​Барилгын бүх төрлийн үйлчилгээ Мишээл Барилгын их дэлгүүрт төвлөрлөө

​Барилгын бүх төрлийн үйлчилгээ Мишээл Барилгын их дэлгүүрт төвлөрлөө
     Дөрвөн сарын өмнө Дүнжингарав худалдааны төвд нээгдсэн Төрийн нэг цэгийн үйлчилгээг Мишээл Барилгын их дэлгүүрт нээх ёслолын ажиллагаа өнөөдөр боллоо. Нээлтийн ёслолын ажиллагаанд Нийслэлийн засаг дарга бөгөөд Улаанбаатар хотын захирагч Э.Бат-Үүл, НИТХ-ын дарга Д.Баттулга, Монголын Банкны холбооны гүйцэтгэх захирал Ж.Үнэнбат, ТОСК, НОСК болон төрийн байгууллагуудын төлөөллүүд оролцлоо.

     Хан-Уул дүүргийн хоёрдугаар хороонд байрлах “Нийслэлийн Үйлчилгээний нэгдсэн төв”-д нийслэлийн нутгийн захиргааны 22 байгууллага төвлөрч, өдөрт 4,800 гаруй иргэнд 287 төрлийн үйлчилгээг хүргэх хүчин чадалтай юм. Энэхүү төв нь барилгын холбогдолтой бүх төрлийн мэдээлэл, үйлчилгээг нэг дороос иргэдэд олгох юм.



     Ингэхдээ, 1,336 м2 талбайтай үйлчилгээний танхим, өөртөө үйлчилэх танхим, оффис, уулзалт, хурлын өрөө, банкны үйлчилгээ, ёслол хүндэтгэлийн тайз, серверийн өрөө, хяналтын камерын өрөө, нотариат, үйлчилгээний мэдээлэл ба санал хүсэлтийн хэсэг, хүлээлгийн танхим тус төвд байрлаж, НЕТГ, НӨХГ, ТОСК, НОСК болон Эд хөрөнгийн эрхийн бүртгэл, Нийслэлийн нэг цэгийн үйлчилгээ үзүүлэх, Орон сууцны биржийн үйл ажиллагаа явагдана.



Нийслэлийн засаг даргын Тамгын газрын дарга Ё.Гэрэлчулуун, Дүнжингаравын Нэг цэгийн үйлчилгээний төвөөр 60 гаруй мянган хүн үйлчлүүлснээс харахад энэ төрлийн үйлчилгээ иргэдэд ихээхэн хэрэгтэй, эрэлттэй байдаг нь харагдаж байна. Тиймээс өнөөдөр Мишээл барилгын их дэлгүүр дэх Нэг цэгийн үйлчилгээ төлөвлөсний дагуу нээлтээ хийлээ. Барилгын бүх төрлийн үйлчилгээ нэг дор төвлөрч буйгаараа онцлогтой. ТОСК, НОСК, Орон сууцны бирж, Гэр хорооллын дахин төлөвлөлтийн газар энд төвлөрч, орон сууц болон барилгатай холбоотой бүхий л асуудлыг шийдэх боломжтой боллоо.

Мөн ирэх Даваа гаригт Сонгинохайрхан, Баянгол дүүргийн иргэдэд зориулсан дараагийн Төрийн Нэг цэгийн үйлчилгээг Драгон төвд нээх гэж байна. Тэнд газрын харилцааг төвлөрүүлж, мөн 280 гаруй үйлчилгээг иргэдэд үзүүлэхээр төлөвлөсөн. Ингэснээр 2016 онд хийхээр төлөвлөсөн гол гурван үйлчилгээний төв үйл ажиллагаагаа эхлүүлж байна.

Дүнжингаравт Баянзүрх, Мишээлд Хан-Уул, Драгонд Сонгинохайрхан, Баянгол дүүргийн Тамгын газруудаас төвлөрч ажиллана. Эцсийн үр дүн нь, иргэд маань төрийн үйлчилгээг авахын тулд олон тийш явж цаг заваа алдахгүй, хүнд суртал чирэгдэлгүй үйлчлүүлэх болно. Цаашлаад төрийн үйлчилгээг онлайн хувилбарт шилжүүлэхээр төлөвлөлөө. Эдгээр өөрчлөлттэй уялдаад байгууллагуудын бүтцэд мөн өөрчлөлт орно. Үйлчилгээний шинжтэй ажлын байрууд нэмэгдэн тархаж, бодлогын чанартай удирдлагын ажилтнууд төвдөө ажиллахаар болж байна.



Нийслэлийн засаг дарга бөгөөд Улаанбаатар хотын захирагч Э.Бат-Үүл, Юуны өмнө Мишээл Нэгдсэн төвийг ашиглалтад оруулахаар ажилласан бүх хүмүүст талархал илэрхийлье. 2012 оноос нийслэл хотод олон өөрчлөлт хийсний нэг нь авто замыг өргөжүүлж, түгжрэлийг бууруулсан явдал байсан. Цаг нартай уралдан олон зүйл хийсний нэг нь сайн засаглалыг бүрдүүлэх явдал байсан. Төрийн байгууллагын сайн засаглалыг бий болгохын тулд төрийн захиргааны үйлчилгээний 260 орчим үйлчилгээг бүртгэх, тэдгээрийг лангуун дээр тавьж иргэдэд шууд хүргэх супермаркетыг байгуулах шаардлагатай болсон. Муу засаглалтай байвал Улаанбаатар хот хөгжихгүй, хөгжих боломжоо ч алдана гэсэн үг.

Тиймээс ард иргэдийн оролцоотой сайн засаглалыг бий болгохын тулд удтал ярилцаж, зөвшилцсөний дүнд хүний амьдралд хамгийн хэрэгтэй зүйлсийг төвөггүй өгчихдөг супермаркет шиг төрийн үйлчилгээг иргэдэд чирэгдэлгүй хүргэдэг болгоё гэж шийдсэн. Худалдан авагчид супермаркетын захирал, эзэн хэн байх нь хамаагүй, хүссэнээ аваад л гардаг. Яг үүнтэй адил, Төрийн үйлчилгээг супермаркет шиг болгож, дарга нарын ширээн дор байгаа эрх мэдлийг лангуун дээр гарган тавьж байна. Дулаан, цахилгаан, газрын зөвшөөрлийн асуудлыг шийдэх бүхий л үйлчилгээг энд тавьчихлаа.

Төрийн байгууллагууд татвараар дамжуулаад иргэдэд хүргэх үйлчилгээнийхээ төлбөрийг авчихсан учраас тэдэнд үйлчлэх л ёстой. Лангуун дээр суусан үйлчилгээний ажилтнууд иргэдэд үйлчлэхгүй байх арга ч байхгүй болсон. Тун удахгүй барилгын дулааны нөхцөлүүдэд техникийн шаардлага олгох зөвшөөрлийг лангуун дээр тавихаар бэлтгэж байна. Хэн нэгэн даргаас иргэд маань үйлчилгээ авахын тулд гуйж, араас нь хөөцөлдөж явж болохгүй. Ухаалаг картаар автобусанд сууж хэвшсэн шиг төрийн үйлчилгээг лангуун дээрээс авах болно. Хэсэг хугацааны дараа энэ нэг цэгийн үйлчилгээгүйгээр иргэдийн амьдралыг төсөөлөхөөргүй болсон байх болов уу.Би ч бас хэзээ нэг өдөр тэтгэвэртээ гараад, энэ цэгт үйлчлүүлэх болно. Тиймээс энэхүү төв нь алс ирээдүйгээ бодсон маш оновчтой алхам болсон гэдэгт итгэж байгаа. 













 

Холбоотой мэдээ