Азийн хөгжлийн банкнаас манай улсын “Хөвсгөл нуурын байгалийн цогцолбор газарт иргэдийн амьжиргааг дээшлүүлэх, аялал жуулчлалыг тогтвортой хөгжүүлэх”, “Баруун бүсийн бага сургуулийн дотуур байрны орчинг сайжруулах”, “Төлбөрийн чадварт нийцсэн орон сууц төслийн бэлтгэл ажлыг хангах” гурван төсөлд долоон сая ам.долларын санхүүжилт олгохоор болжээ. Уг төслүүдийн гэрээнд Азийн хөгжлийн банкны Монгол дахь суурин төлөөлөгч Роберт Шоэллхаммэр болон Сангийн сайд Б.Болор нар өнөөдөр гарын үсэг зурна. Эдгээр төслүүдийн нийт санхүүжилтийн эх үүсвэрийг Японы засгийн газрын Ядуурлыг бууруулах сангаас буцалтгүй тусламж хэлбэрээр олгож байгаа юм. Өнөөдөр Монгол-Япон төвд болох ёслолын ажиллагаанд Монгол Улсад суугаа Онц бөгөөд бүрэн эрхт Элчин сайд Такенори Шимизү, Байгаль орчин ногоон хөгжил аялал жуулчлалын сайд Н.Батцэрэг, Боловсрол соёл шинжлэх ухааны сайд Л.Гантөмөр, Улаанбаатар хотын дэд дарга С.Очирбат оролцох аж.