Маргааш буюу тавдугаар сарын 13-ны өдөр “Авьяаслаг цонх үйлдвэрлэгчид” урлагийн бага наадам болох гэж буй. Үүнтэй холбогдуулан тус наадмыг зохион байгуулагч “Монголын цонх хаалга үйлдвэрлэгчдийн холбоо”-ны Гүйцэтгэх захирал Б.Отгонбаяртай ярилцлаа.

-“Авьяаслаг цонх үйлдвэрлэгчид” урлагийн баг наадмын эхний шалгаруулалт амжилттай болж өндөрлөлөө. Сүүлийн шатны “Гала” тоглолтын бэлтгэл ямар шатандаа явж байна?
 
Оролцсон байгууллагууд хамт олноо нэгдсэн зохион байгуулалттайгаар маш сайн бэлдэж, арга хэмжээг хүндэтгэж оролцож байгаа нь тоглолтын эхлэлээс дуустал харагдсан. Зохион байгуулагчийн зүгээс сэтгэл хангалуун байгаа, авьяаслаг залуус олон байна. Нөгөө Монголчууд авьяастай юу гэсэн асуултад хаана ч тийм л юм байна гэж бодогдсон. “ГАЛА” тоглолт болоход ердөө 1 хоног үлдсэн байна, бэлтгэл ажил хангагдсан. Бид эхний шалгаруулалтаа МҮЭСО-ний бага танхимд хийсэн, харин “Гала” тоглолтоо Цэргийн дуу бүжгийн эрдмийн чуулгын тайзнаа хийхээр болсон. Энэ нь хэд хэдэн шалтгаантай. 1-рт, Гала тоглолт, 2рт концертийн тайз, хөгжмийн дуугаралт мэргэжлийн түвшинд байх, 3-р Урлагийн бага наадмын чанар, үнэ цэнэ гэх мэт олон зүйлийг ярилцаж сонголтоо өөрчилсөн. Урлагийн бага наадмыг мэргэжлийн шүүгчид шүүж, Гала тоглолтын найруулгыг мэргэжлийн найруулагч найруулж байгаа, мөн Мэргэжлийн Холбоо санаачлан зохион байгуулж байгаагаараа онцлог юм.

 

-Мэргэжлийн Холбоо санаачлан зохион байгуулж байгаагаараа онцлог гэдгийг жаахан тодруулбал?
 
Магадгүй МУ-ийн хэмжээнд Мэргэжлийн Холбоо анх удаа урлаг, соёлын нэгдсэн системтэй арга хэмжээг зохион байгуулж байгаа болов уу? Өмнө нь хэсэгчилсэн концерт, янз бүрийн соёлын арга хэмжээ энд тэнд болж байсан л байх. Гэхдээ манай бага наадмын онцлог нь 1,2 шаттай, мэргэжлийн найруулга, мэргэжлийн шүүгчидтэй зохион байгуулагдаж, тэндээсээ шилдгүүдийг нь тодруулж, дараа дараагийн арга хэмжээнүүдэд барилгын цонх хаалга, шилэн бүтээц  үйлдвэрлэгчдийг төлөөлж оролцох, магадгүй цаашлаад улсын хэмжээний томоохон шоунд барилгачдын төлөөлөл болон оролцох авьяастануудыг тодруулах эхлэлийг тавьж байгаа юм.
 
Аль ч салбар урлаг, спортын арга хэмжээг орхигдуулж болохгүй. Урлаг, соёлын арга хэмжээгээр дамжуулан бусдыг соён гэгээрүүлэх, гоо зүйн болон сэтгэлийн таашаал, эерэг сайхан энерги түгээдэг учир энэ чиглэлийн арга хэмжээ зайлшгүй байх ёстой гэж бид үздэг. Манай улсад олон улсын шоу ертөнцийн том контентуудыг нэвтрүүлж, далайцтай шоунуудын төрөл олширч байна, түүнд салбар бүр дотооддоо нуугдмал авьяастнуудаа тодруулж, тэднийгээ улсын хэмжээний томоохон шоу оролцоход нь гүүр болж, авьяасыг нь хөгжүүлэхэд дэмжих, туслах түүгээр дамжуулан салбараа олон талаар таниулах гэх мэт хамтын ажиллагаа орхигдоод байх шиг харагддаг.
 
-Нээрэн тийм шүү, энэ чиглэлийн арга хэмжээ социализмын үед их байсан одоо дутагдаад байна гэж хүмүүс их ярьдаг.   
 
Яг үнэн, социализмын үеэс хүмүүст хамгийн тод үлдсэн хэсэг нь урлаг, уран сайхны арга хэмжээ байдаг.
 
-Урлагийн бага наадамд нийтдээ хэдэн төрлөөр хэчнээн авьяастан оролцож байгаа бэ? Бас ямар байгууллагууд хамтран зохион байгуулж байгаа бэ?
 
Дуу, Бүжиг, Хөгжил, Язгуур урлаг, Гоц авьяас гэсэн урлагийн 5 төрлөөр 50 гаруй оролцогчид оролцож байна. Манай холбоо санаачлан Барилга хот байгуулалтын яам, Монголын барилгачдын үйлдвэрчний эвлэлүүдийн холбоотой хамтран Барилгын салбарын “ТҮҮХТ 90” жилийн ойн хүрээнд зохион байгуулж байгаа, түүхэн ойтой давхцаж байгаад бид баяртай байгаа.
 
-Аливаа арга хэмжээг зохион байгуулахад гол асуудал санхүүжилт байдаг. Та бүхэн эдийн засгийн хүндхэн цаг үеийг сөрж, нэлээдгүй хөрөнгө шаардагдах ажил зохион байгуулж байна. Энэ талаар?
 
Зөв сэдэв хөндлөө, баярлалаа. Манай улсын хувьд мэргэжлийн холбоод санхүүгийн хувьд тийм ч сайн бэхжээгүй байгаа нь нууц биш. Харин энэ арга хэмжээний санхүүжилт төвөггүй боссон. Бид хэд хэдэн компанийн удирдлагуудтай уулзаж, арга хэмжээнийхээ зорилгыг танилцуулж, эдийн засаг хүндхэн, хүмүүсийн сэтгэл гундуухан байгаа ч их бүтээн байгуулалтын улирлыг урлаг, уран сайхны эерэг энергиэр эхлүүлэх зорилготой, танай байгууллага ивээн тэтгэж хамтран ажиллаач гэсэн саналыг тавихад 1, 2 хүндэтгэх шалтгаан хэлсэн газруудыг эс тооцвол бусад нь уриалагхан хүлээн авсан. Энэ салбарт хэрэгтэй байгаа зөв ажил зохион байгуулж байна, бид дэмжин гэдгээ шууд илэрхийлсэн.
 
Эдгээр байгууллагууддаа хамтран зохион байгуулагчдынхаа өмнөөс талархал илэрхийлье. Гэр групп компанийн “Монпласт брэнд” /хуванцар бэлдэц/ мөн Актив хийц, Шилэн хийц, Гурван буга, Үлэмж, Их азар, Анжел стар, Пийс алюминум, Дега Монгол, Нью виндөү, Батлалт компаниудад маш их баярлалаа.
 
Мөн мэдээллийн ерөнхий ивээн тэтгэгчээр ажиллаж буй “Барилга Эм Эн” ХХК,  ФМ 100.5, ФМ 100.1, ФМ 99.3, ФМ 96.3, ФМ 88.8 хамтран ажиллаж байгаад талархал илэрхийлье. Урлагийн бага наадмын тоглолтын мэдээлэл www.barilga.mn, www.mcud.gov.mn сайтууд болон сошиал хуудасууд, манай холбооны Mongolian windows and doors manufacturers association фэйж хуудсаар олон нийтэд хүрсэн байгаа.   
 
-“Гала” тоглолтын билет хаагуур зарагдаж байгаа бэ?
 
Билет 5000 төгрөгийн үнэтэй. Манай Холбооны оффисоор зарагдаж байгаа. Билетний борлуулалт 90 хувьтай байгаа, одоо цөөхөн хэдэн билет үлдсэн. Авахыг хүссэн хүмүүс 460054, 91928731 утсаар холбогдож авч болно.
 
-Танай Холбооны дараагийн урлаг, спортын арга хэмжээ юу байгаа бэ?
 
Тун удахгүй манай холбоо байгуулагдсан цагаасаа жил бүр зохион байгуулдаг “Шилжин явах цом”-той САГСАН БӨМБӨГИЙН ТЭМЦЭЭН энэ сарын 28-ны өдөр болох гэж байна.
 
-Энэ Баасан гаригт болох “ГАЛА” тоглолтод  нь амжилт хүсье.
 
Баярлалаа. Барилгачиддаа их бүтээн байгуулалтын ажилд нь амжилт хүсье.