Монгол Улсын Засгийн газраас Дэлхийн банкны хөнгөлөлттэй зээлийн хүрээнд  “Уул уурхайн дэд бүтцийн хөрөнгө оруулалтыг дэмжих төсөл”-ийг хэрэгжүүлээд багагүй хугацаа өнгөрч буй. Энэхүү төслийн хүрээнд төрийн албан хаагчдын чадавхийг бэхжүүлэх зорилготойгоор Барилга, хот байгуулалтын яамнаас “Монгол Улсын уул уурхайг даган хөгжиж буй хот, тосгоны төлөвлөлт ба хэтийн төлөв” сэдэвт сургалтыг саяхан зохион байгууллаа.  Сургалтанд аймаг, нийслэлийн ерөнхий архитекторууд, мөн хот байгуулалтын баримт бичиг боловсруулах эрх бүхий тусгай зөвшөөрөлтэй аж ахуйн нэгж, байгууллагын  хот төлөвлөгч архитектор болон нийт 50 хүн оролцсон байна.   “Ногоон хөгжлийн бодлого”, хотын хөгжлийн чиг хандлага, уул уурхайн үйлдвэрлэлийн дэд бүтцийн хөгжил болон экологийн бүс нутгийн үнэлгээ, барилгын норм, дүрэм, стандартад заасан хөгжлийн бэрхшээлтэй иргэдийн саадгүй хүрч үйлчлүүлэх нөхцөл, шаардлага зэрэг сэдэвт хичээлүүд орсноос гадна “Хот, тосгоны ногоон байгууламжийн тухай”, “Авто зогсоолын тухай” хуулийн төслүүдийн талаарх танилцуулгыг хийсэн байна.
       Барилга, хот байгуулалтын яамны Хот байгуулалт, газрын харилцааны бодлогын хэрэгжилтийг зохицуулах газрын дарга М.Батбаяр  “Хотын хөгжил-чиг хандлага” сэдвээр илтгэл тавьж, хэлэлцүүлэг явуулан аймгийн ерөнхий архитекторуудтай санал бодлоо солилцов.
      Мөн тус сургалтанд АНУ-ын “АЕКОМ” компанийн Загварчлал, төлөвлөлт, эдийн засгийн газрын дарга Жон Бахманыг уригдан уул уурхайн хотуудын төлөвлөлт, онцлог шинж чанар, байгаль орчин ба нийгмийн эрсдлийн тухай  олон улсын туршлагаас  хуваалцсан аж.
Түүнчлэн сургалтын хөтөлбөрийн хүрээнд Өмнөговь аймгийн Цогтцэций сум болон  “Ухаа худаг”  уурхайн бүсийн бүтээн байгуулалт, дэд бүтэц, хот төлөвлөлт, нөхөн сэргээлттэй танилцжээ.