Ази Европийг холбосон хурдны авто зам барих ажил өнгөрсөн жилээс яригдаж, концессийн гэрээгээр төсөвт хүндрэл учруулахгүйгээр барих үндэсний компани шалгаран ажиллаж байгаа юм. Энэхүү хурдны авто зам нь БНХАУ-ын Тэнжин боомтоос Монголоор дайран өнгөрч, ОХУ-ын Транс-сибирийн замтай нийлэн Улаан-Үүд хоттой нийлэх аж. Замын хамгийн урт хэсэг буюу Алтанбулагаас Замын-Үүд чиглэлд 1000 орчим км байх бөгөөд Улаанбаатар хот Туул гол дээгүүр дайран өнгөрүүлэхээр  зураг төслийг боловсруулжээ.
Тодруулбал: уг хурдны зам  Шувуун фабрик, Био комбинатын дундуур явж, Туул голыг дайран өнгөрч, нийт  хоёр км урттай  байхаар  тооцсон гэнэ.
Замын зураг төслийг гаргасан Монголын зам гүүрийн инженерүүд болон гадаадын архитекторуудын хамтарсан баг  нэгэн хэвийн  шийдэл, дизайнаас  татгалзан урлагийн бүтээлийн хэмжээнд  загвар гаргахыг зорьжээ. 
Засгийн газраас өнгөрсөн жил “Чингис Лэнд Девелопмент хөгжлийн зам” групптэй концессийн гэрээ байгуулж уг авто замын ажлыг эхлүүлсэн. Одоогоор хурдны замын ТЭЗҮ-ээ батлуулж,  замынхаа трассыг эцэслэн тогтоожээ.
Мөн  зам барихад шаардлагатай геологи, геодези, хөрсний судалгаа хийх, замын зургийн ажил ид хийгдэж байгаа гэнэ. Монгол улсад анх удаагаа баригдах  олон улсын зэрэглэлийн хурдны авто замыг дагаж томоохон байгууламжууд барихаар  төлөвлөсөн талаар албаны эх сурвалж  мэдээлсэн.