Барилгын ажилд хөдөлмөрийн аюулгүй байдал, эрүүл ахуйн шаардлага хангах нийтлэг журам өнөөгийн нөхцөл байдалд тохирохгүй байгаа талаар олонтаа ярьдаг. Ерөөс барилгын салбарт улсын хэмжээнд дагаж мөрдөх аюулгүйн ажиллагааны нийтлэг журам үгүй байна ч гэж учир мэдэх хүмүүс ярьдаг байсан. Учир нь барилгын салбарт хөдөлмөр хамгааллын чиглэлээр нийслэлийн Засаг даргын 175 дугаар журмыг баримталж байсан бөгөөд энэ нь мэдээж Улаанбаатар хотынхоо хэмжээнд хүчин төгөлдөр байв.
   Тэгвэл Барилга, хот байгуулалтын яамнаас санаачилан  Мэргэжлийн хяналтын ерөнхий газар, Эрүүл мэнд яам зэрэг холбогдох байгууллагатай хамтран барилгын ажилд хөдөлмөрийн аюулгүй байдал, эрүүл ахуйн шаардлага хангах нийтлэг журмыг шинэчлэн засч, өнгөрсөн долоо хоногт дээд шатны байгууллагаар батлуулсан байна. Барилгын ажилд оролцогчдын үүрэг, хариуцлагыг тодорхой болгож, хариуцлагын тогтолцоог шинэ шатанд гаргасан энэхүү журмыг улсын хэмжээнд дагаж мөрдөх бөгөөд журмыг тун удахгүй “Барилга.МН” сайтаар дамжуулан бүрэн эхээр нь хүргэнэ.  
Журам хэдийгээр батлагдан бэлэн болсон ч улсын бүртгэлийн дугаараа хараахан авч амжаагүй байгаа юм.