“BW International” байгууллагаас 25,000 фунт стерлингийн (39,000 ам.доллар) шагналын сантай “Гоёмсог Амины Сууц Барих нь” олон улсын тэмцээнийг зохион байгуулж байна. Энэхүү тэмцээн нь бүртгэлийн хураамжгүй бөгөөд дэлхийн өнцөг булан бүрээс зохион бүтээгчид, оюутан залуус, уран барилгачид оролцох боломжтой аж.

Оролцогчид нь өөрсдийн бүтээлээрээ оршин суугч, хэрэглэгчийн тав тухтай амьдрах нөхцлийг бүрдүүлж чадсан үзэмж төгөлдөр, гоо зүйн өндөр түвшний хэв маягийг агуулсан сайхан гэх тодорхойлолтыг илэрхийлэн харуулах ёстой юм.

Төслийн талбар нь урьд өмнө томоохон нуур болон модлог газраас хүрээлэгдсэн гольфийн зам, клуб, хэд хэдэн сууцаас бүрдсэн барилга, усан дээрх сууц, усан онгоцны зогсоол байсан газарт болох аж.

Сууцны загвар нь 4 том хүн, гурван хүүхэд болон зочдод зориулсан өрөөтэй  байх юм. Мөн барилга, байгалийн орон зайг хослуулсан, практикт ашиглах боломжтой байх ёстой гэнэ. Ингэхдээ дуу чимээнээс зайлсхийдэг, тав тухтай уян хатан орчин, гэрлийн тусгал сайтай болон бусад нарийн нөхцлийг хангасан 7 ам бүлтэй айлд зориулагдсан байх юм.

Тэмцээний гол хүчин зүйл нь загварын өгөгдөл, дижитал А1 самбарууд, талбайн төлөвлөлт, зураг, 3D дүрс зэрэг болно. Мөн оролцогчийн хувь хүний мэдээллийг нууцлах үүднээс хэрэглэгчийн нэрээр оролцуулах аж.

Тэмцээний бүртгэл 9 дүгээр сарын 30-ныг дуустал үргэлжилнэ. Бүртгүүлсэн хувь хүн, баг хамт олонд 8 дугаар сарын 15-ны өдөр тэмцээний талаарх дэлгэрэнгүй мэдээллийг өгөх юм байна.