Урин дулаан улиралтай зэрэгцэн жил бүрийн хавар зохион байгуулагддаг “Barilga Expo 2016” Орон сууцны үзэсгэлэн Мишээл Экспо төвд нээлтээ хийлээ. 2016 оны 5-р сарын 6-наас 8-ныг хүртэл буюу энэ амралтын өдрүүдэд үргэлжлэх тус үзэсгэлэнд Улаанбаатар хотод хэрэгжиж буй орон сууцны 130 гаруй төсөл хэрэгжүүлэгч компаниуд оролцож байна.

             Энэхүү үзэсгэлэн нь иргэдэд шинэ орон сууцны бүхий л мэдээ мэдээлэл, сурталчилгаа, ипотекийн зээлд хамрагдах арилжааны банкуудын зөвлөмжийг хүргээд зогсохгүй барилгын компаниудад төслөө сурталчлах, зорилтот худалдан авагчдад нь нэг дороос олон төрлийн мэдээллийг хүргэх давуу талтай.

            Үзэсгэлэнд ипотекийн найм, таван хувийн зээлд хамрагдах боломжтой стандарт орон сууцнууд төдийгүй, ухаалаг дэвшилтэт технологи ашиглан, ногоон байгууламжийг байгуулан тав тух, тансаг орчныг бүрдүүлсэн дээд зэрэглэлийн орон сууцнууд гээд үнэ ханшийн зөрүүтэй бүхий л зэрэглэлийн байрыг танилцуулж байна.

              Урьдчилгаа төлөлтөөс хамаарсан үнийн хөнгөлөлт үзүүлэх, тавилга, цахилгаан барааны дэлгүүрээс бүтээгдэхүүн сонгоход олгох урамшуулал, гэр бүлээрээ амралт сувилалд явах эрхийн бичиг, тэр ч бүү хэл байраа захиалаад Lexus-570 машин хожих супер хонжвор бүхий худалдааг ч оролцогч компаниуд явуулах тул байр авахаар сонирхогч та бүхэнд азаа үзэх боломж бий шүү.

             Байр худалдан авагч болон борлуулагчдыг холбож, нэг дор уулзах боломжийг олгон, тухайн жилийн орон сууцны үнэ ханшийг үнэн бодитоор тодорхойлоход “Barilga Expo 2016” Орон сууцны үзэсгэлэн нь чухал ач холбогдолтой билээ. Тэгэхээр иргэд та бүхэн олон газар хэсч, цаг заваа дэмий үрэхгүйгээр, гуравхан хоног үргэлжлэх энэ үзэсгэлэнгээс хүссэн бүх мэдээллээ авах боломж байгааг дуулгая.

Үзэсгэлэнгийн өдрүүд хязгаартай тул амжиж очоод, хүссэн мэдээллээ аваарай гэж та бүхнийг урьж байна.