарт хориод жил ажиллаж байна.

Барилгын компаниуд сайн, муу гээд олон янзын түүхийг бичдэг. Гэтэл миний хувьд өмнө нь байгуулсан “Хасуу констракшн”-ныхаа суурийг дахин өөр түвшинд гаргаж ирэх шаардлага тулгарснаас “Гэрэгэ” группийг үүсгэн байгуулсан. Ер нь компаниуд менежментэд тулгуурласан бодлого төлөвлөлттэй, нэгдэл болж каластрын арга барилаар ажиллах нь илүү үр дүнтэй санагддаг. Хүнс, аж үйлдвэр гээд бусад салбарт энэ каластрын аргыг түлхүү ашигладаг. Энэ нь олон улсад багагүй хугацаанд амжилттай ашиглагдаж, энэ жишгээр цөөнгүй үйлдвэрүүд байгуулагдаж ирсэн үр дүнтэй арга юм. Тэгэхээр үүнийг Монголд, тэр тусмаа барилгын салбарт хэрхэн хэрэгжүүлдгийг судалж, констракшн групп компани байгуулах боломжтой юм гэж үзээд “Гэрэгэ” группийг байгуулсан. Харин бусад компанитай бид консорциум болон нэгдэж, хамтран ажилладаг байх шаардлага гарч байна.

“Эвтэй байхдаа хүчтэй” гэдэгчлэн бид ямар замаар нэгдэн, хамтрах боломжтой гэдгээ судалж үзэх нь чухал. Эвтэй байхын тулд бид юунаас татгалзаж сурах, юун дээр нь нэгдэж, харилцан дэмжлэг болж чадах вэ гэдгээ сайтар тунгааж үзэх хэрэгтэй. Ямар үед бусаддаа “тахимаа” өгч чаддаг байх вэ гээд өөрийн шунал, эрх мэдлийг хязгаарлахаас эвтэй байдлын үндэс суурь нь эхэлнэ.

Барилгын салбарт компаниуд нь бүгдээрээ тус тусдаа ашигтай гэсэн төсөл, хөтөлбөр рүү хошуураад байх нь эв нэгдэл биш шүү дээ. Тэгэхээр компаниуд маань өөрсдийн чаддагаа хийгээд, боломжгүй зүйл дээр нь гадны “Ноу-Хау” нэвтрүүлж, дотоодынхоо технологи, арга барилтай уялдуулаад явах нь зүйтэй гэж боддог.

- “Гэрэгэ” группийн үнэт зүйл юу вэ?

- Манай хүний нөөц, бидний сургаж мэргэшүүлж байж олж авсан инженер, техникийн ажилтнууд бидний хамгийн чухал үнэт зүйл. Аливаа компани үнэт зүйлгүй мэт санагдах л жинхэнэ аюул байх. Бид үнэт зүйлээ аль талаас нь хэрхэн харж ялган, онцлох нь чухал. Ер нь хүнд суурилсан хөгжил л маш том үнэт зүйл юм. Тиймээс ажилтнуудаа сурган мэргэшүүлж, өөрийн гэсэн өнгө төрхтэй, дотоод уур амьсгалтай байлгана гэдэг их чухал. Цаашид бид энэ үнэт зүйлээ хөгжүүлж, ахмад үетэйгээ хамтран эрхэм нандин чанарыг нь хадгалан баяжуулахыг эрхэмлэж байна.



- Тэгвэл ажилтан албан хаагчиддаа таны зүгээс тавьдаг хамгийн гол шалгуур юу вэ?

- Бусад улс орнуудад хүний нөөцдөө хандах удирдлагын хандлага байдалд тогтсон стандарт ч байдаг юм билээ. Гэхдээ бид олон улсын тэр чиг хандлагаас арай өөр арга барилтай байх ёстой. Инженер техникийн ажилтан, удирдах албан тушаалтан, талбайн ажилтан, туслах ажилтнуудаа ангилж үзсэн. Инженер техникийн ажилтнууд маань харьцангуй удирдлагын үгийг сонсож, хүлээн авахдаа бусдаас илүү байдаг. Зарим туслах ажилчдын ухамсар, соёл жаахан хүндхэн. Аливаа юм цагтаа эхэлж, цагтаа дуусдаг байх ёстой. Манай орон эрс тэс уур амьсгалтай, дулааны богинохон хэдэн сардаа ажлаа амжуулдаг учраас би намрын налгар өдрүүдээ их харамладаг.

Хаврын дулаан өдөр ирэхэд л намрын сэрүү орж байгаа үе надад шууд мэдрэгддэг. Би инженер, туслах ажилчиддаа, ийм налгар өдрүүд дахиад олдохгүй, тоотой хэдхэн байхад хаврын дулаан өдрүүдээ яасан гамгүй үрнэ вэ гэж хэлдэг. Хавартаа нозоороод хайран цагийг дэмий өнгөрүүлээд байдаг, гэтэл намартаа бид амсхийх завгүй өнгөрдөг шүү дээ. Тиймээс би ажилтнууддаа их хатуу шаардлага тавьдаг даа.

Би гадна төрхөөрөө хүмүүст зөөлөн харагддаг шиг байгаа юм. Гэтэл яг ажлын талбар, барилгын талбай дээр хатуу хүн шүү дээ. Эцэст нь гарах үр дүнг сайн байлгахын тулд хатуу гараар үздэг дээ. Их ажлын ард гарсны дараа тэдэндээ цалин, шагналыг нь өгөөд, заримд нь шинэхэн байрных нь түлхүүрийг атгуулах тэр мөч үнэхээр сайхан. Байрныхаа гэрчилгээг гардан авч байгаа тэр залуусын баярын нулимсыг харах тэр агшин нь өөрөө их үнэтэй олддог юм шүү дээ. “Тамирчны ялалт хямдхан олдоогүй” гэдэг шиг их хөлс хүч шаарддаг ажил учраас авч байгаа цалин нь “хатуу мөнгө” юм. Их эрсдэл, шаргуу хөдөлмөрөөр олж авдаг багахан “шан харамж” юм.
Компаниуд маань “эрийн цээнд хүрч, бяд чөмөг суугаад”, хоорондоо эв түнжинтэй, хамтын бодлого стратеги гарган ажиллаж чадвал энэ салбарын суурь нь бат бөх болно шүү дээ.

Хөрш орнуудын, дотоодын эдийн засгийн хямралууд барилгын салбараар төвөггүйхэн тоглочихдог. Энэ бүхнээс тэсч үлдэх найдвартай арга нь уйгагүй хөдөлмөр. Эрсдэл хэдий чинээ их байна, төдий хэмжээгээр их хөдөлмөрлөнө гэсэн үг. Мундаг том төлөвлөгөө, стратеги бодлогоор эрсдэлийг шууд давна гэж байхгүй. Тэгэхээр хямрал, эрсдэл нүүрлэсэн үед улам их хөдөлмөрлөн зүтгэж, ажилтнуудынхаа урмыг хугалчихгүй ажиллах хэрэгтэй. Гэтэл зарим нь энэ хөдөлмөрийн үнэ цэнийг мэддэггүй, байр хямдраасай л гэж яриад байдаг.
Хүн үл хөдлөх хөрөнгийг амьдралдаа 1-3 удаа л худалдан авдаг. Нэг удаад нь байртай болно, дараа нь сайжруулна, үр хүүхдээ өрх тусгаарлан гаргана гээд. Нүүдэлчин соёл иргэншилтэй манай улсад орчин үеийн суурин иргэншил их хурдацтай хөгжих шаардлага тулгарч байна. Мэдээж орон байрны асуудал юун түрүүнд яригдана. Гэтэл энэ салбарт амар хялбараар ашиг олох гэсэн хүмүүс цөөнгүй орж ирж байна.

Үнэндээ барилга бол хямарч болохгүй салбар обьект. Барилгынхан хямарлаа, үнэ хямдарна гэдэг яриаг огт ойлгохгүй байна. Насаараа хөдөлмөрлөж, худалдан авсан үл хөдлөх хөрөнгө нь үнэгүйдвэл тэр хүний хөдөлмөр ч үнэгүйднэ биз дээ. Гэтэл хүмүүс надаас “Байрны үнэ хямдрах уу?” гээд л асуудаг. Хариуд нь би, “Та байртай юу?” гэж асуудаг. Байргүй хүмүүс л үнэ нь хямдраасай гэж хүсдэг болохоос байртай хүн үүнийг хүсэхгүй шүү дээ.

Мэдээж барилгын салбарт хөөс байдаг ч, ямар үед хийг нь гаргаж, хэдийд нь газардуулж, хэзээ нь үнийг тогтвортой байлгах вэ гэдгийг олон ч хямрал шалгачихсан учраас зуучийн маягтай түр орж ирээд гарчихдаг хөрөнгө оруулагчид барилгын салбарт хөл тавихаа больсон байх. Хэдий хүнд, бэрхшээлтэй ч яг өөрсдөө хийж бүтээдэг, хөдөлмөрлөдөг хэсэг нь энэ салбарт тэсч үлдэх хэрэгтэй байна.

- Үндэсний барилга консорциумын гүйцэтгэх захирлын хувьд барилгын салбарт бизнес эрхлэхийн бэрхшээл ба боломжийн талаарх бодлоо хуваалцвал...

- Барилгын салбарт тогтвортой, байнгын ажиллагаатай үйлдвэрлэл хэрэгтэй. Гэтэл цаг агаарын байдал, эдийн засгийн буюу төлөвлөлтийг цаг хугацаанд нь хийдэггүй зэрэг бэрхшээлүүд бий. Төлөвлөлтийг эртхэн хийж, цаг алдалгүй ажлыг нь эхлүүлж, тогтмол явуулж баймаар. Тиймээс өвлийн нөхцөлд ашиглаж болохгүй нойтон технологийн хэрэглээг багасгаж, хуурай, угсардаг технологийг түлхүү ашигладаг болмоор байна. Монгол компаниуд дэлхийн шилдэг технологиудаас хоцролгүй хэдийнэ нэвтрүүлээд, тус бүртээ ашиглаж байна. Харин өөр хоорондоо нэгдэж, тэрхүү дэвшилтэт арга технологиудыг нэгдсэн байдлаар ашиглах хэрэгтэй. Тиймээс ч Үндэсний барилга консорциум нь барилга угсралтын ажлыг улирал харгалзахгүйгээр явуулах, компаниудынхаа хүчийг нэгтгэн шинэ техник технологийн судалгаа, эрэл хайгуул хийж нэвтрүүлэхийг зорьж байна. Жишээ нь, 10 консорциум байгуулагдаж, тэдгээрийн төлөөлөл хамтраад аливаа асуудлаа шийдэж, технологийн оновчлолыг гаргаж байвал илүү үр дүнтэй байх болов уу. Ийм нэгдэл, концорциумууд олноор гарч ирснээр юун түрүүнд гадны ажиллах хүчийг багасгамаар байна.

Монгол хүн ажилгүй, хоосон хонож байхад гадны ажиллах хүчинд хамаг ажил, мөнгөө өгөөд гаргачихдагаас татгалзах хэрэгтэй. Мөн гадны зөвлөх оператор компаниуд зөвлөгөө өгөх нэрийдлээр төслүүдийн гол ашгийг хуваалцаад авчихаж байгаа нь томоохон алдаа юм. Монгол компаниуд эх орондоо гадны зөвлөх компанид ашиг өгөх биш, зөвхөн зөвлөгчдийг нь цалинжуулж ажиллуулдаг, өөрсдөө бүтээн байгуулахын төлөө хичээх ёстой. Монгол орныг бид өөрсдөө л хөгжүүлэхээс биш аль нэгэн гадаадын иргэн манай улсыг хөгжүүлэхгүй шүү дээ. Тэгэхээр гадаадын хэн нэгэн иргэн Монголд ашгийн төлөө биш цалингаа л авахын тулд ажилладаг байх ёстой. Манай компаниуд гадны зөвлөхүүдийн удирдлаганд бус, харин Монгол компанийн дээвэр дор ажиллах ёстой юм.



Үндэсний компаниуд маань нэгдэж, хямралын шуурганд амархан автаж, гадаадын аль нэгэн компанид хялбархан буугаад өгчихөөргүй, дархлаа сайтай болох шаардлагатай байна. Компаниуд маань “эрийн цээнд хүрч, бяд чөмөг суугаад”, хоорондоо эв түнжинтэй, хамтын бодлого стратеги гарган ажиллаж чадвал энэ салбарын суурь нь бат бөх болно шүү дээ.

Мөн хөрсний бохирдол, байгаль экологидоо гаргаж буй сөрөг үйлдлүүдийг ярихгүй байж болохгүй. Барилга бол байгальд хог хаягдал гаргадаг салбар. Байгалийн баялгийг хайр найргүй ухаж, тээвэрлэж зөөхдөө бохирдол үүсгэж, авто замуудыг эвдэн сүйтгэдэг, тоос тоосонцор их гаргадаг. Иймд энэ салбарыг цаашид хөгжүүлэхдээ барилгачид бид өөрсдөө байгальд ээлтэй, хүний биед сөрөг нөлөөгүй технологийн дэвшилд байнга анхаарал хандуулж, хариуцлагатай хандах ёстой. Дэлхийн бусад орнууд хог хаягдлаа дахин ашиглаж, шинэ бүтээгдэхүүн үйлдвэрлэж байгаа шиг бид ч хаягдлаа дахин боловсруулж, хөрсний бохирдолгүй амьдарч, экологийн тэнцвэрт байдлаа хадгалахын төлөө хичээж ажиллахгүй бол хойч үедээ ямар ирээдүйг үлдээх вэ. Тиймээс өнгөрснөө түүхчилж, өнөөдрөө ирээдүйтэйгээ уялдуулж хөгжих шаардлага бидэнд тулгарчихаад байна.

- Таны амьдралдаа баримталж явдаг гол зарчим?

- Хүн хөдөлмөрч бөгөөд шударга л байх ёстой гэж боддог. Оюутан байхдаа рулет хийж, гэрэл зураг авч, дотуур байрныхаа өрөөнд талх зардаг байлаа. Талх авахаар дэлгүүр хүртэл яваад ирэхэд хэдэн минут зарцуулах вэ л гэж боддог байлаа шүү дээ. Талхаа авчраад өрөөндөө орхичихно, түүнийг нь өрөөний найзууд маань зараад, мөнгийг нь тавьчихдаг байсан юм.

- Зах зээл дээр олон мянган орон сууцны илүүдэл үүсчихлээ. Таны хувьд үүнийг хэрхэн дүгнэж байна вэ?

- Энэ зах зээлд илүүдэл байгаа, гэхдээ нийлүүлэлтийн үнэ өндөр байгаа болохоос биш эрэлт ханачихсан гэсэн үг биш. Орон сууц худалдан авах гэсэн иргэд зөндөө байна. Зах зээл идэвхтэй үед өндөр үнэтэй материалаар барьсан байрыг яаж хямдруулж зарах вэ? Яахав, зарим компани хямдруулаад зарж л байна. Ам метр талбай нь дунджаар 3 сая төгрөгийн үнэ хүрч байсан орон сууцыг 500 орчим мянган төгрөгөөр хямдруулахад л тэр компани “хиншүү” ханхалтал хохирол хүлээнэ гэдгийг иргэд маань ойлгодоггүй. Гэхдээ одоо зах зээлд байгаа энэ илүүдэл удахгүй дуусах байх. Моргейжийн зээл, үнийн инфляци нь тогтвортой л байвал борлуулалт зогсохгүй, үргэлжилнэ. Иргэдээ орон сууцаар хангах, аж ахуйн нэгжүүдийнхээ борлуулалтыг дэмжин ипотекийн зээл, хөтөлбөрүүдийг явуулсанд нь Төр засагтаа талархдаг.

Мөн одоо Монголбанк, УИХ-аар яригдаж байгаа оффисийн моргейжийн зээл компаниудад маш том дэмжлэг болно гэж боддог. Цөөхөн компани л өөрийн гэсэн барилга, оффистой байгаа. Ихэнх нь түрээсийн байранд байрлаж, 5, 10 жилийн дараа хананд өлгөсөн зургаа аваад нүүхэд хүрдэг. Хэдэн жил түрээс төлсөн ч, эцэст нь хоосон хоцордог. Нэгэнт л үйл ажиллагаагаа тогтвортой явуулж, ажлын байр бий болгон, улсад татвараа төлж байгаа компаниуддаа ядаж оффисийг нь яагаад зээлээр өгчихөж болохгүй гэж. Гэтэл тухайн компанид ажиллаж буй иргэд байгууллагынхаа тодорхойлолтоор ипотекийн зээлд хамрагдаж байртай болдог. Тэгвэл тэднийг ажиллуулж буй компани нь яагаад зээлээр оффис авч болдоггүй юм бэ. Арилжааны банкуудын найдвартай зээлдэгч, хамтрагч, түнш болсон олон олон компани бий. Тэд өөрсдийн гэсэн оффистой болчихвол цаашлаад бизнес нь өргөжиж, үйл ажиллагаанд нь ч эерэгээр нөлөөлнө дөө.

Одоо байгаа орон сууцны илүүдэл нь цаг хугацааны л асуудал. Хуримын ордноор дамжин гэрлэлтээ бүртгүүлдэг хосын тоо жилд 20 гаруй мянга болдог юм билээ. Тэгэхээр жилд олон арван мянган гэр бүл шинээр батлуулж байхад байрны илүүдэл гэдэг зүйл удаан үргэлжлэхгүй байх. Хамгийн гол нь ард түмний худалдан авах чадварыг хэрхэн дээшлүүлэх, орон сууцны үнийг хэрхэн бууруулах, технологийн аргаар хямдруулж болох талуудыг нь сайтар судлах хэрэгтэй.

Хямд төсөр арга гэхээр манайхан өндөр, бүрэн цутгамал барилгуудыг олноор нь бариад байх юм. Дөрвөн талыг нь цементэн ханаар өрчихсөн орон сууцанд хүн нэг насаараа амьдрахгүй, хэзээ нэг өдөр өөрчлөх шаардлага гарна шүү дээ. Бүрэн цутгамал гээд хошуураад баахан барилга барьчих нь хожим үр дагавар ихтэй, иргэдэд ч хохиролтой. Өргөн уудам газар нутагтай, нүүдэлчин соёл иргэншилтэй манай оронд дэд бүтцэд холбогдсон амины орон сууцнууд зохимжтой. Тэгэхээр дэд бүтцээ л сайтар хөгжүүлэх шаардлагатай байна. Энэ бол шүүмжлэл биш, үнэн байдал.

- Мишээл Барилгын Их Дэлгүүрт нээгдэж буй Орон Сууцны Биржийн талаарх таны бодол?

- Бид ард түмэнд хямд зах зээл, үйлчилгээг хүргэх гэж зорьдог. Гэтэл хэдхэн өдрийн хугацаатай явагддаг үзэсгэлэн яармагууд хангалтгүй байдаг. Уул уурхайд, хөдөө орон нутагт ажилладаг байртай болох гэсэн олон хүн бий. Гэх мэтчилэн олон шалтгааны улмаас орон сууцны байнгын үзэсгэлэнг нээх цаг хугацаа, хэрэгцээ шаардлага нь нэгэнт бүрдчихлээ. Үнэхээр цаг үеэ олсон, зөв зүйтэй зүйлийг “Барилга Эм Эн” ХХК, Мишээл Мега Молл төв хамтран зохион байгуулж  байгааг дэмжиж, талархан хүлээн авч байна. Иргэд хүссэн цагтаа орон сууцны байнгын үзэсгэлэнг үзэх боломжтой боллоо.

Төр амархан солигддог, тогтворгүй бодлоготой байгаа бол хувийн хэвшлийнхэн, төрийн бус байгууллагууд нь өөрсдөө тогтмол үйл ажиллагаа явуулж, байнгын үзэсгэлэн шиг үр дүнтэй ажлуудыг санаачлан хэрэгжүүлэх хэрэгтэй. Тэгвэл төр аяндаа үйл ажиллагааг нь дэмжээд эхэлнэ шүү дээ. Тиймээс Орон Сууцны Бирж бол энэ салбарын бодлогыг гаргахад, иргэдийн эрэлт хэрэгцээг хангахад, борлуулалтыг дэмжихэд ихээхэн чухал түлхэц үзүүлэх алхам болно.

Хямралыг “боломж” болгон харж, олон зүйлийг санаачлан хэрэгжүүлж байгаа компаниудаа бид талархан дэмжих ёстой. Эдийн засгийн хямралтай уялдуулаад зарим компани хямд мөртлөө чанартай бүтээгдэхүүн, үйлчилгээ гаргах гэж хичээж байна. Тэгэхээр хямралын болон эдийн засгийн хөгжлийн үеийн технологийн хөгжлийн хооронд эрс тэс ялгаа бий. Тиймээс хямралын үед эрэл хайгуулыг сайтар хийж, гарц олж чадвал иргэдийг хямд өртгөөр барьсан орон сууцаар хангах боломжтой болно. Хамгийн сайн, хамгийн хямд, стандартын шаардлага хангасан барилгын материал, технологийг хөгжүүлэхийн тулд тасралтгүй эрэл хайгуул хийж, хөдөлмөрлөх л хэрэгтэй.
Үндэсний компаниуд маань нэгдэж, хямралын шуурганд амархан автаж, гадаадын аль нэгэн компанид хялбархан буугаад өгчихөөргүй, дархлаа сайтай болох шаардлагатай байна. 

- “Гэрэгэ” группийн ойрын хугацаанд хэрэгжүүлэх ажлын төлөвлөгөө юу байна?

- Барилгын салбарынхаа үүсэл хөгжлийн 90 жилийн ойд зориулаад бүтээн байгуулалтын ажлуудад идэвхтэй оролцохоор төлөвлөж байна. Технологийн шинэчлэл, хүний хөгжил, нийгмийн хариуцлагынхаа хувьд хийсэн, бүтээсэн зүйлтэй үлдэхийг зорьж байгаа. Манай хамт олон Баянгол дүүрэгт өрхийн эмнэлэг барьж, цөөн тооны худаг гарган, Япон, Солонгос улсаас нарийн мэргэжлийн эмч нарыг авчирч эмнэлгийн үзлэг оношилгоо хийлгэх зэргээр нийгмийн хариуцлагынхаа хүрээнд бага ч гэсэн зүйл хийсэн.

Мөн бизнесийн байгууллагынхаа хувьд, өвлийн улиралд хэрэглэх технологийг ашиглаж, “Буянт-Ухаа” хорооллын цэвэрлэх байгууламжийг барьж, цаашид ч олон аймаг, сум сууринд гүйцэтгэж болох ажил юм гэдгийг баталсан. Энэ ажлыг гүйцэтгэж байхад Ус сувгийн удирдах газар, Мэргэжлийн хяналтын ерөнхий газраас барилгын ажлыг зогсоохыг шаардсан хэд хэдэн албан бичиг ирсэн. Бид хариуд нь технологийн картаа шалгуулж, тайлбар хийсэн. Ийм технологийг гүйцэтгэхэд дулааны улиралд хийснээс арай илүү зардал гардаг ч, цаг хугацааг хэмнэсэн маш үр дүнтэй арга учраас хөгжүүлэх гэж хичээж байна.

Тэгэхээр “Гэрэгэ” групп хүйтний улиралд барилга угсралтын ажлыг хэвийн явуулах технологийн шинэчлэлтийг норм, дүрэмтэйгээ уялдуулж, салбарынхныхаа дэмжлэгтэйгээр хийхийг зорилоо. Энэ чиглэлээрээ төрийн болон төрийн бус мэргэжлийн байгууллагууд, хувийн хэвшлийнхэнтэйгээ хамтарч ажиллахыг хүсч байна. Бид бусад компаниудтайгаа хамтарч, дотоодынхоо нөөц боломж, чадамжийг дээшлүүлж, тусгай зориулалтын буюу орон сууцны барилга байгууламж барих тал дээр идэвхтэй ажиллах болно. Цэвэр ус, цэвэрлэх байгууламжийн салбарт ч технологийн дэвшлийг нэвтрүүлсэн ажлуудыг хийхээр төлөвлөж байна.

- Сүүлийн асуултыг танд үлдээе.

- “Хүний нүднийхээ хэмжээгээр бус, ухааныхаа хэрээр аливаа юмсыг хардаг” гэж аав минь хэлдэг байсан. Энэ үг надад хамгийн хүндтэй сэтгэлийн, итгэлийн их цацал болж, ивээж явдаг. Үүний нэгэн адил, барилгын салбарынхан алсыг харсан, технологийн дэвшилд хөтөлсөн бүтээн байгуулалтуудад анхаарч, хоорондоо хамтарч, эвлэлдэн нэгдэж ажиллаасай. Яагаад гэвэл Монголчуудыг хамтарч, томоохон бүтээн байгуулалтуудыг хийж чадахгүй, эсвэл чадахгүй юм шиг харагдуулах гэсэн хүсэл, зорилготой хэсэг байдаг юм шиг санагддаг.

Гэтэл бид барилга бүтээн байгуулалтаа өөрсдөө хийж чаддаг болсон, урьд нь ч гадаад орнуудад хүмүүсээ сургасан уламжлалтай, одоо ч Солонгос, Япон гээд хөгжингүй орнуудад суралцаж, ажиллаад ирсэн чадварлаг залуус ч олон байна. Тиймээс Монголынхоо барилгын салбарын ахмадууд, залуу үеийнхэндээ Барилгын салбар үүсч хөгжсөний 90 жилийн ойн баярын мэндийг хүргээд, санхүүгийн бэрхшээлтэй, хямралтай байгаа ч муу үг, муухай бүхнийг хэлэлгүйгээр хөдөлмөрлөж, бүтээцгээе л гэж хэлье.

Бидний суралцангаа хийж бүтээх гэж хичээж буй энэ цагт 90 жилийн ойн баяр давхцаж буй учраас их бүтээн байгуулалтын ард гарчихсан ахмадууддаа хүндэтгэл үзүүлсэн, ирээдүй хойч болсон залуустаа урам хайрласан сайхан жил болно гэж найдаж байна. Ер нь барилгын салбарын сайн сайхныг илүү тод томруунаар гаргаж ирэхэд Төр засаг болон төрийн бус байгууллага, хувь хүн, аж ахуйн нэгжүүд бид бүгдээрээ идэвхтэй оролцох ёстой. Энэ шаардлагынхаа дагуу салбарынхан маань энэ жилд илүү өндөр хариуцлагатай, бүтээмж ихтэй, эв нэгдэлтэй ажиллана гэж бодож байна.

Соёл урлагийн салбарт 600 гаруй гавъяат байдаг гэсэн судалгааны дүнг 2010 онд гаргасан байдаг. Харин барилгын салбарт 90 орчим, авто замын салбарт 30 гаруйхан гавъяат бий. Гэтэл манай улс аялал жуулчлал, урлаг соёлын орон болж чадаагүй шүү дээ. Тиймээс зөв хүмүүсээ зөв цагт нь зөв үнэлээсэй гэж хүсмээр байна. Ойн баяртай нь холбогдуулаад барилгын салбарт бүтээн байгуулах үйлсэд амьдралаа зориулсан, зориулж буй тэр хүмүүсийн хөдөлмөрийг үнэлж, төр засгаас гар таталгүй хүндэтгэн урамшуулаасай.
 

Зав гарган бидэнтэй ярилцсан танд баярлалаа.


Холбоотой мэдээ