Монгол Улсад анх удаа олон улсын стандарт бүхий транзит тээврийн хурдны авто замыг  барих ажил өрнөж байна. “Алтанбулаг – Улаанбаатар – Замын-Үүд”  чиглэлийн 1000 км хурдны авто замын геотехникийн суурь судалгаа, нарийвчилсан зураг төсөл боловсруулах ажил амжилттай эхлээд  байгаа юм.

Энэхүү хурдны авто зам нь хоёр урсгал, зургаан эгнээтэй байхаар төлөвлөгдөж байгаа бөгөөд нийтдээ 10-12 тэрбум ам.долларын хөрөнгө оруулалт шаардагдах урьдчилсан тооцоо гарсан. Хурдны авто замыг барихдаа хөдөлгөөний аюулгүй байдлыг хянах болон замын төлбөрийг хураах ухаалаг системийг нэвтрүүлэхээр судалгаа, тооцоо боловсруулж байгаа гэдгийг албаныхан онцолсон. Уг хурдны замыг дагаад худалдаа үйлчилгээний олон цэг мөн, амралт, аялал жуулчлал бизнесийн цогцолборууд, хэд хэдэн газарт шинэ суурьшлийн бүс, орчин үеийн эко хотууд босно.

Өнгөрсөн сарын 24-ны өдөр  Зам тээврийн яамны төрийн нарийн бичгийн дарга Ж.Бат-Эрдэнэ хурдны авто замын трасс дайран өнгөрч байгаа зургаан аймгийн засаг дарга нарт албан бичиг илгээсэн.  Энэ нь “Хурдны авто замын зурвас газрыг концесс эзэмшигчид олгох тухай” албан тоот юм.  “Алтанбулаг – Улаанбаатар – Замын-Үүд” чиглэлийн хурдны авто зам төсөл нь Төр – Хувийн хэвшлийн түншлэлийн хүрээнд хийгдэж буй  томоохон бүтээн байгуулалт юм.