Фэн шуйг орчин үеийн барилгатай зохицуулах нь

Фэн шуйг орчин үеийн барилгатай зохицуулах нь
        Фэн Шуй нь хүн бүрийг хүрээлэн буй орчиндоо уялдуулж арга бэлэгдлээр харилцах талаарх Хятадын гүн ухаан юм. Англи хэл дээр шууд утгаараа "Салхин ус" хэмээн орчуулагддаг. Хятадын метафизик таван урлагийн нэг бөгөөд орчин үеийн урлагийн холимог аж. Фэн Шуй гэдэг бол орчлон ертөнц, газар дэлхий, хүн төрөлхтнийг хамтад нь багтаасан "Үл үзэгдэх хүчин" юм. Үүнд  ус, од, луужин гэсэн хэв маягийг ашигладаг. Түүхээс үзэхэд, Хятадад 1960-аад оны соёлын хувьсгалын үед Фэн Шуйг хориглосон ч түүнээс хойш нэр нөлөө нь дэлхийд түгсэн. Дорнын улсууд ихэвчлэн барилга, байгууламжиндаа өргөнөөр ашиглаж ирсэн байна. Тухайлбал, бунхан болоод сүнслэг чухал ач холбогдолтой газартаа мөн орон сууц бусад барилга байгууламждаа бэлэгдэл бас уламжлал болгон ашигладаг ажээ.

Та өөрийн аж амьдралдаа Чи-ийн урсгалыг тааламжтай, тэнцвэртэй болгож чадвал аз жаргалтай сайхан амьдрах үлэмж бололцоог бий болгох гэнэ. Ингээд та бүхэнд сонирхуулах үүднээс зарим зөвлөмжийг танилцуулъя.

ЦОНХНЫ САРААЛЖИН ТОР

Амжилтын тор:
Дээшээ заасан суман хэлбэртэй тор. Энэ нь эзэддээ амжилт, албан тушаал ахих эерэг нөлөө үзүүлнэ. Албан тушаал, нэр хүндээ ахиулах хүмүүст ээлтэй.
Дөрвөлжин хээтэй тор:
Тэгш өнцөгт хээтэй тор нь тогтвортой байдлыг бэлэгдэнэ.
Мөнгөний тор:
Зоосон хээтэй тор нь мөнгийг бэлэгдэнэ. Ийм хээтэй тор нь байшинд эд баялагыг дууддаг.
Дугуй хээтэй тор:
Байшингийн эзэд нь нийгмийн амьдралд идэвхитэй оролцогчид, амьдрал нь өөдрөг байна. Ийм тор нь дипломат ажилтнууд, худалдааны гүйцэтгэх албан тушаалтнууд, бизнесменүүдэд ээлтэй гэнэ.

ХААЛГАНЫ ЗАГВАРУУД

Дан модон хаалга:
Дотогш онгойдог, стандарт хэмжээтэй модон хаалга сайн фэн шүйн нөлөөтэй.
Шилэн хаалга:
Сөрөг фэн шүйг үүсгэдэг. Чи энерги шилэн хаалгыг хялбархан нэвтлэн орох тул эздийнхээ хүч энергийг сордог ба найз нөхөд, хөршүүдээсээ нууж хадгалах гэрийн нууц гэж байхгүй болох аж.
Гүйдэг шилэн хаалга:
Гурвалсан хаалга чи энергийг илүү ихээр нэвтрүүлнэ. Орж гарахад хялбар тул гэрийн эзэд хөрөнгө, мөнгө хурааж, цуглуулахад хүндрэлтэй.
Хоёр хавтастай хаалга:
Муу фэн шүйтэй. Жижгэвтэр хувийн сууц ийм хаалгатай байх нь тэнцвэрт байдлыг алдагдуулна.
Хагас шилэн хаалга:
Албан газруудад элбэг байх энэ хаалгыг ян хаалга гэдэг. Ийм хаалгатай газрууд үйл ажиллагаанаасаа хамааран голдуу эрт онгойж эрт хаадаг. Харин гэр гэдэг бол амарч, тайван байх газар тул ийм хаалга хийхээс зайлсхий.
Эргэдэг хаалга:
Сөрөг фэн шүйтэй. Төмөр махбод нь хөндий хүйтэн шинжтэй тул найз нөхөрлөлийн холбоог үгүйсгэдэг.

ШАТ, ШАТНЫ БАЙРЛАЛ

Гол хаалга руу чиглэсэн шат чи энергийг хэт ялгаруулж, муу фэн шүйг үүсгэнэ. Энергийн урсгал ийн гадагш урсахдаа мөн тийм хэмжээний аз хийморь, хөрөнгийг хаман гарна хэмээн үздэг.

Шатны төгсгөл хэсгийг мурийлгаснаас гэрт орж ирэх чи энергийн урсгал хаагдаж, үүний адил гэрийн эздийг аз, боломжууд орхин одно.

Зарим сууцанд зэрэгцээ шат байдаг. Ийм шат байшингийн гол хэсэгт байрладаг учир байрыг хоёр хэсэгт хувааж эзний хийсэн зүйл, бизнес нь мөн хуваагдаж, хагаслагдах нөлөө үзүүлнэ.

Байшингийн голд байрлах дугуйрсан эргүүлгэн шат нь чи энергийг маш хүчтэйгээр дээш чиглүүлэн гэр бүлийн доторх уур амьсгалд ноцтой өөрчлөлтийг бий болгоно.

Орон сууц блон аливаа барилга цорын ганц шаттай, тэр нь арын хаалгаруу харсан байх ахул энэ нь фэн шүйгийн муу байрлалд тооцогддог. Учир нь арын хаалгаар голдуу хаягдал гаргадаг, ойр орчимд нь хогийн сав байрладаг тул өмхий үнэрт, хорт ша чи энерги гэрт орж ирнэ.

БИЕ ЗАСАХ ӨРӨӨНИЙ ЭЭЛГҮЙ МУУ БАЙРЛАЛУУД
  • Оо-ийн өрөө гэрийн гол хаалганы өөдөөс харсан байвал аз хийморь таныг орхин одно.
  • Зочны өрөө рүү харсан байвал найз нөхдийн холбоо удаан үргэлжилдэггүй.
  • Хооллох өрөөний эсрэг харсан тохиолдолд хүнд ачаа огт хөнгөрөхгүй.
  • Унтлагын өрөөны эсрэг талд байх, эсвэл орлуу чиглэсэн байвал амьсгалын эрхтэнүүд мөн элэг нэн түрүүнд өвчилдөг.
  • Жорлонгийн харалдаа дор унтахаас ямагт зайлсхий. Хийморь доройтон, өөдлөхгүй.
  • Бие засах өөрөөний хананд ор, ширээг хэзээ ч байрлуулж болохгүй. Муу энерги, бохир чийг биед шингэж, тайван бус, идэвхгүй болно.
  • Загастай аквариумыг гэртээ байрлуулах нь аз авчирдаг. Гэвч жорлонгийн өрөөний хажууд байрлуулвал эд баялгаа алдах муу нөлөөтэй. Учир нь жорлон усыг гадагшлуулдаг учраас эд баялаг мөн урсаж гарна.
 
Эх сурвалж: Монголын Фэн Шүйгийн төвийн зөвлөх П.Түмэн
Эх сурвалж: Барилга.мн сэтгүүл

Сэтгэгдэл (1)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

    boss 2015-10-05 17:39 202.131.225.147

    i liked