Зөрчилтэй барилгуудын цахилгааныг тасалжээ

Зөрчилтэй барилгуудын цахилгааныг тасалжээ
      Нийслэлийн Засаг даргын Удирдлагын зөвлөлийн хурлаас гаргасан шийдвэр, өгөгдсөн үүрэг даалгаврын дагуу Нийслэлийн Засаг даргын Хот байгуулалт, хөрөнгө оруулалтын асуудал хариуцсан орлогч С.Очирбатын баталсан удирдамжийн хүрээнд иргэдийн амгалан тайван байдлыг хангах, хууль бус үйл ажиллагааг таслан зогсоох үүднээс хяналт шалгалтын ажлын хэсэг байгуулагдан ажилдаа ороод байгаа билээ. Шалгалтыг 2015 оны 7 дугаар сарын 01-нээс 7 дугаар сарын 20-ны өдрийг дуустал явуулах аж.
     Тус шалгалтын зорилго нь эрх бүхий байгууллагын зөвшөөрөлгүй барилга угсралтын ажил эхлүүлсэн, үргэлжлүүлэн барьж байгаа болон газар шорооны ажил эхлүүлсэн, хийж эхэлж байгаа өмчийн бүх хэлбэр зориулалттай барилга байгууламжийн үйл ажиллагаанд хяналт тавих явдал юм.
         Удирдамжийн дагуу 2015 оны 7 дугаар сарын 09- ний өдөр НМХГ-ын Дэд бүтцийн хяналтын хэлтсийн дарга Н.Гантулгаар ахлуулсан ажлын хэсэг Баянзүрх дүүрэгт баригдаж буй зарим барилгад хяналт шалгалт хийжээ. Шалгалтын бүрэлдэхүүнд барилгын техникийн, эрчим хүчний, хөдөлмөр нийгмийн хамгааллын холбогдох улсын ахлах байцаагчид, Нийслэлийн ерөнхий төлөвлөгөөний газар, Нийслэлийн онцгой байдлын газар, Улаанбаатар хотын цагдаагийн цагдаагийн газар, Улаанбаатар цахилгаан түгээх сүлжээ зэрэг холбогдох газруудын төлөөллүүд багтсан байна.
         Тус өдрийн шалгалтаар зөвшөөрөлгүй барилгын ажил эхлүүлсэн 10 барилга байгууламжийг хамруулснаас 2 нь улсын байцаагчийн албан шаардлага, акт гарсаар байхад үйл ажиллагаагаа үргэлжлүүлэн явуулж байсан тул тухайн барилгын угсралтын ажлыг зогсоож, аюулгүй байдлыг хангуулан эрчим хүчний хязгаарлалтыг хийсэн байна.
     Энэ оны эхний хагасын байдлаар Нийслэлийн мэргэжлийн хяналтын газарт орон сууцны зөрчилтэй холбоотой 153 өргөдөл гомдол иргэдээс иржээ. Эдгээрээс одоогийн байдлаар зөрчилтэй нь 78 байгааг илрүүлсэн ба үүний 59 нь барилга байгууламж, 19 нь газар шорооны ажил байгаа аж.
 

Холбоотой мэдээ