Усны сараана

Усны сараана
        Бельгийн архитектор Винсент Callebaut-ын зохион бүтээсэн “Усны сараана”  нь магадгүй бид хэзээ ч харж байгаагүй хамгийн сайхан  хөвөгч хотын  төсөл байж болох  юм. Усны сараана хэлбэртэй бүтээгдсэн тус хотод ойролцоогоор 50,000 хүн суурьших боломжтой. Бие даасан “Усны сараана” хот нь сэргээгдэх эрчим хүчний эх үүсвэртэй байх бөгөөд уур амьсгалын өөрчлөлтийн улмаас амьдрах орон зай хайх дүрвэгсдийн хувьд ирээдүйн гэр болно гэж төсөөлж байна.
       Винсент Callebaut нь байгаль орчинд ээлтэй, ногоон байгууламжийн төслийг зохион бүтээдгээрээ алдартай бөгөөд түүний бүтээсэн эко төслүүд олон шагнал хүртэж байжээ. Тухайлбал:  Тайвань улсын Тайпей хотод барьсан  “Тансаг орон сууцны цамхаг” төслөөр 2010 онд, Францын Royat  хотод байгуулсан  “Дулааны усан сан” төслөөр 2009 онд олон улсын шилдэг архитекторын шагнал хүртсэн байна.  
      Усны сараана төсөл нь гурван үндсэн бүтэцтэй. Хөвөгч хотын гадна хүрээний дагуу  уул хэлбэрийн 3 байгууламж байрлаж, түүний дотор хиймэл ногоон хүрээлэн байгуулна.  Төв хэсэгт далайн усыг цуглуулж, цэвэршүүлэх зорилготой цөөрөм байх юм. Хүн ам оршин суух зориулалттай уул хэлбэрийн байгууламжийн дээвэр дээр нарны зайн хавтангуудыг суурилуулах бөгөөд гадна фасадыг титаны найрлага бүхий полиестэр материалаар бүрэх гэнэ. Ингэснээр титаны давхар исэл урвалд орж хэт ягаан туяаны нөлөөллийг бууруулж, улмаар агаарын бохирдлыг багасгах үр дүнтэй арга болох ажээ.  
Хөвөгч хотыг зөвхөн сэргээгдэх эрчим хүчээр хангах бөгөөд энэ нь нүүрстөрөгчийн хийн ялгаруулалтыг багасгахад онцгой ач холбогдолтой юм. Сэргээгдэх эрчим хүчний эх үүсвэр болгож Нарны зайн хураагуур, Далайн түрлэгийн эрчим хүч, салхины эрчим хүч, биомассын эрчим хүч зэргийг ашиглах ажээ.

 

Холбоотой мэдээ