10 хувийн урьдчилгаатай зээлд хэзээнээс хамрагдах боломжтой вэ

10 хувийн урьдчилгаатай зээлд хэзээнээс хамрагдах боломжтой вэ
     Орон сууцны зээлийн урьдчилгаа төлбөрийг 10 хувь болгон бууруулж, 20 хувийн баталгаа гаргах тогтоолыг засгийн газар эцэслэн шийдэж, журмыг баталсантай холбоотойгоор журмын хэрэгжилтэнд иргэд чих тавин хүлээсээр байна. Хэрэгжилтийн талаар иргэдийн дунд тархаад буй зарим асуудлаар сэтгүүлчид Барилга, Хот Байгуулалтын Сайд Д.Цогтбаатараас тодруулга авсан юм.

     Урьдчилгаа 10 хувийн журам хэзээнээс хэрэгжиж эхлэх тал дээр сайд хариу өгөхдөө, “Өнгөрсөн долдугаар сард засгийн газраас журамтай холбоотой бүх шийдвэрийг гаргасан. Тэгэхээр Барилга, Хот Байгуулалтын Яамны зүгээс шалтгаалах зүйл одоо байхгүй. Хамгийн гол нь одоо дараагийн шатны байгууллагууд шийдвэрийг хэрэгжүүлнэ. Мөн 5 яам харилцан тохиролцсон учраас гэрээний зарим хэсэгт засвар хийж, гарын үсэг зурах л ажил үлдсэн. Түүнчлэн үлдэгдэл 20 хувийн баталгааг гаргаж буй Монгол Улсын Хөгжлийн Банкны зүгээс бусад банкуудтай гэрээ байгуулна. Эдгээр шат дараалсан ажлын дараа журам хэрэгжиж эхэлнэ. Өөрөөр хэлбэл, хоногоор тоологдох багахан хугацаа үлдсэн гэсэн үг.” гэлээ.



     Мөн иргэдийн хамгийн их сонирхож байгаа асуудлын нэг болох 80 ам метрийн асуудал засгийн газрын хэмжээнд шийдэгдэх аж. Өмнө батлагдсан журмууд нь бүгд засгийн газрын түвшинд хийгдсэн болохоор 80 ам метрийн асуудлыг мөн авч хэлэлцэх юм байна. Энэ бол хямрал нүүрлээд байгаа эдийн засгийн үед авч байгаа арга хэмжээ учраас нэг үйлдлээр бүх зүйлийг шийдвэрлэхэд маш их эрсдэлтэй байна. Тиймээс хэрэгжилтийг шат дараатай явуулж, 10 дугаар сарын нэгнээс өөрчлөлт оруулна гэдгийг Барилга, Хот Байгуулалтын Сайд Д.Цогтбаатар тэмдэглэсэн юм. Түүний мэдэгдэж буйгаар, 80 ам метр хүртэлх хэмжээтэй байр авч байгаа иргэд 10 хувийн урьдчилгаатай зээл авах бүрэн боломжтой.

     Харин 10 хувийн урьдчилгаатай зээлийн журам 8-р сарын 15-наас хэрэгжиж эхэлнэ гэсэн ойлголт иргэдийн дунд тарсан нь ташаа мэдээлэл аж.

     Журам батлагдах сургаар орон сууцны үнэ өсч байна гэсэн мэдээлэлд сайд татгалзсан хариу өглөө. Харин ч байрны үнэ сүүлийн саруудад буурч байгаа гэсэн мэдээллийг судалгааны байгууллагууд гаргаж байгааг тэрээр онцолсон юм. Зах зээлд нийлүүлэгдэж байгаа нийт орон сууцны гучаад хувьд нь л энэ дэмжлэг хүрч байгаа, бусад нь зах зээлийн хуулиараа эргэлтэнд орж байгаа учраас үнэ өсөх магадлал өндөр байгаа гэж үзэхгүй байгаа аж.
 
Эх сурвалж: Барилга.МН

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.