Энэ удаад заяаны ханьтайгаа хараахан учирч амжаагүй байгаа залуустаа зориулаад хайр дурлалын энергийг гэртээ дуудах  бяцхан зөвлөгөөг хүргэхээр бэлтгэлээ.

        Гэрийн гадна хаалга нь маш чухал элемент. Энергийг чөлөөтэй дотогш оруулахын тулд гадна хаалгаа юун түрүүн цэвэр цэмцгэр байлгах шаардлагатай. Хиртэй, зурагдсан, халцар будаг нь халцарсан, хэмхэрсэн, зэвэрсэн бариултай хаалга нь эерэг энергийг  буцахад хүргэдэг. Мөн даавуу болон бусад зүйлээр бүрээгүй төмөр хаалга ч адилхан. Харанхуй хаалгатай гэрт мөн эерэг энерги орж чаддаггүй учир  орох хаалга нь гэрэлтэй байх ёстой. Иймд хаалганыхаа гадна дотно хоёр талд чийдэн хийж өгөөрэй. Түүнчлэн хаалга руу орох зам нь цэвэр, хог новшгүй байвал зохистой. Үүдний өрөө ч гэсэн гэрэл гэгээтэй, цэвэр, чөлөөтэй байх ёстой. Хайр дурлалын энергийг татахын тулд энэ өрөөндөө улаан, улаан ягаан, улаан хүрэн өнгийн гоё чамин бэлэг дурсгалын зүйл байрлуулах хэрэгтэй. Жишээ нь улаан сарнай эсвэл улаан өнгийн цэцэг байж болно. Мөн толины хоёр талд улаан лаа байрлуулбал зүгээр. Угаалгын болон нойлийн өрөөнд  эсрэг энерги ихээр хадгалагддаг учир хоногтоо нэг удаа лаа асааж байвал зохимжтой. Ер нь гэртээ их гэрэл, цэвэр агаар аль болох ихээр оруулах нь зөв.

    Хайр дурлалыг дуудахын тулд унтлагын өрөөний өнгийг зөв сонгох хэрэгтэй. Цагаан өнгийг үхэгсэдтэй зүйрлэдэг учир маш муу өнгөнд тооцогддог. Харин ягаан өнгийг дурлалт хосуудын хамтын амьдралын гэрэл гэгээ гэж үздэг. Энэ өнгөөр хана өнгөлөхөд тохиромжтой. Мөн цайвар цэнхэр, улбар шар өнгөөр будаж болно. Ганц бие бүсгүйчүүдэд зөвлөхөд нөхөрт гарахыг хүсэж байгаа бол  ягаан, улбар шар өнгийн хөнжлийн даавуу сонгоорой.  Бас нэг чухал зүйл нь унтлагын өрөөнд ямар нэгэн юм нь улаан байх ёстой. Энэ нь чийдэнгийн бүрхүүл, орны бүтээлэг эсвэл хөшиг ч байж болно. Үүн дээр нэмээд дурлалын энергийг татах увидастай хос зүрх,  хос лаа зэргийг өрөөнийхөө аль нэг буланд байрлуулаарай.

     Луу, галт гарьд. Луу нь Ян энергийг ялгаруулж эр хүний жавхааг нэмэгдүүлдэг бол эмэгтэйн энергийг галт гарьд тэтгэдэг. Эдгээр нь чулуу болон металлаар хийгдсэн байх ёстой ба модоор хийж болохгүй. Луу, гарьдийн дүрст эд зүйлээс гадна  хос нугас мөн гэр бүлд аз жаргал авчирдаг. Улбар шар нугаснууд нь гэр бүл бологсдын хүчтэй бэлгэ тэмдэг юм. Нугаснуудыг  хооронд нь улаан туузаар холбож тавьбал сайн бөгөөд шар хүрэн өнгөт чулуу болон шавар, болор, хагас үнэт металлаар газрын өнгөтэй хийвэл сайн. Гэхдээ хамгийн хүчтэй энерги ялгаруулдаг нь ягаан кварцаар хийсэн нугас юм. Ягаан кварцыг  бүх хайр сэтгэлтэй хосуудын чулуу гэдэг.  Мөн улаан хас чулуугаар хийвэл сайн. Хас чулуу нь галын бэлгэ тэмдэг юм. Энерги орших бурхандаа 1 буюу 3 нугас бүү тавиарай. Хэрэв гурван нугас байвал та хойшдын амьдралдаа хууртагдах, мэхлэгдэх, урвалтыг үзэх болно. Хэрэв нугас нь 1 байвал ганцаардлыг үзнэ. Нугасны оронд хос тагтаа, хос галуу ч байж болно. Галууг гэр бүлийн үнэнч байдлыг харуулдаг гэж үздэг.

       Баруун өмнө зүгт эрвээхэй болон гоё сайхан зурагнууд байрлуулбал танд дурлалын аз ирнэ. Эрвээхэй нь заавал хос байх бөгөөд шар, бор, улаан, өнгөтэй байх ёстой. Харин зурагнууд нь  улаан өнгийн цэцэгстэй эсвэл хайр дурлалын сэдэвтэй  байвал сайн. Ганц бие эрэгтэй, эмэгтэй хүмүүс гэртээ ганц хүний дүрс бүхий зураг байлгаж болохгүй. Энэ нь ганцаардлыг илэрхийлдэг.

Гацуур модны боргоцой, царсны боргоцой, туулайн бөөр мод, хуш модны самар, агч модны навчийг цэцгийн том саванд тэнцүү хэмжээгээр тавих нь зүгээр.

Коридорын талын жижиг харанхуй өрөөнд мөлхөө цэцэг тавибал орон гэрийг амгалан тайван байлгаж “урилгагүй зочдоос” хамгаалдаг. Өнгөлөг сайхан ханын цаас наах хэрэгтэй. Мөн өндөр түшлэгтэй сандал, буйданг сэтгүүлийн ширээний хоёр талд тавь. Фэнг шүй номлолоор бол зочны өрөөний түшлэгтэй зөөлөн сандал, буйданг дөрвөлжин хэлбэрээр тавих ёстой. Ингэснээр түшлэг болон тохойлуур нь хамгаалалт болдог байна.