Монголын эдийн засгийн  холбооноос Улаанбаатарын эдийн засгийн олон улсын 3-р хурлыг 2015 оны 7-р сарын 2-3-ны өдрүүдэд зохион байгуулах гэж байна.  Хурлаар эдийн засгийн шинжлэх ухааны сүүлийн үеийн судалгааны ажлуудын үр дүнг хэлэлцэх, их дээд сургуулиудын болон олон нийтийн эдийн засгийн боловсролыг сайжруулах, энэ талаар олон улсын туршлагаас суралцах, залуу судлаачдын чадавхийг нэмэгдүүлэх, эдийн засагчид, бодлого боловсруулагчид болон бизнесийн байгууллагуудын хоорондын хамтын ажиллагааг дэмжих, Монголд болон хилийн чанадад ажилладаг эдийн засагчдын сүлжээг тэлэх зорилготой бөгөөд  МУИС-ын дэргэдэх Монгол-Япон төв дээр болох гэнэ.  Улаанбаатарын гэх тодотголтой олон улсын эрдэм шинжилгээний хурал нь 3 дахь удаагаа зохион байгуулагдах гэж буй нь энэ юм. Өмнө нь 2010, 2013 онд болж байжээ.
    Энэ удаагийн хуралд дотоод, гадаадын их дээд сургуулиуд болон Монголбанк, Сангийн Яам зэрэг байгууллагуудын мэргэжлийн эдийн засагчид оролцох юм. Түүнчлэн Монголын эдийн засгийн боловсролын гол төвүүд болох  МУИС, СЭЗДС, ХААИС зэрэг сургуулиудад мөрдөж байгаа сургалтын хөтөлбөрийн бүтэц агуулгыг АНУ, Их Британи, Канад, Франц, Япон зэрэг орны сургалтын хөтөлбөрүүдтэй харьцуулан хэлэлцэх аж.