Байгальд ээлтэй шинэ дэвшилтэт технологийг ямагт дэмжин ажилладаг “БАРИЛГА.МН” сэтгүүл энэ дугаартаа Ногоон барилгын технологи, түүнийг нэвтрүүлэх ажлын явц манай улсад ямар ахицтай байгаа талаар онцлон мэдээллээ бэлтгэлээ.

     Дэлхий нийтээрээ хүрээлэн буй орчин, хүний эрүүл мэндийг дээдэлсэн технологийг бүхий л салбарт нэвтрүүлэх гэж хичээж буй энэ цагт монголчууд бид ч барилгын салбартаа ухаалаг хэрэглээг эрхэмлэж, нийгмийн хариуцлагатай байх нь чухал болоод байна. Тиймээс салбарын дуу хоолой, соён гэгээрүүлэгчийн хувиар бид олон улсын түвшинд хэдийнэ хэрэглээнд нэвтэрч эхлээд буй Ногоон барилгын бодлогыг манай улсад хэрхэн хэрэгжүүлж, төр засгаас арга хэмжээ авч байгаа талаар онцоллоо.

     Ногоон эдийн засаг нь барилгын салбарт ямар дэвшил авчрах, хүн ба нийгмийн амьдралд ямар чухал нөлөөтэй болохыг харуулсан нийтлэл мэдээлэл, судалгаа шинжилгээний бүтээлүүдийг сэтгүүлийн шинэ дугаараас хүлээн аваарай.

     Урин цаг ирж буйтай холбогдуулан, манай улсад хамгийн эрэлттэй байдаг 50 ам метр талбайтай амины орон сууц барих зөвлөмж, хот хөдөө гээд хаана ч суурилуулан ашиглах боломжтой бохир усаа өөрсдөө цэвэршүүлэн шүүж саарал ус болгох бага оврын цэвэрлэх байгууламж, саарал усны хэрэглээний талаарх судалгаа мэдээлэл ч энэ удаагийн дугаарт багтсаныг дуулгая.



     Мөн “Барилга Эм Эн” ХХК-ийн Судалгааны албанаас уншигч та бүхэнд тусгайлан зориулсан Улаанбаатар хотын хаусны зах зээлийн судалгаанаас хэрэгтэй мэдээллээ ашиглах боломжтой шүү.



     Монгол уламжлал, өв соёлоо барилга архитектурт шингээн хойч үедээ өвлүүлэн үлдээхэд үнэтэй хувь нэмэр оруулж, сэтгэл зүтгэл гарган ажиллаж яваа нэгэн эрхмийг сэтгүүлийн хүндэт зочноор урьж ярилцлаа. Энэ эрхэм бол Монгол ур хийц, үндэсний хэв маягаа шингээсэн Их Майдар төсөл, Цонжин Болдогийн Чингис хааны хөшөөт цогцолбор, Морин хуур цамхаг, Алтан орд зочид буудал зэрэг архитектур дизайны олон сайхан бүтээлээрээ бидний танил болсон МУГЗ, Дэлхийн оюуны өмчийн алтан медальт Д.Эрдэмбилэг юм.



     Барилгыг амьдралын утга учраа болгон, нэгэн насны амьдралаа зориулж, бүтээн байгуулалтын түүхэн хөгжилд гар бие оролцож явсан ахмад барилгачин У.Дархижавын дурсамж, уламжлалт хэв маягийг орчин үеийн загвартай хослуулсан интерьерийн шийдэл, олон нийтийн сүлжээгээр өрнөсөн жиргээ, постууд, Хуулийн буланд онцолсон Барилгын тухай хуулийн шинэчилсэн найруулга нь холбогдох дүрэм журамгүйгээр хэрэгжих боломжгүй тухай мэдээлэл зэргийг манай сэтгүүлээс хүлээн авч уншаарай.