Хятадын “Chinese Broad Sustainable Building” барилгын компани 57 давхар тэнгэр баганадсан барилгыг 19 хоногийн дотор барьж дуусгажээ. Үүний гол нууц нь Lego тоглоом өрж буй мэт блокоор барилгаа үйлдвэрлэх арга гэнэ. Хятадын зүүн өмнөд хэсэг  Чангша дахь энэхүү тэнгэр баганадсан өндөр барилгыг барихдаа нэг өдрийн дотор 3 давхрыг босгож байсан  нь цаг хугацаа, хүч хөдөлмөр хэмнэсэн явдал байсныг дээрх компани дурьджээ.
     180,000 м.кв талбайг эзлэн орших энэхүү барилга нь 4000 хүнд зориулсан оффис, 800 айл өрхийг агуулах багтаамжтай аж. Байгальд ээлтэй тус барилгад Lego тоглоомын адил үйлдвэрийн аргаар бүтээсэн блокнуудыг ашигласан нь бетоны хэрэглээг 15,000 машинаар хэмнэж, тоос шороо, хог хаягдал ч гараагүй байна.
       1,3 тэрбум гаруй хүнтэй Хятад улсын хамгийн гол асуудлуудын нэг нь агаарын бохирдол бөгөөд уг компаний хэлж буйгаар барилгад суурилуулсан агааржуулалтын системийн ачаар барилгын дотор талын агаар гадна талынхаас цэвэр гэнэ. Анх  97 давхар барилга барихаар төлөвлөсөн ч нисэх буудалтай ойр байсны улмаас 57 давхар болгож бууруулжээ.
        Гэхдээ энэ удаагийн төсөл анхных биш бөгөөд 2012 онд Чангшад 30 давхар барилгыг ердөө 15 хоногт барьж байжээ. 2014 оны 4-р сард Хятадын WinSun компани 10 ширхэг бүрэн хэмжээний байшингуудыг аварга том 3D хэвлэгч ашиглан ганц өдрийн дотор барьж байсан тухай бид өмнө нь мэдээлж байсан.