“Барилга.МН” цахим сэтгүүл зүйн анхдугаар форумд оролцлоо

“Барилга.МН” цахим сэтгүүл зүйн анхдугаар форумд оролцлоо
     Монголын цахим сэтгүүл зүйн анхдугаар форум өнөөдөр Төрийн ордонд боллоо. Монголын цахим сэтгүүлзүйн нэгэн гишүүнийхээ хувьд “Барилга.МН” сайт ч мөн энэхүү арга хэмжээнд идэвхтэй оролцож, дуу хоолойгоо нэгтгэсэн юм.  Монголын сайтуудын холбооноос санаачлан  Сэтгүүлчдийн нэгдсэн эвлэлээс /МСНЭ/ зохион байгуулж байгаа энэхүү форумд цахим сэтгүүл зүйн 700 гаруй төлөөлөгч оролцлоо. МСНЭ-ийн Ерөнхийлөгч Б.Галаарид форумыг нээж хэлсэн үгэндээ “Мэргэжлийн ёс зүй нийгмийн хариуцлага бол бидний туг байх ёстой гэдгийг онцолж байлаа. Мөн  сэтгүүл зүйн салбарын соёлд хувь хүний хүмүүжил төлөвшил ихээхэн чухал байдаг” гээд өнөөгийн сэтгүүл зүйд шинэ үнэт зүйл, шинэ стандарт хэрэгтэй байна гэдгийг онцолсон юм.  

     Мөн энэхүү форумд зориулж, сэтгүүлзүйн салбараас төрийн түшээ болсон УИХ-ын гишүүн Г.Уянга, Д.Сарангэрэл нар илтгэл тавьж мэргэжил нэгтнүүддээ урмын үг хайрласан.
Цахим сэтгүүл зүй, мэдээллийн технологи хоёр бол нэг зүйлийн хоёр тал гэж ярих нь бий. Ийм ч учраас уг форумд Мэдээлэл технологи, Шуудан харилцаа холбооны газрын дарга Ж.Жадамба өөрийн биеэр хүрэлцэн ирж, хоёр салбарын хамтын ажиллагааны талаар илтгэл тавьж, ярилцсан юм.

   Монгол улсад өнөөгийн байдлаар 1000 гаруй хэвлэл мэдээллийн хэрэгсэл бүртгэлтэй байдгаас талаас илүү нь цахим хэвлэл гэнэ. Иймд энэ салбарт ажиллаж байгаа сэтгүүлчдийн мэдлэг чадварыг дээшлүүлэх, эрх ашгийг хамгаалахаас гадна оюуны өмчийг хамгаалах талаар ч хийх ажил олон байгаа талаар ярилцлаа. Энэхүү форумыг цаашид ч зохион байгуулах бөгөөд жилээс жилд ололт амжилттай байж, сэтгүүл зүйн салбар хөгжинө хэмээн найдна. 

Холбоотой мэдээ