“Монголын алт” /МАК/ ХХК хагас сарын өмнө Германы “Топверк” группын “Хесс ААС Системс”-ийн технологи бүхий хийт бетоны үйлдвэрээ нээж байсныг уншигчид маань санаж байгаа биз ээ.  Налайх дүүргээс холгүйхэн орших шинэхэн үйлдвэр нь “Евро блок” нэртэй.
Тус хамт олон өнгөрсөн баасан гарагт  үйлдвэрийнхээ үйл ажиллагаа, шат дамжлагтай  танилцаж, “Евро блок” нэрийн бүтээгдэхүүнийг таниулах ажилыг барилгын салбарынхан, нийт хэрэглэгчдийн дунд зохион байгуулсан юм. Евро стандартыг хангасан, хүний гар ажиллагааг халж бүрэн автоматжсан, цэвэрхэн  тохилог энэ үйлдвэртэй танилцахаар олон хүмүүс цуглажээ. Инженерүүд нь уриалхан аргагүй үйлдвэрээ танилцуулж, бүхий л хэсгийг нэгд нэгэнгүй тайлбарлана. Энэ бүгдээс хэдийгээр евро технологи, европ техник ч манай залуус мэргэжлээ  сайн эзэмшжээ гэх бодол эрхгүй төрнө. Мөн Монголчууд бид үйлчилгээний соёлд одоо л суралцаж байна уу даа гэмээр.
     Өндөр хэмийн даралтат уурын сав буюу автоклаваар боловсруулсан хийт бетон нь 1942 онд Швед улсад анх бий болж, Европт төдийгүй дэлхий олон оронд хамгийн түгээмэл хэрэглэгддэг барилгын материалын нэг болон тархсан байна. Хөнгөн бат бэх, даац сайтай, дулаан хадгалах чадвар сайн, суулт өгдөггүй, шатдаггүй, хүссэн хэмжээсээр үйлдвэрлэх боломж бүхий байгальд ээлтэй энэ бүтээгдэхүүнийг амины орон сууц, үйлдвэр, эмнэлэг, сургуулийн байр гэх мэт иргэний болон үйлдвэрлэлийн зориулалтай барилга барихад ашиглахад илүү тохиромжтой. Бүтээгдэхүүний үндсэн найрлагад кварцийн агууламжтай элс, шатаасан шохой, цемент, гөлтгөнө, хөнгөн цагааны нунтаг орох бөгөөд “Евро блок” үйлдвэртээ  “Монголын алт” ХХК өөрийн эзэмшлийн орд газраас ихэнх түүхий эдийг татан авчирдаг байна. Уг үйлдвэр хоногт 900 м/куб жилд 270,000 м/куб  хийт бетон үйлдвэрлэх хүчин чадалтай юм.
   “Барилга.МН” сайтын ихэнх уншигчид барилгын салбарт ажилладаг, эсвэл энэ салбарыг сонирхдог хүмүүс учир “Евро блок” үйлдвэртэй танилцсан тухайгаа дахин элдвийг нуршилгүйгээр зургаар үзүүлэхээр шийдлээ. Дашрамд дурдахад энэ хамт олон тун удахгүй өөрийн бүтээгдэхүүнээр амины орон сууц барьж хэрэглэгчдэд дэлгэн харуулах гэнэ лээ. Бид тэр үед ч мөн уншигч танд танилцуулах болно.